جاس ۇرپاقتىڭ الاڭسىز ءبىلىم الىپ, وقۋ ورنىنا جايلى دا قاۋىپسىز قوعامدىق كولىكپەن جەتۋىنە مەملەكەت تاراپىنان بارىنشا كوڭىل ءبولىنىپ وتىرعانى ءمالىم. حالىقارالىق بالالاردى قورعاۋ كۇنىنە وراي وڭىردەگى اۋىلدىق 16 مەكتەپكە زامانعا ساي جابدىقتالعان سارى اۆتوبۋستار بەرىلدى. جاڭا اۆتوبۋستار قاۋىپسىزدىك بەلبەۋلەرىمەن, وقۋشىلاردىڭ ريۋكزاكتارىنا ارنالعان سورەلەرمەن, بەينەكامەرالارمەن جابدىقتالعان. مۇمكىندىگى شەكتەۋلى بالالاردى سالون ىشىنە كوتەرىپ كىرگىزۋگە ارنالعان تەتىگى دە ينكليۋزيۆتى ءبىلىم بەرۋدەگى ماڭىزدى قادامداردى اڭعارتسا كەرەك. مۇنداي جاي كوتەرگىشتىڭ ءوزى اۋىلدىق جەرلەردە وزگە قاتارلاستارىمەن سىنىپتا وتىرىپ ءبىلىم العىسى كەلەتىن مۇمكىندىگى شەكتەۋلى جاسوسپىرىمدەر ءۇشىن اسا قاجەت. ال اۆتوبۋستىڭ ءوزى اقىلدى جۇيەمەن قامتىلعان. جۇرگىزۋشى ەسىكتەردىڭ بارلىعى جابىلعانىنا كوزىن جەتكىزۋ ءۇشىن سالوندى مىندەتتى تۇردە ارالاپ شىعۋى كەرەك. ولاي ەتپەسە, سارى اۆتوبۋس ورنىنان قوزعالمايدى. كامەرالار جۇرگىزۋشىنىڭ ءىس-قيمىلى دۇرىس بولعانىن قۇپتاپ, قوزعالتقىشتى ىسكە قوسۋعا رۇقسات بەرەدى. ال كولىكتىڭ ءوزى كولەمى 3,5 ليترلىك ديزەلدى موتورمەن قامتاماسىز ەتىلگەن. قىستا ءىشى جىلى بولۋى ءۇشىن سالوندا 6 جىلىتقىش رادياتور قويىلعان.
مۇنداي ەرەكشە اۆتوبۋستىڭ ءبىرى باياناۋىل اۋدانىنىڭ قوشكە كەمەڭگەروۆ اتىنداعى ورتا مەكتەبىنە بەرىلدى. شومانكول بولىمشەسىنەن كەلىپ وقيتىن وقۋشىلار ەسكى «پازيك» اۆتوبۋستان قۇتىلعاندارىنا ءماز.
– ق.كەمەڭگەروۆ مەكتەبى وكرۋگ ورتالىعى – جۇمات شانين اۋىلىندا ورنالاسقان. جەتى شاقىرىم جەردەگى شومانكول بولىمشەسىنەن 19 بالا كۇندەلىكتى قاتىنايدى. 2017 جىلى اۋىلدىق اكىمدىككە «پازيك» ماركالى اۆتوبۋس بەرىلىپ, وسى كۇنگە دەيىن وقۋشىلاردى سونىمەن تاسىمالداپ كەلدىك. ول كولىگىمىز دە ەسكىرىپ قالدى. مىنا اۆتوبۋستىڭ تەحنولوگيالىق قامتىلۋى كوڭىلىمىزدەن شىعىپ وتىر. سالونىندا سالقىنداتقىشى بار, كۇن ىستىقتا بالالار مەكتەپكە جايلى جەتەدى. كولىك ديزەل وتىنىمەن جۇرەدى ەكەن. قىستا قوزعالتقىشى مەن جانارماي جۇيەسىن الدىن الا جىلىتىپ قوياتىن قۇرىلعىسى دا بار. بۇل, شىنىمەن دە, ءبىزدىڭ بالالارىمىزعا تاماشا تارتۋ بولدى, – دەپ قۋانىشىمەن ءبولىستى مەكتەپ ديرەكتورى ماديان قابدۋوۆا.
ق.كەمەڭگەروۆ مەكتەبىندە الداعى وقۋ جىلىندا 104 بالا ءبىلىم الادى دەپ كۇتىلىپ وتىر. كوپقاباتتى ءبىلىم ورداسىنىڭ عيماراتى ەسكىرىپ, كوپ جىلدان بەرى كۇردەلى جوندەۋگە سۇرانىپ تۇرعان جايى بار. وقۋ ۇيىمىن جونگە كەلتىرۋ جوباسىن وبلىس بيلىگى كەلەر جىلدىڭ بيۋدجەتىنە ەنگىزگەن ەكەن. جالپى سوماسى 329 ملن تەڭگەگە سمەتا جاسالىپتى. جوبا بويىنشا مەكتەپتىڭ قاسبەتى, ەسىك-تەرەزەلەرى جاڭارىپ, ەدەنى قايتادان قۇيىلادى. قابىرعالارى ارلەنىپ, ەلەكتر جۇيەسى, ىشكى جىلۋ جۇيەسى تولىقتاي جاڭارادى.
ال پاۆلودار اۋدانىنىڭ تۇرعىنى جاننا تاتيەۆا بالالارى زاڭعار ورتا مەكتەبىندە وقيتىنىن, وقۋشىلاردى تاسىمالدايتىن ەسكى قوعامدىق كولىك ءجيى سىنىپ, اتا-انالار ۇنەمى الاڭداپ وتىراتىنىن جەتكىزدى. ەندى قىستىڭ سۋىعى, جازدىڭ ىستىعىندا بالالارىن تاسىمالدايتىن جايلى اۆتوبۋس بار. وقۋشىلار كۇندەلىكتى ساباققا بارۋدان بولەك, ءتۇرلى سپورت سايىسىنا, ءبىلىم بايقاۋىنا وسى اۆتوبۋسپەن قاتىنايدى.
ايتا كەتەيىك, سارى اۆتوبۋستار باياناۋىل, پاۆلودار, ماي, ۋسپەن, اقتوعاي, تەرەڭكول, شارباقتى اۋداندارىنا جانە اقسۋ مەن ەكىباستۇزدىڭ شالعاي اۋىلدارىنا بەرىلدى. جاڭا وقۋ جىلىنا دەيىن وبلىسقا تاعى وسىنداي 30 كولىك جەتكىزىلەدى.
پاۆلودار وبلىسى
