كەش شىمىلدىعىن «جايقوڭىر» قازاق ۇلتتىق فولكلورلىق ءانسامبلى كۇيمەن اشتى. سونداي-اق بۇل كۇنى ەلىمىزدىڭ ەڭبەك سىڭىرگەن قايراتكەرى, تورايعىروۆ ۋنيۆەرسيتەتىنىڭ پروفەسسورى ەربول ايتباەۆ, مادەنيەت قايراتكەرى جانىبەك مالىكوۆ, ي.بايزاقوۆ اتىنداعى وبلىستىق فيلارمونيانىڭ ءانشىسى جانبولات بايسولتان, رەسپۋبليكالىق جانە حالىقارالىق كونكۋرستاردىڭ لاۋرەاتى سالتانات قيساتوۆا, ۋسپەندىك ونەرپاز ەرباق قۇرمەتجان ءوز ونەرلەرىن كورسەتتى.
سونىمەن قاتار اقان سەرى اتىنداعى ءى رەسپۋبليكالىق كونكۋرستىڭ باس جۇلدەگەرى جايدار شۇنان, «ونەر» قالالىق مادەنيەت سارايىنىڭ ءانشىسى مۇحيت نۇربول, ەستاي اتىنداعى بالالار مۋزىكا مەكتەبىنىڭ ونەرپازدارى مانەيحان قۋاندىق, ازامات اسەت, تىلەگەن ءبىلال, «اتامۇرا» مادەنيەت ورتالىعىنىڭ ءداستۇرلى انشىلەرى جومارت قابىكەنوۆ, سۇڭعات كوپەجانوۆ, بولاتبەك شالانوۆ, جاس ءانشى ايدىن بەيسەن, حالىق اراسىنان شىققان بۇركىتشى, اتبەگى, ءانشى قۋات كارىموۆ كورەرمەننىڭ ىستىق ىقىلاسىنا بولەندى.
اتاپ وتەرلىگى, ءان كەشىنىڭ فورماتى بۇل جولى وزگەشەلەۋ بولدى. جاس اقىن ەربولات امىرەنوۆ انشىلەردى جاي حابارلاۋمەن شەكتەلمەي, ورىندالاتىن اندەردىڭ شىعۋ تاريحى, ونەر زەرتتەۋشىلەرىنىڭ بەرگەن باعاسى تۋرالى قىسقا مالىمەت ايتىپ وتىردى.
جينالعان جۇرتشىلىق اقان سەرىنىڭ شوقتىعى بيىك «سىرىمبەت», «بالقاديشا», «ماڭماڭگەر», ء«لايلىم شىراق», باسقا دا اندەرىن ەرەكشە قابىلداپ, ونەرپازدارعا تىك تۇرىپ, قۇرمەت كورسەتتى.
سونداي-اق كەش بارىسىندا تالانت تەجەكەنوۆ پەن قايرات توقان كومپوزيتوردىڭ «كەربەز كەرىك», «ۇزاق اقجەلەڭ» كۇيلەرىن ورىنداپ, حالىق قوشەمەتىنە يە بولدى.
ەكىباستۇز
