فورۋمعا قارۋلى كۇشتەردىڭ, اسكەري قۇرالىمداردىڭ, پرەزيدەنت جانىنداعى ۇلتتىق عىلىم اكادەمياسىنىڭ, يندۋستريا جانە ينفراقۇرىلىمدىق دامۋ مينيسترلىگىنىڭ وكىلدەرى, ەۋرازيا ۇلتتىق ۋنيۆەرسيتەتىنىڭ وقىتۋشىلارى جانە قارۋلى كۇشتەردىڭ ارداگەرلەرى قاتىستى.
كونفەرەنتسيانى اسكەري عىلىم اكادەمياسىنىڭ پرەزيدەنتى, زاپاستاعى پولكوۆنيك مۇحتار سەرىكپاەۆ اشىپ, اسكەري وقۋ ورىندارىندا جاسىنا قاراي ماگيستراتۋرا مەن دوكتورانتۋرادا وقىتۋ ماسەلەلەرىن كوتەردى. ونىڭ پىكىرىنشە, اسكەري عىلىمدى دامىتۋ جانە مەملەكەتتىڭ ۇلتتىق قاۋىپسىزدىگىن نىعايتۋ ماقساتىندا قۇزىرەتتى ورتالىق قۇرۋ قاجەت.
ودان بولەك, پرەزيدەنت جانىنداعى ۇلتتىق عىلىم اكادەمياسىنىڭ ۆيتسە-پرەزيدەنتى ءلاززات ەراليەۆا, اسكەري عىلىم اكادەمياسىنىڭ ءبىرىنشى ۆيتسە-پرەزيدەنتى, وتستاۆكاداعى گەنەرال-لەيتەنانت بولات جاناساەۆ, قورعانىس مينيسترلىگى اسكەري ءبىلىم جانە عىلىم دەپارتامەنتىنىڭ باستىعى, گەنەرال-مايور جۇمابەك احمەتوۆ, ۇقك شەكارا قىزمەتىنىڭ جاۋىنگەرلىك كەزەكشىلىك جانە سيتۋاتسيالىق اقپاراتتاندىرۋ دەپارتامەنتىنىڭ باستىعى, پولكوۆنيك ناعمەت سادىقوۆ, مالىك عابدۋللين اتىنداعى ازاماتتىق قورعانىس اكادەمياسى باستىعىنىڭ وقۋ جۇمىسى جونىندەگى ورىنباسارى, پولكوۆنيك قۋانىشبەك كارمەنوۆ, ت.ب. سالا ماماندارى بايانداما جاسادى.
ايتا كەتەيىك, «قر اسكەري عىلىم اكادەمياسى» رقب 2013 جىلى اسكەري عىلىم مەن عىلىمي مەكتەپتەردىڭ ساباقتاستىعىن دامىتۋ ماقساتىندا قۇرىلعان بولاتىن. اكادەميا عالىمدارى عىلىم جانە جوعارى ءبىلىم مينيسترلىگىنىڭ, قورعانىس مينيسترلىگىنىڭ, يندۋستريا جانە ينفراقۇرىلىمدىق دامۋ مينيسترلىگىنىڭ, سونداي-اق كۇشتىك قۇرىلىمداردىڭ مۇددەسى ءۇشىن گرانتتىق جانە باعدارلامالىق-ماقساتتى قارجىلاندىرۋ جوبالارىن ورىندايدى.
وقۋ ورنىنىڭ «اعا-حابارشىسى» دەگەن اتپەن عىلىمي جۋرنالى شىعادى. ونىڭ بەتتەرىندە ۇلتتىق قورعانىس ۋنيۆەرسيتەتىنىڭ ماگيسترانتتارى مەن دوكتورانتتارى, قازاقستان مەن تاياۋ شەتەلدەردىڭ بەلگىلى عالىمدارى ماقالالار جاريالاپ تۇرادى. 2020 جىلى اكادەميا قۇرامىندا قاۋىپسىزدىك جانە ارنايى ءبىلىم بەرۋ باعدارلامالارى ينستيتۋتى قۇرىلدى. ونىڭ نەگىزىندە اۋماقتىق قورعانىس, جۇمىلدىرۋ دايىندىعى, كادرلىق جۇمىستى ۇيىمداستىرۋ جانە اكىمدىكتەردىڭ, مەملەكەتتىك ورگانداردىڭ جانە باسقا دا ۇيىمداردىڭ ماماندارىن اسكەري ەسەپكە الۋ كۋرستارى وتەدى.
اتاۋلى كۇنگە وراي كونفەرەنتسياعا قاتىسۋشىلار «اسكەري عىلىمدار اكادەمياسىنا 10 جىل» توسبەلگىسىمەن ماراپاتتالدى.
