سۋرەتتى تۇسىرگەن يۋري بەككەر
جيىندا ورتالىق مەملەكەتتىك كينو-فوتوقۇجاتتتار مەن دىبىس جازبالار ءارحيۆى ديرەكتورى ءىلياس ىسقاقوۆ, ءال-فارابي اتىنداعى قازۇۋ باسقارما توراعاسى-رەكتورى جانسەيىت تۇيمەباەۆ, تۇركى دۇنيەسى جازۋشىلار وداعىنىڭ توراعاسى, اقىن ۇلىقبەك ەسداۋلەت, اقىن, مەملەكەتتىك سىيلىقتىڭ لاۋرەاتى تەمىرحان مەدەتبەك, مەملەكەت جانە قوعام قايراتكەرلەرى, زيالى قاۋىم وكىلدەرى باس قوستى.
فوتوالبومدى دايىنداۋ يدەياسى وسىدان ءبىر جىل بۇرىن, شىعارماشىلىق, ىزدەستىرۋ-زەرتتەۋ جۇمىستارىنا كوشكەننەن كەيىن قولعا العان فيلوسوفيا عىلىمدارىنىڭ كانديداتى, دوتسەنت جاناي ومارعا تيەسىلى. قازاق تاريحى مەن مادەنيەتىندەگى ماڭىزىن ەسكەرە وتىرىپ, مەملەكەتتىك مۇراعات قورلارىن كوبەيتۋ ماقساتىندا «قازاق ادەبيەتى: فوتوشەجىرە ء(بىرىنشى ءبولىم) 1920-1970 جىلدار» جوباسىن ىسكە اسىرۋعا كىرىسكەن. بۇگىنگى قاۋىم تەلەديداردان مۋزىكانتتاردىڭ, انشىلەردىڭ ەرتەرەكتەگى كەلبەتىن كوبىرەك قىزىقتايدى, ال سول داۋىردە ءومىر سۇرگەن عالىمدار, قالامگەرلەر بەينەسى تىم سيرەك كورىنىس تابادى.
«بۇگىندە حالقىمىزدىڭ رۋحاني-مادەني مۇراسىنا نازار اۋدارۋ ءۇشىن اۋديوۆيزۋالدى ارحيۆ قورلارىن زەرتتەۋدىڭ ماڭىزى زور. ولار ەل ءومىرىنىڭ بارلىق سالالارى تۋرالى سەنىمدى رەتروسپەكتيۆتى اقپاراتتىڭ باعا جەتپەس كوزى بولىپ تابىلادى. كەيدە تەك ءبىر فوتوقۇجات كوپتەگەن جازبا ماتىندەرگە قاراعاندا كوبىرەك اقپارات بەرە الادى. بەلگىلەنگەن كەزەڭنىڭ ارحيۆتىك قۇجاتتارىن قامتيتىن بۇل باسىلىم قازاق ادەبيەتىنىڭ قالىپتاسۋى مەن دامۋىنىڭ ىلگەرىدەگى جىلدارىنا, ەڭ الدىمەن قازاقتىڭ ايگىلى اقىندارىنىڭ, اتاقتى پروزاشىلارىنىڭ, ادەبيەت سىنشىلارىنىڭ العاشقى بۋىندارىنىڭ ەستەلىكتەرىنە ارنالعان. ولاردىڭ ىشىندە جازۋشىلاردىڭ ءومىرى مەن ەڭبەگى تۋرالى باياندايتىن كوپتەگەن سيرەك كەزدەسەتىن از تانىمال فوتوسۋرەتتەر بار. كەيبىرەۋى ارحيۆتەردە ۇمىت قالعان, عىلىمي قولدانىسقا ەنبەگەن», دەيدى قازاقستاننىڭ ەڭبەك سىڭىرگەن قايراتكەرى جاناي وماروۆ.
مازمۇنى حرونولوگيالىق تارتىپپەن قۇراستىرىلعان جيناق بەس بولىمنەن تۇرادى. «الاساپىران توڭكەرىستى جيىرما مەن وتىزىنشى جىلدار (1920-1939)», «قيىن-قىستاۋ قىرقىنشى جىلدار (1940-1949)», «ەڭسە تىكتەگەن ەلۋىنشى جىلدار (1950-1959)», «الپىسىنشى جىلدار اسۋلارى (1960-1969)», «جەتپىسىنشى جىلدار جەمىسى (1970-1979)» اتتى بەس بولىمگە توپتاستىرىلعان فوتوسۋرەتتەر ءوز ءداۋىرىنىڭ شىندىعىن تولعاپ, كەلبەتىن كوز الدىعا اكەلەدى.
فوتوالبوم نەگىزىن مۇحتار اۋەزوۆ مۋزەيىنەن, عابيدەن مۇستافين, حاميت ەرعاليەۆ, قابدىكارىم ىدىرىسوۆ, قاسىم قايسەنوۆ, ءابىش كەكىلبەۆ, اقسەلەۋ سەيدىمبەك, سەرىك قيراباەۆ, ماكسيم زۆەرەۆ, موريس سيماشكو, ءماريام حاكىمجانوۆا, سەيىتجان وماروۆ, امانتاي ساتاەۆ جانە تاعى باسقا جازۋشىلاردىڭ وتباسىلىق ارحيۆتەرىنەن, قايرات مۇستافين, يوسيف بۋدنەۆيچ, يۋري كۋيدين, پەتر رەدكو, راحىمباي حاناليەۆ, سايلاۋ پەرنەباەۆ سياقتى بەلگىلى فوتوگرافتاردىڭ جەكە مۇراعاتتارىنان الىنعان فوتوقۇجاتتار قۇرادى.
فوتوقۇجاتتار جاس ۇرپاقتى وتكەن كەزەڭمەن تانىستىرۋدا, تاريحي سانانى جاڭعىرتۋدا ەرەكشە ءرول اتقارادى. جيىندا ءسوز العان زيالىلار جارىق كورگەن جاڭا فوتوشەجىرە البومىنىڭ بۇگىنگى قازاق رۋحانياتى ءۇشىن قۇندى ەڭبەك ەكەنىن اتاپ ءوتتى.
