بۇگىنگە دەيىن ءار جىلدارى ءار وڭىردەگى بىرنەشە وقۋ ورنى بىرلەسىپ وتكىزىپ كەلگەن سپورت دوداسىن بيىل جەكە ۇيىمداستىرىپ وتىرعاندىقتان, قازىر بۇكىل ستۋدەنتتەردىڭ, سپورتقا قۇمار جانداردىڭ نازارى ماڭعىستاۋ وڭىرىنە اۋىپ تۇر.
– بۇعان دەيىن ءار جىلعى سايىستارعا ستۋدەنتتەرىمىزدى بەلسەندى قاتىستىرا ءجۇرىپ, ءوزىمىز دە ۋنيۆەرسيادا الاۋى مەن جالاۋىن الۋعا ابدەن دايىندالدىق. تاعى ءبىر ەرەكشەلىگىمىز – الدىڭعى ۋنيۆەرسيادا باعدارلامالارىندا 30-دان اسا سپورت ءتۇرى بولسا, قازىرگى تاڭدا ولار 17-گە دەيىن ىقشامدالىپ, ەڭ نەگىزگى سپورت تۇرلەرى عانا تاڭداپ الىندى. بۇل دەگەنىمىز – ساننان ساپاعا كوشۋ. ياعني ۋنيۆەرسيتەتتەردەگى سپورتشىلاردىڭ كوپ اينالىساتىن سپورت تۇرلەرىنىڭ بەيىنىنە قاراي, ۇلتتىق عىلىمي-پراكتيكالىق دەنە تاربيەسى ورتالىعىمەن بىرلەسە وتىرىپ, دۇنيەجۇزىلىك ۋنيۆەرسيادانىڭ باعدارلاماسىنا باسىمدىق بەردىك. XII جازعى ۋنيۆەرسيادامىزدىڭ جەڭىمپازدارى الداعى تامىز ايىندا قىتايدىڭ چەندۋ قالاسىندا وتەتىن XXXII دۇنيەجۇزىلىك ۋنيۆەرسياداعا جولداما الادى. ءتىپتى وسى ويىنداردا جارقىراپ شىققان جاس جۇلدىزدار 2024 جىلعى پاريج وليمپياداسىنا دا قاتىسادى دەپ ۇمىتتەنەمىز. جالپى, سپورتتىق وليمپيادا, جازعى نەمەسە قىسقى ۋنيۆەرسيادا ويىندارىن وتكىزۋ – ۇيىمداستىرۋشى تاراپ ءۇشىن تەك ماقتانىش پەن باسەكە عانا ەمەس, تاربيە مەن تاجىريبە. ويتكەنى مۇنداي اۋقىمداعى بايراقتى باسەكەلەر وتكەن جەرلەردە بالالار مەن جاسوسپىرىمدەردىڭ قىزىعۋشىلىعى ارتىپ, ولار دا سپورتقا بەيىم بولىپ وسەدى. سالاماتتى ءومىر سالتى ناسيحاتتالىپ, دەنە شىنىقتىرۋ مادەنيەتى مەن بۇقارالىق سپورتقا سۇرانىس ارتادى. سوندىقتان بولاشاعىن ويلاعان ەل, كەلەشەگىن ويلاعان ايماق شىعىنى مەن اۋرەسىنە قاراماستان وسى باعىتتاعى يگى ىستەردەن ايانبايدى. اقتاۋ ۋنيۆەرسياداسىنىڭ ۇزدىكتەرى تۇركىستان شاھارىندا وتەتىن ءىى تۇركى ۋنيۆەرسياداسىنا دا قاتىسا الادى, – دەيدى ەسەنوۆ ۋنيۆەرسيتەتىنىڭ باسشىسى بەرىك احمەتوۆ.
ۋنيۆەرسياداعا ەلىمىزدەگى ەڭ ىرگەلى 55 ۋنيۆەرسيتەتتىڭ 3 مىڭنان استام ستۋدەنتى قاتىسىپ جاتىر. جارىس كەستەسى بويىنشا العاشقى ويىنداردى ۇستەل تەننيسى مەن ءجۇزۋ سپورتى باستاپ بەردى. بيىل ماڭعىستاۋ وبلىسىنا 50 جىل, ال اقتاۋ قالاسىنىڭ قۇرىلعانىنا 60 جىل تولۋىنا وراي ۋنيۆەرسيادانى جوعارى دەڭگەيدە وتكىزۋگە وبلىس جانە قالا اكىمدىكتەرى اتسالىسىپ, قولداۋ كورسەتتى. كەيىنگى جىلدارى اۋقىمىن ۇلعايتىپ, ءوز بازاسىندا زاماناۋي نىساندار قۇرىلىسىن سالۋعا قول جەتكىزگەن ۋنيۆەرسيتەتتە باس كورپۋستىڭ جانىنان 1 500 ورىندىق ستاديون قۇرىلىسى باستالدى. ۋنيۆەرسيادا ويىندارىندا ءجۇزۋ, ۆولەيبول, تاەكۆاندو, شاحمات, توعىزقۇمالاق ويىندارى وقۋ ورنىنىڭ قازىرگى سپورت كەشەنىندە, ۇستەل تەننيسى تەننيس ورتالىعىندا, ەركىن كۇرەس, دزيۋدو, گرەك-ريم, قازاق كۇرەسى, ايەلدەر كۇرەسى, جەڭىل اتلەتيكا جارىسى «ماڭعىستاۋ-ارەنا» سپورت كەشەنىندە, باسكەتبول, فۋتزال, بوكس «حالىق-ارەنا» سپورت سارايىندا, ال ۆولەيبول «باتىر» سپورت كەشەنىندە وتسە, بادمينتون «جاس قانات» سپورت كەشەنىندە, كاراتە «ۆولنا» سپورت كەشەنىندە ۇيىمداستىرىلادى. جاس بۋىندى بىلىممەن بىرگە سالاماتتى ءومىر سالتىنا, سپورتقا باۋلۋعا شاقىراتىن ءىس-شارا بولاشاقتا, ياعني جاڭا ستاديون قۇرىلىسى بىتكەن سوڭ وزگە دە سپورت سايىستارىن ءجيى وتكىزۋ جولىنداعى تاجىريبە جيناقتار العاشقى ساتىلاردىڭ ءبىرى بولماق.
ماڭعىستاۋ وبلىسى
