ساۋدا جانە ينتەگراتسيا ءبىرىنشى ۆيتسە-ءمينيسترى ارمان شاققاليەۆ اتاپ وتكەندەي, جىل باسىنان بەرى ءامات باعاسىنىڭ ءوسىمى 4,2%-دى, ال مامىر ايىنىڭ قورىتىندىسى بويىنشا 0,7%-دى قۇرادى. بيىل بۇل كورسەتكىش بويىنشا استانا (6,1%), شىعىس قازاقستان وبلىسى (5,3%) جانە جەتىسۋ وبلىسى (5,3%) انتيليدەر بولدى. پياز, قىرىققابات, كۇرىش جانە ءسابىزدىڭ باعالارى بارىنشا قىمباتتادى, ال قاراقۇمىق, قانت, كۇنباعىس مايى مەن ۇننىڭ باعاسى تومەندەدى.
قر سيم ينفلياتسيا دەڭگەيىن 2 ەسەگە تومەندەتۋ ماقساتىندا ءامات باعاسىنىڭ وسۋىنە بارىنشا اسەر ەتەتىن ازىق-ت ۇلىك تاۋارلارىن وندىرۋشىلەردى قولداۋعا باعىتتالعان جاڭا ءتاسىلدى ازىرلەدى. بۇعان سيىر ەتى, كۇنباعىس مايى مەن سارى ماي, كۇرىش, قانت جانە كوكونىستەر جاتادى. بۇگىنگى تاڭدا 78 نەگىزگى ءوندىرۋشى انىقتالدى. جاڭا الگوريتم شەڭبەرىندە ءاربىر تاۋارعا – ءوندىرۋ مەن ساقتاۋدان باستاپ ساتۋعا دەيىن باعدارلانعان ءتاسىل قامتاماسىز ەتىلەدى.
پرەمەر-مينيستر جالپى, تەك مامىر ايىنىڭ وزىندە عانا قىرىققابات 22,3%, ءسابىز 10,8%, پياز 9,6%, كارتوپ 6,6%-عا قىمباتتاعانىن اتاپ ءوتتى. بۇل جەرگىلىكتى جەرلەردەگى ماۋسىمدىق كەزەڭدە نارىقتى كوكونىستەرمەن قامتاماسىز ەتۋ جۇمىستارىنىڭ تيىمسىزدىگىن كورسەتەدى.
ول سونداي-اق اۋىل شارۋاشىلىعى مينيسترلىگى تاراپىنان ۇيلەستىرۋ جۇمىستارىنىڭ السىزدىگىن اتاپ ءوتتى.
«باعانى تۇراقتاندىرۋ ءۇشىن نارىقتا ۇسىنىس ۇنەمى كوپ بولۋى ءتيىس. مىسالى, ساۋدا, اۋىل شارۋاشىلىعى مينيسترلىكتەرى مەن اكىمدىكتەر اقپان-ناۋرىز ايلارىندا تاجىكستانمەن پياز ساتىپ الۋ ماسەلەسىن پىسىقتاي باستادى. الايدا, ونى پيازدىڭ باعاسى 10%-عا دەيىن ءوسىپ كەتكەن ۋاقىتتا, ياعني مامىر ايىندا عانا ساتىپ الدى. تاۋاردى ءتيىمدى باعامەن الاتىن مۇمكىندىكتى قولدان شىعارىپ الدىق. ءار ءوڭىر ءوز ەرەكشەلىگىن بىلەدى, سوندىقتان وندىرۋشىلەرمەن الدىن-الا مەموراندۋمدار بەكىتۋى كەرەك», دەدى ول.
ۇكىمەت باسشىسى ءامات باعاسىن تەجەۋ جونىندەگى جاڭا الگوريتمىن تولىققاندى ىسكە اسىرۋدى جانە اۋىل شارۋاشىلىعى تاۋارىن وندىرۋشىلەرمەن كەلىسىم-شارتتاردىڭ ۋاقىتىلى جاسالۋىن قامتاماسىز ەتۋدى, سونداي-اق ءتيىمسىز دەلدالداردى انىقتاپ, ولاردى جويۋ جۇمىستارىنىڭ ساپاسىن ارتتىرۋدى جانە ساۋدا ۇستەمەلەرىنە باقىلاۋدى كۇشەيتۋدى تاپسىردى.
