سۋرەتتەردى تۇسىرگەن ەسەنجول يسابەك
بيە ءسۇتىنىڭ ادام اعزاسىنا اسا پايدالى ەكەنى ءمالىم. دارۋمەنگە باي قىمىزدىڭ ازىرلەنۋ جولدارى دا ءارتۇرلى. اسىرەسە ارقانىڭ بال تاتىعان قىمىزىن ىستىقتا ءشولىڭدى قاندىرىپ ىشكەنگە نە جەتسىن! ءبىر قىزىعى بۇگىندە كەرەكۋدى مەكەن ەتكەن ءارتۇرلى ۇلت وكىلدەرى ءۇشىن قىمىز دوستىق سۋسىنىنا اينالعانداي. ونىڭ قاسيەتىن, پايداسىن وزگەلەر جوعارى باعالايدى. جازدىڭ العاشقى كۇندەرىندە وتەتىن «قىمىزمۇرىندىقتى» اسىعا كۇتىپ, ارقا-جارقا بولىپ قالاتىنى دا سودان.
بۇل جولعى مەرەكەگە قىزىلوردا, اباي وڭىرلەرىنەن, ەلوردادان ارنايى دەلەگاتسيالار كەلىپ, مەيمان بولدى. قوناقتار قۇر كەلمەي, ۇلتتىق بۇيىمدار كورمەسىن ۇيىمداستىردى. قىزىلوردالىقتاردىڭ ايتۋىنشا, ونداعى جەرگىلىكتى جۇرت نەگىزىنەن شۇبات اشىتادى.
– جۋىقتا استانا قالاسىندا ۇلتتىق باس كيىم – تاقيالار فەستيۆالىنە قاتىسىپ, پاۆلودارلىق ارىپتەستەرمەن تانىستىق. ولار ءبىزدى «قىمىزمۇرىندىققا» شاقىردى. مادەني ءىس-شاراعا قىزىلوردادان قولونەر بۇيىمدارىن جاسايتىن 10 شەبەر كەلدى. تاقيا, قۇراق كورپە تۇرلەرىن, جايناماز, تورسىق, ۇلتتىق ناقىشتاعى سومكەلەر, تۇيە ءجۇن كورپە سەكىلدى بۇيىمداردى ۇسىندىق. اجەلەرىمىز ۇيرەتىپ كەتكەندەي, تۇيەنىڭ ءجۇنىن وڭدەپ, ودان جىلى كورپەلەر دايىندايمىز. كەرەكۋدىڭ قىسى سۋىق بولعاندىقتان, جەرگىلىكتى حالىقتان بۇل بۇيىمعا دەگەن سۇرانىس جوعارى, – دەيدى ارال قالاسىنىڭ تۇرعىنى شامشىراق سەيىلوۆا.
ال اباي وبلىسىنان كەلگەن انارگۇل ءساتجانوۆا كەرەكۋلىكتەردىڭ وتە قوناقجاي ەكەنىن اتاپ ءوتتى. وبلىس ورتالىعىنا ارنايى ەكسكۋرسيا ۇيىمداستىرىلىپ, كەيىن ەسكەلدىدەگى ءماشھۇر ءجۇسىپتىڭ كەسەنەسىنە ساپارلاپ قايتقان. ەستەن كەتپەس ساپار بولدى دەيدى قۋانىشىن جاسىرا الماي.
مەرەكەگە جينالعاندارعا ءدامدى باۋىرساق پەن قىمىز تاراتىلدى. اننەن شاشۋ شاشىلىپ, كوپشىلىك ونەرپازداردىڭ ونەرىنە تامسانا قول سوقتى. وسىلايشا, «قىمىزمۇرىندىق» وڭىردە ءداستۇرلى تۇردە وتەتىن ء«بىر شاڭىراق استىندا» جازعى فەستيۆالىن رەسمي تۇردە باستاپ بەردى.
پاۆلودار
