جاستارعا ارنالعان باعدارلاما

سۋرەتتى تۇسىرگەن ەرلان ومار، «EQ»

باعدارلامانى جۇزەگە اسىرۋعا استا­نا­ قالاسى اكىمدىگى 1،5 ملرد تەڭگە، «وت­با­سى بانك» 1،5 ملرد تەڭگە ءبولىپ وتىر. ناتيجەسىندە، بيىل 35 جاسقا دەيىنگى 200 ادام باسپانالى بولادى. «وتباسى بانكىنىڭ» ورتالىق فيليالىنىڭ باسشىسى جانسۇلتان ماتاەۆتىڭ ايتۋىنشا، يپوتەكالىق نەسيەنىڭ شەكتى سوماسى 18 ملن تەڭگە شاماسىندا قالماق.

«بانك باعدارلاما قاتىسۋشىسىنىڭ تو­لەم قابىلەتتىلىگىن تەكسەرىپ، جىلدىق مول­­شەرلەمەسى 5 پايىزبەن (جتسم 5،2 %-دان­ باستاپ) جەڭىلدەتىلگەن يپوتەكالىق نە­سيە بەرەدى. العاشقى جارنا – 10%. ەلور­دا جاستارىنا بەرىلەتىن يپوتەكالىق نە­سيە­نىڭ ەڭ جوعارى سوماسى – 18 ملن تەڭگە، مەرزىمى 25 جىلعا دەيىن. ونىڭ كومەگىمەن العاشقى نەمەسە ەكىنشى نارىقتان، سونداي-اق «قازاقستان تۇرعىن ءۇي كومپانياسى» اق-نىڭ كەپىلدەمەسىمەن ۇلەستىك قاتىسۋ شارتى بويىنشا سالىنىپ جاتقان تۇرعىن ءۇي ساتىپ الۋعا بولادى»، دەدى بانك وكىلى.

ىلكىمدى ءىستىڭ يگىلىگىن مۇعالىمدەر، دارىگەرلەر، جوو جانە عزي وقىتۋشىلارى مەن قىزمەتكەرلەرى، جۋرناليستەر، مادەنيەت سالاسىنىڭ قىزمەتكەرلەرى، سپورتشىلار مەن جاتتىقتىرۋشى وقىتۋشىلار، الەۋمەتتىك قىزمەتكەرلەر، كوممۋنالدىق سالا قىزمەتكەرلەرى، پوليتسيا دەپارتامەنتى قىزمەتكەرلەرى، توتەنشە جاعدايلار دەپارتامەنتى قىزمەتكەرلەرى، تۇرعىن ءۇي كەزەگىندە تۇرعان جەتىم بالالار كورە الادى.

«الەۋەتتى قارىز الۋشىلاردىڭ ءتىزىمىن جەرگىلىكتى اتقارۋشى بيلىك جاسايدى. جالپى، 2021-2022 جىلدار ارالىعىندا باعدارلاماعا قاتىسۋعا 1 179 ادام ءوتىنىش بەردى. ونىڭ ىشىندە تولەم قابىلەتتىلىگىن راستاعان 184 جاس مامان باسپانالى بولدى. بەرىلگەن يپوتەكالىق كرەديت سوماسى
3،12 ملرد تەڭگەگە جۋىق»، دەپ ءسوزىن تۇ­يىندەدى ج.ماتاەۆ.

باعدارلامادا قاتىسۋشىنىڭ جانە ونىمەن بىرگە تۇراتىن وتباسى مۇشە­لە­رىنىڭ سوڭعى 1 جىل ىشىندە استانا قالاسىندا تۇراقتى تىركەلۋى ەسكەرىلەدى. سونداي-اق 10% مولشەرىندەگى العاشقى جارناسى، سوڭعى 5 جىلدا تۇرعىن ءۇيى بولماۋى قاجەت. تابىس كولەمى دە 6 ايدا كۇنكورىس دەڭگەيىنەن اسپاۋى كەرەك. بۇل شامامەن 243 402 تەڭگەنى قۇرايدى (زەينەتاقى جارناسى، جەكە تابىس سالىعى جانە باسقا دا مىندەتتى جارنالاردى قوسپاعاندا).