ينفراقۇرىلىمدىق الەۋەتتى دامىتۋدا بولات وتەمۇراتوۆ قورىنىڭ قولداۋىمەن اقپان ايىندا قۇنى 15 ملرد تەڭگە بولاتىن قورقىت اتا اۋەجايى تەرمينالىنىڭ قۇرىلىسى باستالدى. جالپى اۋماعى 7,5 مىڭ شارشى مەتر بولاتىن نىساننىڭ باس مەردىگەرى – «Elite Insaat» كومپانياسى مەن «Ava Construction» جاۋاپكەرشىلىگى شەكتەۋلى سەرىكتەستىگى. قالا اكىمى اسىلبەك شامەنوۆتىڭ ايتۋىنشا, وبلىستىڭ ەكونوميكالىق جانە ينۆەستيتسيالىق الەۋەتىن كوتەرۋگە سەپ بولادى دەگەن نىسان سوڭعى ۇلگىدەگى قۇرالدارمەن جابدىقتالادى.
– ساعاتىنا 250 جولاۋشىنى قابىلداي الاتىن تەرمينالدىڭ قاسبەتى اينەكپەن, تەمىر پانەلدەرمەن قاپتالادى. كەلەسى ايدىڭ ورتاسىندا تەمىر قاڭقانى تولىق قۇراستىرىپ بىتەمىز. بارلىق قۇرال-جابدىقتى ەۋروپا ەلدەرىنەن اكەلىپ ورناتامىز, – دەيدى تاپسىرىس بەرۋشى كومپانيا وكىلى ونۋر تەدجمەر.
بيىل قالادا كوشە قۇرىلىسى مەن جوندەۋگە باسا ءمان بەرىلىپ وتىر. وبلىس ورتالىعىن كۇرە جولمەن بايلانىستىراتىن بەيبارىس سۇلتان داڭعىلىن اباتتاندىرۋعا رەسپۋبليكالىق بيۋدجەتتەن 1 ملرد 741 ملن تەڭگە ءبولىنىپتى. قازىر «تەحوسناستكارەمسەرۆيس» جشس ماماندارى «پروفەكسپەرت ي ك» جشس جوباسى بويىنشا وبلىس اكىمدىگى الدىنداعى ءبىر شاقىرىمدىق اۋماققا سۋبۇرقاقتار سالىپ, جۇرت سەرۋەندەيتىن الاڭدار جاساۋعا كىرىسىپ كەتتى. بيىل ناۋرىز ايىندا باستالعان جۇمىس قاراشا ايىندا تياناقتالىپ, قولدانىسقا بەرىلۋگە ءتيىس. كەلەشەكتە مۇندا جارىق شامدار ورناتىلىپ, ويىن, سپورت الاڭدارى پايدا بولادى.
جۇمىس باستالعاندا وسى ماڭايدان الىنعان تال-داراقتىڭ جاعدايىنا الاڭداعاندار كوپ بولعان ەدى. قالالىق تۇرعىن ءۇي-كوممۋنالدىق شارۋاشىلىعى, جولاۋشىلار كولىگى جانە اۆتوموبيل جولدارى ءبولىمىنىڭ باسشىسى جەڭىسبەك فايزۋللاەۆتىڭ ايتۋىنشا, تالدار سول كۇيىندە مەكتەپتەر اۋلالارىنا اپارىپ وتىرعىزىلىپتى. وبلىس اكىمدىگى عيماراتىنىڭ الىنعان تەمىر شارباقتارى بىرقاتار ءبىلىم ۇيىمدارى نىساندارىن قورشاۋعا جۇمسالىپ, پايداعا اسقان.
داڭعىلدىڭ «قىزىلوردا – قۇمكول» كۇرە جولىنا دەيىنگى 4,2 شاقىرىمىن جاڭعىرتۋعا رەسپۋبليكالىق, وبلىستىق بيۋدجەتتەردەن 2 ملرد 349 ملن تەڭگە ءبولىنىپ, وسى سالاداعى تاجىريبەلى مەكەمە «ۋاد» جشس قازان ايىنا دەيىن تار جولدى كەڭەيتەدى. قالاداعى جىلۋ جۇيەسىن جوندەۋگە بيىل رەسپۋبليكالىق بيۋدجەتتەن 8,2 ملرد تەڭگە بولىنسە, سونىڭ اۋقىمدى بولىگى وسى داڭعىلداعى جىلۋ قۇبىرىن جەراستىنا تۇسىرۋگە جۇمسالادى ەكەن. وسى جىلى قالادا جول قۇرىلىسى مەن جوندەۋگە 12 ملرد تەڭگە قارالىپ وتىر.
– بۇل رەتتە ءبىز قالانىڭ شەت ايماقتارى تۇرعىندارىنىڭ تىلەگىن ەسكەرىپ وتىرمىز. ۇزىن سانى 244 كوشەنى قامتيتىن جوبا اياسىندا «شانحاي» بولىگىندە 26 كوشە اسفالتتالىپ, 39 كوشەگە تاس توسەلەدى. جاڭادان قالىپتاسىپ كەلە جاتقان بايتەرەك شاعىن اۋدانىندا 12 شاقىرىمدىق 7 كوشە سالىندى. جوبا شەڭبەرىندە وبلىس ورتالىعىنداعى 21 اۋلا اباتتاندىرىلادى, – دەيدى قالا اكىمى ا.شامەنوۆ.
قازىر شاھار حالقىنىڭ سانى قالاعا قاراستى اۋىلدىق وكرۋگ تۇرعىندارىن قوسقاندا 350 مىڭنان اسادى. ىرگەدەگى ەلدى مەكەندەگىلەردىڭ كوبى قالادا جۇمىس ىستەيتىندىكتەن تاڭەرتەڭ جانە كەشكە باتىس شاعىن اۋدانىنداعى كوپىر مەن قورقىت اتا كوشەسى بويىنداعى تەمىرجول استىنداعى وتكەل ماڭىندا كادىمگىدەي كەپتەلىس پايدا بولاتىنى بايقالىپ ءجۇر. وسىنى بولدىرماۋدىڭ امالى قولعا الىنىپتى. پويىزدىڭ وتكەنىن كۇتۋگە تاعاتى جەتپەي ء«اپ-ساتتە ارعى بەتكە شىعا سالام» دەگەن تالايلار اجال قۇشقان «شۇعىلا» شاعىن اۋدانى تۇسىنان جاياۋلار ءۇشىن تەمىرجولدى اسىپ وتەتىن وتكەل تۇسەدى. ەسكى وتكەل تۇسىندا 6 ملرد تەڭگەگە جەراستى جولى سالىنباق.
قالاداعى اباي داڭعىلىنىڭ بويىنداعى ۇيلەردىڭ قاسبەتى بيىل دا ارلەنىپ جاتىر. كاسىپكەرلەر مۇرىندىق بولعان باستاما اياسىندا بۇعان وسى جىلى سىرلاعانىڭ سىردىڭ جەلى مەن اپتابىنا شىداس بەرمەي, التى ايدان كەيىن اجارى كەتە باستايتىن بوياۋ ەمەس, ارناۋلى تەمىر قاپتاما قولدانىلماق. ءار كومپانيانىڭ شىعىنى شامامەن 15-30 ملن تەڭگەدەي بولادى. ءتىپتى 94 ملن تەڭگەگە ۇلكەن ءبىر تۇرعىن ءۇيدى قاپتاپ جاتقان كاسىپكەر دە بار.
– بۇرىن ءبىر ءۇيدى بوياۋعا 5-6 ملن تەڭگە جۇمسايتىنبىز. بىراق جىلعا جەتپەي ءوڭى كەتىپ قالاتىن. ال تەمىرمەن قاپتالعان ءۇي 20-30 جىلعا دەيىن سىر بەرمەك ەمەس. نەگىزگى جۇمىستى بىتىرگەسىن ءۇي اينالاسىن جارىقتاندىرۋعا كىرىسەمىز, – دەيدى «وريون لتد» جشس ديرەكتورىنىڭ ورىنباسارى اسحات جاڭابەرگەنوۆ.
قالا اكىمى اسىلبەك ومىربەك ۇلىنىڭ ايتۋىنشا, قازىر بۇل اۋماقتا «التاي مەتالل», «مەتالل پروفيل» جانە «وريون لتد» سەرىكتەستىكتەرى جۇمىس ىستەپ جاتىر. جالپى, جىل سايىن كاسىپكەرلەر وبلىس ورتالىعىن ساۋلەتتەندىرۋگە 10-12 ملرد تەڭگە كولەمىندە قارجى جۇمسايدى.
قازىر قىزىلوردا تازالىعى جاعىنان ەلىمىزدەگى ءبىراز وبلىس ورتالىقتارىنىڭ الدىندا تۇرعانى انىق. بۇل – ەڭ الدىمەن تالاپقا ساي جۇمىس ىستەپ وتىرعان «قىزىلوردا تازالىعى» مەكەمەسى جۇمىسشىلارىنىڭ ەڭبەگى. وسى جىلى شاھاردىڭ شىرايىن كەتىرمەي ۇستاپ وتىرعان مەكەمەگە 759 ملن تەڭگە ءبولىنىپ, وعان 20 ارناۋلى تەحنيكا الىندى. بىلتىر دا 11 كولىك العان مەكەمەنىڭ مۇمكىندىگى وسىلايشا ارتا ءتۇستى. قوعامدىق كولىكتەردە تەگىن جۇرەتىن مەكەمە جۇمىسشىلارىنىڭ جاعدايى – ءاردايىم بيلىك وكىلدەرىنىڭ نازارىندا. ولارعا ەڭبەك دەمالىسىنا شىققاندا دەمالىس ورىندارىنا تەگىن جولداما بەرىلەدى.
قىزىلوردا
