پاريجدە ۇيىمداستىرىلعان ەىدۇ سىبايلاس جەمقورلىققا قارسى جەلىسى باسقارۋشى توبىنىڭ وتىرىسى مەن عالامدىق سىبايلاس جەمقورلىقپەن كۇرەس فورۋمىندا ەلىمىز مونيتورينگتىڭ ءتورت كەزەڭىنەن ءساتتى ءوتىپ, ەىدۇ ساراپشىلارى بەكىتكەن ۇسىنىمداردىڭ باسىم بولىگىن ورىندادى. ەندى شەتەلدىك لاۋازىمدى تۇلعالاردىڭ پارا الۋىنا قارسى كۇرەس جونىندەگى كونۆەنتسياعا قوسىلۋ جوسپارلانىپ وتىر.
ەىدۇ-نىڭ بارلىق ۇسىنىمدارىن ورىنداۋ ارقىلى ەلىمىز تاياۋ جىلدارى دامىعان ەلدەردىڭ كلۋبىنا مۇشەلىككە ۇمىتكەر بولا الادى. بولاشاقتا بۇل ەىدۇ ەلدەرىمەن قۇقىقتىق كومەك كورسەتۋ, قىلمىسكەرلەردى ەكستراديتسيالاۋ جانە ولاردىڭ زاڭسىز م ۇلىكتەرىن قايتارۋ ماسەلەلەرى بويىنشا ىنتىماقتاستىقتى نىعايتۋعا مۇمكىندىك بەرەدى.
جيىندا سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ورىنباسارى دميتري مالاحوۆتىڭ باسشىلىعىمەن قازاقستان دەلەگاتسياسى جەمقورلىققا قارسى ءتيىمدى كۇرەسكە باعىتتالعان سوڭعى وزگەرىستەردى ۇسىندى. اتاپ ايتقاندا, ءبىرىنشى باسشىلاردىڭ قاراماعىنداعىلار ءۇشىن دەربەس جاۋاپكەرشىلىگى, قۇقىق قورعاۋ ورگاندارى قىزمەتكەرلەرى مەن سۋديالاردىڭ سىبايلاس جەمقورلىق قىلمىستارى ءۇشىن جاۋاپكەرشىلىكتى ارتتىرۋ, زاڭسىز شىعارىلعان اكتيۆتەردى قايتارۋ بويىنشا جۇرگىزىلىپ جاتقان جۇمىستار جانە جەمقورلىق فاكتىلەرى تۋرالى حابارلاعان ادامداردى كەشەندى قورعاۋ شارالارى سياقتى نورمالار مەن زاڭنامانى حالىقارالىق ستاندارتتارعا سايكەس قاتاڭداتۋ تۋرالى ءسوز بولدى.
