وزگەسى بىلاي تۇرسىن, وبلىس ورتالىعىنداعى كارىز تازارتاتىن قوندىرعىلار وتكەن عاسىردىڭ سوناۋ توقسانىنشى جىلدارى سالىنعاندىقتان, ابدەن توزىعى جەتىپ, قاۋساعان. توزىعى جەتكەن قوندىرعى سۋ تازالاپ قايدان وڭدىرسىن؟
قازىر وبلىستا نەبارى 13 كارىز تازارتۋ قوندىرعىسى بار. ششۋچينسك, دەرجاۆينسك, قوسشى قالاسى مەن اقمول كەنتىندە بيولوگيالىق تازارتۋ جۇرگىزىلەدى. بۇل ايماقتاردا پايدالانىلعان سۋدى اعىن سۋعا قوسۋعا ەكولوگتەر رۇقسات بەرگەن. وبلىستىق ەكولوگيا دەپارتامەنتى باسشىسىنىڭ ورىنباسارى ەرجان احمەتوۆتىڭ ايتۋىنا قاراعاندا, وبلىس ورتالىعىنداعى كارىز تازارتۋ قوندىرعىلارى ەسكىرگەن. ال ستەپنوگور قالاسىنداعى جاعداي مۇلدەم مۇشكىل. بۇل قالاداعى ەكى ستانسانىڭ ءبىرى كۇردەلى جوندەۋدى قاجەت ەتسە, ەكىنشىسى ىسكە مۇلدەم جارامسىز. دەمەك جاڭاسىن سالۋ كەرەك.
اعىن سۋعا قوسۋعا رۇقسات ەتىلگەن اقكول, اتباسار, ەرەيمەنتاۋ, ماكينسك قالالارى مەن شورتاندى كەنتىندەگى كارىز تازارتۋ قوندىرعىلارى تەك مەحانيكالىق جولمەن تازارتىلاتىن بولىپ شىقتى. سونداي-اق ساندىقتاۋ اۋدانىنداعى شاڭتوبە كەنتىندە دە مەحانيكالىق جولمەن تازارتىلىپ, ءارى قاراي بيوتوعاندا تابيعي جولمەن تازارتىلادى. وسى ارادا بۇدان باسقا ايماقتاردا كارىز تازارتۋ جۇيەسى مۇلدە جوق ەكەنىن ايتساق, جاعدايدىڭ قانشالىقتى ۋشىعىپ تۇرعانى تۇسىنىكتى بولار ەدى.
«8 اۋدان ورتالىعىندا كارىز تازارتۋ قوندىرعىسى مۇلدەم جوق. وسىعان بايلانىستى پايدالانىلعان سۋدى اعىن سۋعا قوسۋعا ەكولوگيا مەكەمەلەرى تاراپىنان رۇقسات ەتىلمەگەن», دەيدى ە.احمەتوۆ.
ءسوز اراسىندا كارىز جۇيەسى وندىرىستىك كورپۋستاردان, كوممۋنالدىق عيماراتتاردان ەلدى مەكەندەردىڭ اۋماعىنداعى اعىندى سۋدى بۇرۋعا, قابىلداۋعا جانە تازارتۋعا ارنالعان جۇيە ەكەنىن ايتا كەتەيىك. كارىز تازارتۋ قوندىرعىلارى شارۋاشىلىق-تۇرمىستىق سۋلاردى جانە ولارعا جاقىن ورنالاسقان اعىندى سۋلاردى بەلگىلەنگەن نورماعا سايكەس كەلتىرىلىپ, تازارتادى. مەحانيكالىق تازالاۋعا ارنالعان قۇرىلىستار رەتىندە قول تورلارى, قۇم توقتاتقىشتار قولدانىلادى. ال تازارتۋ مۇلدە جۇرگىزىلمەگەن ايماقتا ەكولوگيانىڭ قانشالىقتى زارداپ شەگىپ جاتقانىن كوز الدىڭا ەلەستەتۋ قيىن.
«2022-2023 جىلدارى اقمولا وبلىسىنىڭ بىرقاتار كوممۋنالدىق كاسىپورنىنىڭ قىزمەتىن تەكسەرۋ بارىسىندا مەملەكەتتىك-كوممۋنالدىق كاسىپورىنداردىڭ كارىز تازارتۋ قوندىرعىلارىنان لاس زاتتاردىڭ بەلگىلەنگەن قالىپتان اسىپ كەتكەنى انىقتالدى. قازىرگى ۋاقىتتا «كوكشەتاۋ سۋ ارناسى» مەن «ەرەيمەنتاۋ سۋ ارناسى» كاسىپورىندارى بويىنشا سوت پروتسەسى جۇرگىزىلىپ جاتىر», دەيدى وبلىستىق ەكولوگيا دەپارتامەنتى زەرتحانالىق-تالدامالى باقىلاۋ ءبولىمىنىڭ باسشىسى مارات شلىموۆ.
زامانىندا جەر ءجانناتى اتانعان وڭىردە كارىز سۋى تازارتىلماي, الدىمەن ادامعا, سودان سوڭ تامىلجىعان تابيعاتقا زاردابىن تيگىزىپ جاتىر. كارىز سۋىنا كوڭىل اۋداراتىن ەشكىم جوق ازىرگە.
اقمولا وبلىسى
