جەرگىلىكتى اكىمدىك پەن قۇرىلىس سالاسىنا جاۋاپتى قۇزىرلى مەكەمەلەر زاڭسىز قۇرىلىس تۇرعىزىپ جاتقانداردى باقىلاۋدان شىعارىپ العانى سونشالىق, تۇرعىندارعا جاڭا ۇيلەردەن پاتەر الاردا قۇرىلىستىڭ تالاپقا ساي سالىنعانىن تەكسەرىپ الۋدى ۇسىنىپ وتىر. وڭىرلىك ساۋلەت جانە قالا قۇرىلىسى باسقارماسىنىڭ ماماندارى تۇرعىندار الدانىپ قالماۋى ءۇشىن سانالى ارەكەت ەتۋى كەرەك دەپ سانايدى. بىلاي قاراساڭ, پارادوكس. ەكىنشى تۇرعىدان, تۇرعىن ءۇي قۇرىلىس سالاسى بۇگىندە الاياقتار قۇراتىن قارجى پيراميداسىنا ۇقساپ بارادى. ۇلەسكەر رەتىندە ءۇي تۇرعىزۋشى كومپانياعا ميلليونداعان تەڭگەڭىزدى قۇيىپ, سوڭىنان پاتەرسىز قالۋىڭىز بەك مۇمكىن. ونىڭ بىرنەشە ناقتى كورىنىسى جۋىقتا پاۆلوداردا قىلاڭ بەرىپ تە ۇلگەردى. ەستاي كوشەسى, 102 جانە قامزين كوشەسى, 102 مەكەنجايلارى بويىنشا تۇرعىزىلىپ جاتقان كوپقاباتتى ۇيلەردە ورەسكەل زاڭ بۇزۋشىلىقتار تىركەلىپ, سوت شەشىمىمەن قۇرىلىستاردى ىسىرىپ تاستاۋ تۋرالى قاۋلى شىعارىلدى.
– باسقارما ماماندارىمەن وڭىردەگى قۇرىلىستارعا مونيتورينگ جاسالىپ, زاڭدىلىعى باقىلاۋعا الىنىپ جاتىر. وكىنىشكە قاراي, كەيبىر قۇرىلىس نىساندارىنىڭ ەشبىر قۇجاتسىز سالىنىپ جاتقانى نازارىمىزعا ىلىكتى. جاڭادان تۇرعىزىلىپ جاتقان بىرنەشە عيماراتقا پاۆلودار قالاسى اكىمدىگىنىڭ تالاپ-ارىزى نەگىزىندە ولاردىڭ قۇرىلىسىن توقتاتىپ, ىسىرىپ تاستاۋ تۋرالى سوت شەشىمى قابىلداندى. قۇرىلىستى جۇرگىزىپ جاتقان فيرمالار ءوز بەتتەرىمەن شەشىم قابىلداپ, ءتيىستى ورگانداردان رۇقسات قاعازدارىن الماعان. ەستاي جانە قامزين كوشەلەرى بويىنداعى ەكى بىردەي تۇرعىن ءۇي قۇرىلىسى زاڭسىز دەپ تانىلدى. سوندىقتان ازاماتتار جەكەلەگەن قۇرىلىس جۇرگىزۋشى كومپانيالاردان پاتەر الۋدى جوسپارلاپ جۇرسە, ەڭ اۋەلى «تۇرعىن ءۇي قۇرىلىسىنا ۇلەستىك قاتىسۋ تۋرالى» زاڭىنا زەر سالىپ, عيماراتتاردىڭ تالاپقا ساي كەلەتىنىن تەكسەرىپ الۋى كەرەك. بۇل ءۇشىن جەرگىلىكتى اكىمدىككە حابارلاسسا بولادى, – دەيدى وڭىرلىك ساۋلەت جانە قالا قۇرىلىسى باسقارماسىنىڭ باسشىسى باقىتجان الىمعازينوۆ.
جالپى وبلىس ورتالىعىندا زاڭسىز سالىنىپ جاتقان 50-گە جۋىق قۇرىلىس بار بولسا, سونىڭ 30-دان استامى تۇرعىن ءۇي عيماراتتارىنا قاتىستى. بىلتىر سىبايلاس جەمقورلىققا قارسى ءىس-قيمىل قىزمەتى پاۆلودار قالالىق ساۋلەت جانە قالا قۇرىلىسى ءبولىمىنىڭ قىزمەتىنە قاتىستى جەمقورلىق تاۋەكەلدەرى بويىنشا تالداۋ جۇرگىزىپ كورگەن ەكەن. انتيكوردىڭ قىزمەتكەرلەرى مەكەمەدەگى قاتتاۋلى قۇجاتتاردىڭ بەتىن اشقاندا, ءوز كوزدەرىنە وزدەرى سەنبەپتى. مەكەمەدە ورەسكەل زاڭ بۇزۋشىلىقتاردىڭ كوبەيىپ كەتكەنى سونشالىق, ولاردىڭ اۋقىمىن ساناپ بىتپەيتىنىن ايتادى وبلىستىق سىبايلاس جەمقورلىققا قارسى ءىس-قيمىل دەپارتامەنتىنىڭ ماماندارى.
ءبىر قىزىعى, وزەن جاعالاۋىنان ەبىن تاۋىپ جەر الىپ, 4-6 قاباتتى ۇيلەر سالىپ جاتقانداردىڭ قاتارى ازايار ەمەس. كاسىپكەرلىكتى تەكسەرۋگە قاتىستى ءموراتوريدىڭ سالدارىنان قۇزىرلى ورگاندار قۇرىلىس فيرمالارىن تەكسەرە المايمىز دەپ بارماقتارىن شاينايدى. قىزىل جولاقتا تۇرعان قۇرىلىستار نەگىزىنەن ءتورت قاباتتى, 8 نەمەسە 12 پاتەرلى بولىپ تۇرعىزىلادى. ولاردى قارجىلاندىرىپ وتىرعان – جەكە ۇلەسكەرلەردىڭ ءوزى. الگى نىساندارعا رۇقسات قۇجاتىنىڭ قالايشا بەرىلىپ كەتكەنى دە بەيمالىم. انتيكور قىزمەتكەرلەرى مەملەكەتتىك ورگانداردا بۇل بەيباستاقتىققا جول بەرگەن مەملەكەتتىك قىزمەتشىلەردى انىقتاۋ قيىنعا سوعاتىنىن ايتادى. سوندىقتان قاداعالاۋعا, شەكتەۋ قويۋعا قاۋقارسىز.
«ادىلدىك جولى» رقب پاۆلودار وبلىستىق فيليالىنىڭ جەتەكشىسى نۇرگۇل قايىردەنوۆانىڭ ايتۋىنشا, ويىنا كەلگەنىن ىستەيتىن قۇرىلىس كومپانيالارى نەبىر قۇيتۇرقى ارەكەتكە باراتىن كورىنەدى. ەڭ اۋەلى سالىناتىن نىساننىڭ باستاپقى ماقساتىن وندىرىستىك نەمەسە ساۋدا نىسانى رەتىندە كورسەتەدى. مەملەكەتتىك ورگانداردان رۇقسات العان سوڭ ماقساتىن وزگەرتىپ, سالىناتىن نىسان اياق استىنان تۇرعىن ءۇي عيماراتى بولىپ شىعا كەلەدى. ال ونى تەكسەرىپ جاتقان ەشكىم جوق. مىسال ءۇشىن لۋگوۆايا كوشەسىندەگى قۇرىلىس ءجۇرىپ جاتقان ۋچاسكە 2021 جىلدىڭ قازان ايىندا كوكونىس قويماسى دەپ كورسەتىلگەن. ارادا ءۇش اي وتكەندە قالا اكىمدىگى ونى كوپقاباتتى تۇرعىن ءۇي قۇرىلىسىن سالۋعا بەرىلدى دەپ جوبانى بەكىتىپ جىبەرگەن.
تاعى ءبىر ماسەلە, قۇرىلىس كومپانيالارى مەملەكەتتىك ورگاندار تاراپىنان تىيىم سالىنعانىنا قاراماستان, ءبىراز ۋاقىت وتكەن سوڭ ۋچاسكەلەردى وزگەنىڭ اتىنا راسىمدەپ قۇرىلىستى قايتا جالعاستىرادى. 2021 جىلى جاز ايىندا تورايعىروۆ كوشەسى, 75/3 مەكەنجايىندا سالىنىپ جاتقان كوپقاباتتى تۇرعىن ءۇيدىڭ توبە بەتوندارى قۇلاپ, سول جەردە جۇمىس ىستەپ جاتقان وزبەكستاندىق 3 ازامات مەرتىككەن ەدى. وقيعادان سوڭ قۇزىرلى مەكەمەلەر قۇرىلىستى توقتاتىپ, ىسىرىپ تاستاۋ تۋرالى ۇيعارىمعا كەلگەن. كەيىن بۇل ماسەلەنىڭ بەتى جابىلىپ, تىنىشتىق ورنادى. سويتسەك, وتكەن جىلى الگى جەرگە ەكىنشى ءبىر فيرما كەلىپ تۇرعىن ءۇي تۇرعىزعان. بۇل اۋماق وتە تار, بالالارىمىز وينايتىن الاڭ جوق دەپ ەرەسەكتەر شاعىمدانىپ كەلگەن. الايدا ولاردىڭ شاعىمىنا جەرگىلىكتى اكىمدىك نازار اۋدارماعانعا ۇقسايدى. بۇگىندە الاقانداي عانا جەردە ءبىر ەمەس, ەكى بىردەي تۇرعىن ءۇي بوي كوتەرگەن. اۋماقتا بۇرىننان تۇرىپ جاتقان پاتەر يەلەرىنىڭ سوزىنشە, الگى جاڭا ۇيلەرگە جەرگىلىكتى پروكۋراتۋرا ورگاندارىنىڭ قىزمەتكەرلەرى دە ۇلەسكەر بولىپ وتىرعان كورىنەدى. ءتىپتى, 2021 جىلى قۇلاپ قالعان قۇرىلىستا دا ولاردىڭ ەنشىسى بولعان. قۇرىلىس كومپانياسىنىڭ وكىلدەرى جاعداي تىنشىعان سوڭ الدەبىرەۋلەردىڭ ىقپالىمەن ءوز ماقساتتارىن جالعاستىرىپ, ءۇيدى سالىپ شىققاندارىنا كوپشىلىك قايران قالىپ وتىر. بۇل قوس ءۇيدىڭ شىنىمەن زاڭدى سالىنعانىنا كۇمان مول. سوندىقتان سىبايلاس جەمقورلىققا قارسى ءىس-قيمىل قىزمەتى ماسەلەنى زەردەلەپ, ۇلەسكەرلەردىڭ شىن مانىندە كىمدەر ەكەنىن تەكسەرىپ كورسە, كوپ ماسەلە ايقىندالار ەدى دەپ ويلايمىز.
پاۆلودار
