اۋستراليا – وتە ازۋلى كوماندا. بۇل تۋرنيردە ولار جەتى رەت باس جۇلدەنى (1964, 1965, 1968, 1970, 1971, 1973, 1974 جىلدارى) ولجالاپ, 12 رەت فينالدا (1963, 1969, 1975-80, 1984, 1993, 2019, 2022) وينادى. وسى كورسەتكىش جاعىنان اۋستراليالىق ارۋلار تەك اقش (11 رەت) پەن چەحيادان (8 رەت) عانا قالىپ كەلەدى. جاسىل قۇرلىق وكىلدەرىنىڭ ەڭ ۇزدىك ويىنشىسى – ايلا تومليانوۆيچ. الەمدىك رەيتينگتە 46-ورىندا تۇرعان 30 جاستاعى حورۆاتيانىڭ تۋماسى 2014 جىلدان بەرى اتالعان ەلدىڭ تۋى استىندا ونەر كورسەتەدى. سوڭعى ءۇش جىل ارالىعىندا ول ەكى رەت ۋيمبلدوننىڭ جانە ءبىر رەت اقش اشىق بىرىنشىلىگىنىڭ شيرەك فينالىنا شىقتى. ءبىر ايتا كەتەرلىگى, ولاردىڭ ەڭ شەبەر ءتورت تەننيسشىسىنىڭ بارلىعى وزگە ەلدەردە دۇنيەگە كەلگەن. تومليانوۆيچتەن بولەك, كيمبەرلي بيرەلل (الەمنىڭ №111 راكەتكاسى) گەرمانيادا, داريا سەۆيل (№137) رەسەيدە جانە دجەيمس فۋرليس (№150) گرەكيادا تۋعان. ال ءوز ورەندەرى اراسىنان پريستسيللا حون (№152) مەن وليۆيا گادەكيدى (№153) اتاپ وتۋگە بولادى.
سلوۆەنيا قۇراماسىنىڭ ونداي تابىسىمەن ماقتانا المايتىنى انىق. دەسەك تە بۇل كوماندادا دا جاقسى ويىنشىلار بار. سولاردىڭ اراسىنان تامارا زيدانشەكتىڭ قارقىنى جامان ەمەس. 25 جاستاعى بۇرىمدى الەمدىك رەيتينگتە 110-ورىندى ەنشىلەپ وتىر. سلوۆەنيانىڭ وزگە وكىلدەرى ازىرگە توپ-200 تەننيسشىنىڭ قاتارىندا جوق.
ارينە, ولارعا قاراعاندا قازاقستان تەننيسشىلەرىنىڭ جاعدايلارى الدەقايدا جاقسى. كۇنى كەشە عانا ريمدەگى تۋرنيردە باس جۇلدەنى ولجالاعان ەلەنا رىباكينا WTA رەيتينگىندە ءتورتىنشى ورىنعا كوتەرىلدى. يۋليا پۋتينتسەۆا 61-ساتىعا جايعاستى. جۇپتىق سايىستاردا اننا دانيلينا تابىستى ونەر كورسەتىپ ءجۇر. ولاردان بولەك, ءبىر توپ جاس بۋىننىڭ وكىلدەرى جالىنداپ ءوسىپ كەلەدى. ءدال وسى قۇراممەن جەرلەستەرىمىز توپتىق تۋرنيردە سۇرىنبەۋگە ءتيىس.
ەستەرىڭىزگە سالا كەتەيىك, بيللي دجين كينگ كۋبوگىنىڭ فينالدىق باسەكەلەرى ۇستىمىزدەگى جىلدىڭ 7-12 قاراشا كۇندەرى يسپانيانىڭ سەۆيليا قالاسىندا وتەدى. جوعارىدا اتالعان كوماندالاردان بولەك, بۇل جارىستا فرانتسيا, كانادا, چەحيا, يتاليا, اقش, يسپانيا, گەرمانيا جانە پولشا قۇرامالارى شەبەرلىك بايقاسادى.
