ءۇش كەزەڭنەن تۇراتىن بايقاۋعا ا.بايتۇرسىن ۇلى اتىنداعى ءبىلىم اكادەمياسىنىڭ ديرەكتورى, احمەتتانۋشى, فيلولوگيا عىلىمدارىنىڭ كانديداتى ۇلان ەركىنباي توراعالىق ەتتى. ال قازىلار القاسى بىلىكتى پەداگوگ-ادىسكەرلەر مەن عالىمداردان قۇرالعان.
– جىل سايىن وتەتىن بۇل بايقاۋدىڭ باستى ماقساتى – ۇلت ۇستازىنىڭ ادىستەمەلىك ەڭبەكتەرىن زەردەلەۋ ارقىلى ءتىلدى مەڭگەرتۋگە قاتىستى ۇتىمدى ءادىس-تاسىلدەرىن ناسيحاتتاۋ. سونداي-اق وقىتۋشىلاردىڭ كاسىبي بىلىكتىلىگىن جەتىلدىرىپ, ەرەسەكتەرگە قازاق ءتىلىن ۇيرەتۋدىڭ ساپاسىن ارتتىرۋ, ءوزارا تاجىريبە الماسۋ, – دەدى ۇلان ەركىنباي.
بايقاۋدىڭ العاشقى كەزەڭىندە قاتىسۋشىلار ءوزىن جانە اۆتورلىق باعدارلاماسىن تانىستىردى. بۇدان سوڭ وتاندىق جانە شەتەلدىك تانىمال ادىسكەرلەردىڭ سويلەۋدىڭ 4 داعدىسىن ۇيرەتۋگە ۇسىنعان ءتيىمدى ءادىس-تاسىلدەرى مەن ادىستەمەلەرى, پىكىرلەرى تۋرالى سۇراقتار بەرىلدى. قاتىسۋشىلار ۇياشىقتا جاسىرىلعان قوس سۇراققا جاۋاپ بەردى. ءۇشىنشى بولىمدە ۇمىتكەرلەر وزگە ەتنوس وكىلدەرىنەن قۇرالعان توپقا وقۋ, جازۋ, تىڭداۋ جانە ايتۋ تۇرلەرىنە بايلانىستى تاپسىرما بەرىپ, 20 مينۋتتىق ءدارىس وتكىزدى.
قازىلار القاسىنىڭ شەشىمىمەن بايقاۋدىڭ باس جۇلدەسى مەن 500 مىڭ تەڭگەگە قىزىلوردا وبلىستىق تىلدەردى وقىتۋ ورتالىعىنىڭ مەملەكەتتىك ءتىل وقىتۋشىسى گۇلجانات دۇزەنوۆا لايىق دەپ تانىلدى. ءبىرىنشى ورىننىڭ 350 مىڭ تەڭگەلىك جۇلدەسىن جەتىسۋ وبلىستىق ء«تىل» وقۋ-ادىستەمەلىك ورتالىعىنىڭ مەملەكەتتىك ءتىل وقىتۋشىسى جانار ەلەسباەۆا يەلەندى. ەكىنشى ورىن مەن 250 مىڭ تەڭگە جۇلدەنى اقتوبە وبلىسىنداعى تىلدەردى وقىتۋ ورتالىعىنىڭ ادىسكەرى اقمارال نۇرجانوۆا مەن قاراعاندى وبلىسىنىڭ تىلدەردى وقىتۋ ورتالىعىنىڭ ادىسكەرى مۋنيرا اعىمباەۆا جەڭىپ الدى. ءۇشىنشى ورىننىڭ 200 مىڭ تەڭگەلىك جۇلدەسىنە جامبىل وبلىسى قورداي اۋداندىق تىلدەردى وقىتۋ ورتالىعىنىڭ قازاق ءتىلى وقىتۋشىسى التىناي ءاشىمحان, قوستاناي وبلىستىق ء«تىلدارىن» وبلىستىق تىلدەردى وقىتۋ ورتالىعىنىڭ ادىسكەرى گۇلميرا كىرىكپەنوۆا, اقمولا وبلىستىق وقۋ-ادىستەمەلىك ورتالىعىنىڭ وقىتۋشىسى ايمان جاقانوۆا لايىق دەپ تانىلدى. سونداي-اق بىرنەشە قاتىسۋشىعا ىنتالاندىرۋ سىيلىعى مەن 70 مىڭ تەڭگە بەرىلدى.
اتىراۋ وبلىسى
