كوركىنە «اقىلى» ساي مەكەن

«بۋراباي» مەملەكەتتىك ۇلت­تىق تابيعي پاركى – پرەزيدەنت ءىس باسقارماسىنىڭ ۆەدومستۆولىق باعىنىستى ۇيىمدارىنىڭ ءبىرى. بۇل ايماقتىڭ ينفراقۇرىلىمىن دامىتۋ بارىسى تۋرالى پرە­زيدەنت ءىس باسقارۋشىسى ايبەك دادەباەۆ ءوزىنىڭ تەلەگرام ار­ناسىندا ەگجەي-تەگجەيلى ما­لىمەت بەردى.

– بىلتىر كۋرورتتىق ايماققا 711 مىڭنان اسا ادام كەلدى. بۇل – تەك ۇلتتىق پاركتىڭ باقىلاۋ-وتكىزۋ بەكەتىنەن وتكەندەردىڭ سانى. ال بيىلعى كورسەتكىش بىل­­تىرعىدان كەم تۇسپەيدى دەپ مە­جەلەنىپ وتىر. ارينە, ءتۋريزم­دى دامىتىپ جاتقان وڭىرگە دەمالۋ­شىلاردىڭ كوپ كەلگەنى جاقسى. دەگەنمەن ۇلتتىق پارك ءۇشىن بۇل ءبىرشاما جۇك ەكەنىن دە ەسكەرگەن ءجون. سوندىقتان «بۋراباي دامۋ» كاسىپورنى مەن «بۋراباي» ۇلتتىق پاركى بەلسەنىپ جۇمىس ىستەۋى كەرەك. بۇل, اسىرەسە, ءورت قاۋىپسىزدىگى مەن قورىقتى قورعاۋعا قاتىستى, – دەدى.

ونىڭ ايتۋىنشا, ءورتتى دەر كەزىندە انىقتاپ, تەز ارادا اۋىز­دىقتاۋدا سمارت-جۇيە ءوز تيىم­دىلىگىن كورسەتتى. ايتالىق, بىلتىر 21 ءورت وقيعاسى تىركەلىپ, جالىن شارپىعان جەر كولەمى 1,3 گەكتارمەن شەكتەلدى. ياعني ءتىلسىز جاۋدىڭ تارالۋ اۋماعى 2021 جىلمەن سالىستىرعاندا 8,6 ەسە ازايعان.

– بيىل جالعاسىن تاباتىن «Smart National Park Burabay» جوباسىنىڭ اياسىندا 5 وتكىزۋ-باقىلاۋ بەكەتىن اۆتوماتتاندىرۋ, قورشاعان ورتاعا مونيتورينگ جانە ساراپتاما جاسايتىن قوسىمشا قۇرالدار ورناتۋ, عىلىمي جۇمىستاردى كۇشەيتۋ جوسپارلانىپ وتىر. سونىمەن قاتار ءورتتى ەرتە انىقتايتىن قو­­­سىمشا 3 باقىلاۋ كامەراسى قويىلماق. وسىلايشا, با­قىلاۋ كامەرالارى بار 17 مۇ­نارا ار­قىلى «بۋراباي» پار­كىنىڭ عانا تەر­ريتورياسىن ەمەس, ىرگەلەس جات­قان قورعالاتىن اۋماقتى دا باقىلاپ وتىرادى. بۇل دەگەنىمىز – 377 166 گەكتار جەر, – دەدى ا.دادەباەۆ.

سونىمەن قاتار ول بيىل جازدا تۋريستەردىڭ ات شالدىرىپ, اياق سۋىتۋىنا ارنالعان قوسىمشا 35 بەكەت بوي كوتەرەتىنىن, ونىڭ ىشىندە 26 بەكەتكە وت جاعاتىن وشاق قويىلاتىنىن جەتكىزدى. ۇستەل, ساكى, وشاق, ءورت ءسوندىرۋ قۇ­رالدارى قويىلعان وسىنداي ورىندار ۇلكەن شاباقتى, كىشى شاباقتى كولدەرىنىڭ جاعاسىندا, سونداي-اق «تەرراسا پارك» قوناق­ۇيىنەن «اقبۋرا» كۋرورتىنا دەيىن سوزىلىپ جاتقان ۆەلوسيپەد جولىنىڭ بويىندا ورنالاسادى. ال وت جاعۋعا بولمايتىن, تەك تا­ماقتاناتىن, دەمالاتىن ورىن­دار «ايقۇلاق» مۇسىننەن باس­تاپ ابىلاي حان الاڭىنا دەيىنگى ۆەلوجولدىڭ بويىندا, كەنەسارى ۇڭگىرىنە جاقىن ماڭدا سالىنادى.

وسى ورايدا تۋريستەرگە ار­نالعان بەكەتتەردىڭ ناقتى كارتاسىن «بۋراباي دامۋ» جشس مەن «بۋراباي» مۇتپ سايتتارىنان, سونداي-اق ۇلتتىق پاركتىڭ ءموبيلدى قوسىمشاسىنان كورۋگە بولاتىنىن اتاپ وتكەن ءجون.