پاتريوتتار فورۋمى مەملەكەت باسشىسىنىڭ قۇتتىقتاۋىمەن باستالدى. مادەنيەت جانە سپورت ءمينيسترى اسحات ورالوۆ پرەزيدەنت ق.توقاەۆتىڭ قۇتتىقتاۋ حاتىن وقىپ, جينالعانداردى رامىزدەر كۇنىمەن قۇتتىقتادى.
«ەرەكشە ەرلىك ىستەرىمەن كوپشىلىككە ۇلگى بولىپ, ءوز سالاسىندا ايرىقشا جەتىستىككە جەتىپ كەلە جاتقان وتانداستارىمىزدىڭ ەڭبەگىن قوعامعا, اسىرەسە جاستارعا دارىپتەۋ ءاردايىم نازارىمىزدا بولۋعا ءتيىس. ءبىز جاڭاشىل, باتىل, ەڭ باستىسى پاتريوت وتانداستارىمىزدى ماراپاتتاپ, ەسىمدەرى مەن ەرلىكتەرىن دارىپتەيمىز. قوعامدى, وسكەلەڭ ۇرپاقتى بىرلىككە, تاتۋلىققا, وتانعا ادال قىزمەت ەتۋگە, ياعني پاتريوت بولۋعا ۇندەيمىز», دەدى اسحات ورالوۆ.
مينيستر پاتريوت دەگەنىمىز, ەڭ الدىمەن ءبىلىمى مەن دارىنىن ەلدىڭ دامۋ جولىنا, حالىق يگىلىگىنە ارناۋ, ەرىنبەي ەڭبەك ەتۋ, تالماي ىزدەنۋ ەكەنىن اتاپ ءوتتى. «بۇگىنگى ءپاتريوتيزمنىڭ ۇلگىسى – قاراپايىم ەڭبەك ادامدارى: دارىگەرلەر, ۇستازدار, ەرىكتى جاستار تاعى باسقا الەۋمەتتىك توپ مۇشەلەرىنىڭ كۇندەلىكتى جۇمىستارىن ابىرويلى اتقارىپ, ءوز ىسىنە ادالدىق تانىتۋى. ماراپاتقا يە بولىپ وتىرعان زامانداستاردىڭ وتانسۇيگىشتىك ەڭبەگىن باعالاۋمەن قاتار, وزگەگە ۇلگى ەتۋ, سول ارقىلى ءپاتريوتيزمنىڭ وزىق وبرازىن قالىپتاستىرۋ – ءبارىمىزدىڭ ازاماتتىق پارىزىمىز», دەدى اسحات ورالوۆ.
ەل پاتريوتتارى 6 باعىت بويىنشا ماراپاتتالدى. عىلىم جانە ءبىلىم باعىتى بويىنشا گەنەتيك عالىم, ۇلتتىق بيوتەحنولوگيا ورتالىعىنىڭ ادام گەنەتيكاسى زەرتحاناسىنىڭ مەڭگەرۋشىسى ماقسات جاباعين جانە ق.جۇبانوۆ اتىنداعى اقتوبە وڭىرلىك ۋنيۆەرسيتەتىنىڭ رەكتورى لاۋرا قاراباسوۆا «جىل پاتريوتى» اتاندى. ماقسات جاباعين – ورتالىق ازيا حالىقتارى قالىپتاسۋىنىڭ گەنەتيكالىق ارتۇرلىلىگى مەن گەنەتيكالىق تاريحىن زەرتتەگەن عالىم. 75-تەن استام عىلىمي ەڭبەكتىڭ اۆتورى. 2019 جىلى «قازاقستاننىڭ ەڭ جاس عالىمى» اتانعان. ال لاۋرا قاراباسوۆا – ەلىمىزدەگى ەڭ جاس رەكتور. ەلدەگى بولون رەفورماسى, زەرتتەۋ جوباسى ءۇشىن ءبىلىم بەرۋدەگى ەۋروپالىق زەرتتەۋشىلەر قاۋىمداستىعى گرانتىنىڭ جەڭىمپازى.
مادەنيەت جانە سپورت باعىتى بويىنشا جۇلدەگە پيانيست, مۋزىكانت تەمىرلان بەيسەنباي جانە قازاقستاننىڭ ەڭبەك سىڭىرگەن جاتتىقتىرۋشىسى, حالىقارالىق سپورت شەبەرى مىرزاعالي ايتجانوۆ يە بولدى. تەمىرلان بەيسەنباي – ميلاندا, ەۋروپا كوشەلەرى مەن قازاق دالاسىنىڭ تۇكپىر-تۇكپىرىندە مەملەكەتتىك گيمندى, ۇلتتىق اۋەندەر مەن ءارتۇرلى مۋزىكالاردى ورىنداپ, وتانداستارىمىزدى پاتريوتتىق ىستەرگە ۇندەپ جۇرگەن مۋزىكانت. مىرزاعالي ايتجانوۆ – الەم چەمپيونى ءبىرجان جاقىپوۆ, وليمپيا ويىندارىنىڭ قولا جۇلدەگەرى ەركەبۇلان شىناليەۆ, الەم چەمپيوناتىنىڭ قولا جۇلدەگەرى قايرات ەراليەۆتىڭ باپكەرى.
مەديتسينا جانە ۆولونتەرلىك باعىتىنداعى اتالىمدى مەديتسينا سالاسىنىڭ ۇزدىگى, پرەزيدەنت ءىس باسقارماسى مەديتسينالىق ورتالىعى ديرەكتورىنىڭ حيرۋرگيا جونىندەگى ورىنباسارى مىڭجىلقى بەردىحودجاەۆ پەن «Kobelek balalar» قايىرىمدىلىق قورىنىڭ پرەزيدەنتى سۇلتان اللابەرگەنوۆ جەڭىپ الدى. مىڭجىلقى بەردىحودجاەۆ – وتاندىق ەندوۆاسكۋليارلىق نەيروحيرۋرگيانىڭ نەگىزىن قالاعان دارىگەر. 2013 جىلى ول العاشقى مەحانيكالىق ترومبەكتوميا جاسادى. بۇگىندە باس-مي تامىرلارىنا 6500-دەن استام جوعارى تەحنولوگيالىق وپەراتسيا جاساعان. ال سۇلتان اللابەرگەنوۆ سيرەك كەزدەسەتىن گەنەتيكالىق ناۋقاستارعا كومەك كورسەتەتىن قايىرىمدىلىق قورىن ۇيىمداستىرعان. قور قۇرىلعان ساتتەن باستاپ (2017) 16 جاسقا دەيىنگى 61 بالاعا, 20 ەرەسەك ادامنىڭ ەمىنە كومەك كورسەتكەن, سونداي-اق 3 بالانىڭ شەتەلدەگى, 2 بالانىڭ قازاقستانداعى وپەراتسياسىن قارجىلاندىرعان. ودان بولەك پاندەميا كەزىندە 3 مىڭنان استام مۇقتاج ادامدى ازىق-ت ۇلىكپەن قامتاماسىز ەتكەن.
ونەركاسىپ جانە اۋىل شارۋاشىلىعى باعىتى بويىنشا جۇلدە اگروونەركاسىپ سالاسىنىڭ مامانى الماگۇل ايقان مەن جاس كاسىپكەر, اۋىل شارۋاشىلىعى مامانى ۆەرونيكا سالوۆاعا بۇيىردى. الماگۇل ايقاننىڭ ءسۇتتى قايتا وڭدەيتىن «Aykan» كاسىپورنى 2000 جىلدان باستاپ 8 ءتۇرلى ىرىمشىك وندىرەدى. بۇگىنگى تاڭدا زاۋىت تۇركىستان وبلىسى بويىنشا ءسۇت ونىمدەرىن وڭدەيتىن ءىرى كاسىپورىنعا اينالىپ وتىر. كومپانيا ونىمدەرى ەلىمىزدىڭ بارلىق وبلىسىندا سۇرانىسقا يە.
ۆەرونيكا سالوۆا ابەردين انگۋس, قازاق اقباس, اۋليەكول, دالا تۇقىمدارى سياقتى جىلقى مەن ءىرى قارا مال وسىرۋمەن اينالىسادى. 2022 جىلدىڭ مامىر ايىندا «بيزنەس لەدي قازاقستان» تىزىمىنە كىرگەن, 2022 جىلى «اگرو لەدي 2022» مۇسىنشەسىنە يە بولعان. سونداي-اق, ءوز قاراجاتى ەسەبىنەن اۋىلعا سۋ قۇبىرىن تارتۋعا جوبالىق-سمەتالىق قۇجاتتاما دايىنداعان.
تەحنولوگيا جانە بيزنەس باعىتىنداعى جۇلدەمەن IT سالاسىنىڭ مامانى, موبيلدىك قوسىمشا جاساۋشى ايبولات قۇلاتاي جانە IT كاسىپكەر, «EasyTap» كومپانياسىنىڭ اتقارۋشى ديرەكتورى ماعزۇم تولەش ماراپاتتالدى. ايبولات قۇلاتاي مەملەكەتتىك ءتىلدى دامىتۋ ماقساتىندا 2022 جىلى «Aqyl Battle» موبيلدىك قوسىمشاسىن دايىنداپ شىعارعان. ال ماعزۇم تولەش شىعارعان «EasyTap» قوسىمشاسى – ساعاتتىق جۇمىس ىزدەۋ بويىنشا ونلاين سەرۆيس. ونىڭ جاڭالىعى ارقاسىندا 4 مىڭنان استام ادام قوسىمشا جالاقى الىپ وتىر.
ال سوڭعى باعىت «ەرەكشە ەرلىك كورسەتكەن ازاماتتار» دەپ اتالادى. بۇل ماراپاتقا «Amanat» پارتياسىنىڭ قىزمەتكەرى بەكارىستان امانجولوۆ پەن كينولوگ, قۇتقارۋشى الەكساندر ادامباەۆ لايىقتى دەپ تانىلدى. بەكارىستان امانجولوۆ ءاسيا ۋاليحانقىزىنا باۋىر دونورى بولدى. الەكساندر ادامباەۆ تۇركيانىڭ نۇرداعى قالاسىنداعى جەر سىلكىنىسى سالدارىن جويۋعا كومەكتەسىپ, ءۇيىندى استىنان بىرنەشە ادامدى امان الىپ شىققان. بۇل ەكى باتىرعا اتالىمدى حالىق قاhارمانى, گەنەرال-لەيتەنانت باقىتجان ەرتاەۆ تاپسىردى.
