ۇكىمەت باسشىسى ءاليحان سمايىلوۆ جازعى دەمالىستى پايدالى ءارى ءتيىمدى ۇيىمداستىرۋ كەزىندە اۋىل بالالارى كوبىنە ۇمىت قالاتىنىن, دەمالىس ءىس-شارالارى ماعىنالى وتپەيتىنىن ايتقان ەدى. بيىل جازدا وڭىرلەردەگى مەكتەپتەردىڭ وقۋشىلارىنا باسىمدىق بەرىلىپ, اۋىلدىق ەلدى مەكەندەر وقۋشىلارىنىڭ دەمالىس كەزەڭىن بارىنشا قىزىقتى ەتۋگە كۇش سالىنىپ جاتىر.
جازعى دەمالىس ۋاقىتىندا كەرەكۋدە 108 مىڭنان استام وقۋشىنى قامتۋ جوسپارلانىپ وتىر. بۇل – 1-10-سىنىپتاردا ءبىلىم الىپ جاتقان بالالاردىڭ 98,4 پايىزى. اۋىلدىق مەكتەپتەردە ءبىلىم ءنارىن ءسىڭىرىپ جاتقان زەرەك شاكىرتتەرگە, ءتۇرلى ءبىلىم سايىسى مەن بايقاۋىنىڭ جۇلدەگەرلەرىنە «قازاقستان حالقىنا» قورى ەسەبىنەن لاگەرلەرگە جولداما بەرىلەدى. تاعى 700-دەن استام بالا وبلىستىق ساۋىقتىرۋ لاگەرلەرىنە باعىتتالسا, 200 ءجاسوسپىرىم استاناداعى نازارباەۆ ۋنيۆەرسيتەتىنە 10 كۇنگە ساياحاتتايدى. وزگە شاكىرتتەر دە ۇمىت قالمايدى. 40 مىڭنان استام وقۋشىنى قامتيتىن 326 مەكتەپ جانىنداعى لاگەر مەن الاڭداردىڭ جۇمىسىن ۇيىمداستىرۋ قاراستىرىلعان.
– جالپى ءبىلىم بەرۋ مەكتەپتەرىنىڭ بارلىعىندا دەرلىك جازعى لاگەرلەر ۇيىمداستىرىلادى. ولار ءوز جۇمىستارىن 5 ماۋسىمنان باستاپ جۇرگىزسە, ودان سوڭ قالالار ماڭىنداعى لاگەرلەر كەستەگە سايكەس اشىلا باستايدى دەپ كۇتىپ وتىرمىز. ورتا جانە جوعارى سىنىپتارداعى وقۋشىلار ءۇشىن وڭىرىمىزدە سالالىق لاگەرلەر ۇيىمداستىرىلادى. مىسالى, مۇنداي جازعى لاگەرلەر بالالاردىڭ كوركەمسۋرەت مەكتەپتەرىندە قۇرىلىپ, بالالار پلەنەرگە شىعا الادى, تانىمال سۋرەتشىلەرمەن كەزدەسىپ, شەبەرلىكتەرىن شىڭدايدى. مۋزىكالىق مەكتەپتەردە سالالىق اۋىسىمدار پايدا بولسا, ال جاس قۇتقارۋشىلار جاساقتارى وليمپيالىق رەزەرۆتەگى مەكتەپتەرمەن جۇمىس ىستەيدى. مۇنىڭ بارلىعى بالالار ءۇشىن وتە قىزىقتى بولاتىنىنا سەنىمدىمىز, – دەيدى وبلىستىق ءبىلىم باسقارماسى باسشىسىنىڭ ورىنباسارى روزا اقانوۆا.
ءبىلىم بەرۋ مەكەمەلەرىن ىنتالاندىرۋ ماقساتىندا جازعى ۋاقىتتا وبلىستىق دەڭگەيدە كونكۋرستار وتكىزۋ دە جوسپاردا تۇر. قالالىق جانە اۋداندىق ءبىلىم بولىمدەرى اراسىندا «جاز-2023» شىعارماشىلىق جوبالار بايقاۋى, ۇزدىك پەداگوگيكالىق جاساقتى انىقتايتىن «بالا دوستارى» وبلىستىق بايقاۋى جانە ءبىلىم بەرۋ ۇيىمدارىنىڭ وقۋ-تاجىريبەلىك الاڭدارى ءۇشىن «جاسىل جەلەك» وبلىستىق بايقاۋى ۇيىمداستىرىلماق.
بۇگىندە ءوڭىر بويىنشا قالا سىرتىنداعى بالالارعا ارنالعان لاگەرلەردىڭ سانى – 12. ولاردىڭ توعىزى – مەملەكەتتىك, وزگەسى جەكەنىڭ قولىندا. بۇلاردا جازدا شامامەن 6 مىڭنان استام بالا تىنىعادى دەپ كۇتىلىپ وتىر. دەمالىس ورنىنىڭ بارلىعى اشىلماس بۇرىن توتەنشە جاعدايلار قىزمەتىنىڭ جانە سانيتارلىق قىزمەت ماماندارىنىڭ تەكسەرۋىنەن وتەدى.
ر.اقانوۆا الەۋمەتتىك قورعالماعان وتباسىلاردىڭ بالالارى جانە جەتىم بالالار دا دەمالىسپەن قامتىلىپ, بۇل ساناتتاعى 12 مىڭنان استام وقۋشى تىنىعۋ ورىندارىنا جىبەرىلەتىنىن ايتتى. بۇل ماقساتقا شامامەن 300 ملن تەڭگە بيۋدجەت قاراجاتى جۇمسالادى. ماۋسىم ايىنىڭ ورتاسىنان باستاپ تامىز ايىنا دەيىن بالالار ۇيلەرىنىڭ تاربيەلەنۋشىلەرى قالالار ماڭىنداعى لاگەرلەرگە جىبەرىلىپ, بۇل ىسكە مەتسەناتتار مەن دەمەۋشىلەر دە تارتىلماق. قازىردىڭ وزىندە جالپى سوماسى 30 ملن تەڭگەگە 600 جولداما ساتىپ الىنعان.
بالالاردىڭ قىزىعۋشىلىعىن ارتتىرۋ ماقساتىندا جاز مەزگىلىندە ءتۇرلى تانىمدىق جوبا دا قاراستىرىلعان. « ۇلى دالا كەرەمەتى» تۋريستىك ساپارلارى اياسىندا وبلىستىڭ, رەسپۋبليكانىڭ كيەلى جەرلەرىنە ەكسكۋرسيالار ۇيىمداستىرىلادى دەپ كۇتىلىپ وتىر.
پاۆلودار وبلىسى
