ينتەرنەت-بانكينگتى مەڭگەرگەندەر

قازىر بارلىق دەرلىك بانك­تىڭ ءمو­بيلدى قوسىمشاسى جۇ­مىس ىستەيدى. قار­جى ينستيتۋتى باسشىلىعى دا سوعان ۇلكەن ءمان بەرىپ وتىر. ولار ءۇشىن قا­زىر بانكتىڭ ەكوجۇيەسىن دامىتۋ, سو­عان وراي ءموبيلدى بانكينگتى جوعارى دەڭگەيدە قالىپتاستىرۋ, قولايلى ءارى ءتيىمدى ونلاين جۇيە ارقىلى كليەنت تارتۋ وتە ماڭىزدى.

Finprom.kz مالىمەتى بو­يىنشا «Google Play»-دەگى «قارجى» سەكتو­رىندا بيىل قاڭتار-ناۋرىز ارالى­عىندا «Kaspi.kz», «Jusan» جانە «Halyk Bank» ءموبيلدى قوسىمشالارى تانى­مالدىلىق تۇرعىسىنان كوش باس­تاعان. بۇل بانكتەردىڭ شىعانداپ العا شىعۋى زاڭدى دا. ويتكەنى اتال­عان قارجى ۇيىمدارى كەيىنگى جىلدارى ءوز قوسىمشالارىن ۇدايى جە­تىلدىرۋمەن بولدى, مەملەكەتتىك ورگاندارمەن ءسات­تى ينتەگراتسيا جاسادى جانە سەر­ۆيستەردى دامىتۋعا كوپ كوڭىل ءبولدى. مىسالى, «Jusan» تاياۋدا عانا ءوز ءموبيلدى قوسىم­شاسىن تولىق جاڭارتتى. ونىڭ اياسىندا ديزاينى دا, فۋنكتسياسى دا جاڭعىردى, تيىسىنشە پايدالانۋشىلار ءۇشىن قو­لايلى بولا ءتۇستى.

جوعارىدا اتاپ وتكە­نى­مىز­دەي, قا­زىرگى كەزدە بانك­تەر ءموبيلدى قوسىم­شادا تەك بانك قىزمەتتەرىن عانا تىركەپ قويمايدى, سونىمەن بىرگە تو­لىققاندى ەكوجۇيە ۇسىنۋعا تىرىسادى. ماسەلەن, «Kaspi» جانە «Halyk» قوسىمشالارى ارقىلى ءتۇرلى قىزمەتتەر اقى­سىن تولەۋ, الۋان ءتۇرلى قۇ­جاتتار جۇكتەپ الۋ­­مەن قاتار, جەكە كاسىپكەرلىكتى تىر­كەۋ, جۇر­گىزۋ مۇمكىندىگى دە بار. «Jusan Bank»-تە دە سەرۆيس جوعارى دارە­جەدە جەتىل­دىرى­ل­گەن. وزگەلەردەن ءبىر ەرەك­شە­لىگى, مۇن­دا باعالى قاعازدار نا­رى­عىنا شىعۋ ءۇشىن ينۆەس­تيتسيالىق شوت اشۋعا بولادى.

قازىر بانك پەن قارجى قىز­مەت­تەرىنىڭ تسيفرلانۋى جالپى ەكو­نو­ميكانىڭ اجىراماس بولشەگىنە اينالىپ كەلە جاتىر. 2022 جىلى قولما-قولسىز جاسالعان وپەراتسيالار قۇرىلىمىنداعى ونلاين-وپەراتسيا ۇلەسى بويىنشا 64,6 پايىزدى, كولەمى بويىنشا 82,5 پايىزدى قۇراعان. كۇن سايىن ەل تۇرعىندارى ورتاشا ەسەپپەن العاندا تىكەلەي تسيفرلى بانكينگ كومەگىمەن 15,2 ملن وپەراتسيانى جۇ­زەگە اسىرادى. ونداعى سوما كولەمى 234,7 ملرد تەڭگەدەن اسىپ كەتەدى.

Ranking.kz ساراپشىلا­رىنىڭ ايتۋىنشا, بۇل ءۇردىس تەك قازاقستانعا عانا ءتان ەمەس. جاھاندىق تسيفرلىق بان­­­كينگ پايدالانۋشىلارى 2024 جىل­عا قاراي 3,6 ميللياردقا جەتەدى دەپ بولجانىپ وتىر. ءموبيلدى بان­كينگ­تى پايدالانۋشىلاردىڭ 94 پا­يىزعا جۋىعى تسيفرلىق بانكينگ قىز­مەتتەرىنە ايىنا كەمىندە ءبىر رەت قول جەتكىزەتىنىن ايتادى. مىسالى, اقش-تا بانك­تىك شوت يەلەرىنىڭ شامامەن 89 پايىزى ءوز قارجىسىن باسقارۋ ءۇشىن ءموبيلدى بان­كينگ­تى پايدالانادى.

قازاقستانداعى جەتەكشى بانكتەردىڭ ءموبيلدى قوسىم­شالارى – تەك نەگىزگى بانكتىك قىزمەتتەردىڭ جيىنتىعى عانا ەمەس, جالپى كوپتەگەن ءتۇرلى قىزمەتتەر مەن مۇمكىندىكتەردى قامتيتىن ۇلكەن ەكوجۇيە. بۇعان ساي ەلدە تسيفرلىق ساۋاتتىلىق تا ايتارلىقتاي جوعارى كور­سەتكىشكە يە. ماسەلەن, 2022 جىل­­دىڭ قورىتىندىسى بويىنشا بۇل كور­سەتكىش 88,3 پايىزعا جەتىپتى. 2021 جىلى تسيفرلىق ساۋاتتىلىق دەڭگەيى 87,3 پايىز بولسا, 2020 جىلى – 84,1 پايىز, 2019 جىلى – 82,1 پايىز, 2018 جىلى 79,6 پايىز بولعان.

حالىق اراسىندا قولما-قول اقشا­سىز وپەراتسيالاردى جۇزەگە اسى­رۋدىڭ ەڭ كوپ تاراعان ءتاسىلى – ينتەر­نەت جانە ءمو­بيلدى بانكينگ. قولما-قول اقشاسىز جاس­العان ون وپەراتسيانىڭ سەگىزى ون­لاين تۇر­دە جۇر­گىزىلەدى. ين­تەر­نەت جانە ءمو­بيل­دى بان­كينگتىڭ باستى ار­تىق­­شىلىقتارى مىنالار:

- ۋاقىت ۇنەمدەۋ – بانك بولىمشە­لەرىنە بارۋدىڭ, كەزەكتە جانە كەپتە­لىس­تە تۇرۋدىڭ قاجەتى جوق. بۇل كەز كەلگەن وپەراتسيانى وڭدەۋدى ايتارلىقتاي جىلدامداتادى.

- موبيلدىلىك – جۇيەگە ينتەرنەتكە كىرۋگە مۇمكىندىگى بار كەز كەلگەن جەردە, سونىڭ ىشىندە ۇيالى تەلەفوندار, پلانشەتتىك كوم­پيۋتەرلەر جانە باس­قا قۇ­رىل­عىلار ارقىلى شەكتەۋسىز قول­جەتكىزۋگە بولادى.

يكەمدىلىك – تاۋلىگىنە 24 سا­عات, اپتاسىنا 7 كۇن قول­جە­تىمدى.

اقشا ۇنەمدەۋ – تولەم مەن اۋدارىمداردى وڭدەۋ شىعىنى ازايادى.