«سينگاپۋر پرەزيدەنتىنىڭ ورتالىق ازيا ەلدەرىنىڭ اراسىندا ەڭ اۋەلى قازاقستانعا كەلۋى – ءبىز ءۇشىن زور مارتەبە. ءسىزدىڭ قازاقستانعا ساپارىڭىز – تاريحي وقيعا. بۇل ساپار ءبىزدىڭ ءوزارا ءتيىمدى ىنتىماقتاستىعىمىزدىڭ جاڭا كەزەڭىنە جول اشاتىنىنا سەنىمدىمىن. قازاقستان سينگاپۋرمەن اراداعى قارىم-قاتىناستى ودان ءارى نىعايتا تۇسۋگە نيەتتى», دەدى مەملەكەت باسشىسى.
بيىل ناۋرىز ايىندا ەكى مەملەكەتتىڭ ءبىر-بىرىمەن ديپلوماتيالىق قاتىناس ورناتقانىنا 30 جىل تولدى. پرەزيدەنت وسى كەزەڭدە ەلدەرىمىز اراسىندا ءوزارا سەنىمدى ساياسي ديالوگ پەن بەلسەندى پارلامەنتارالىق بايلانىستار قالىپتاسقانىن اتاپ ءوتتى.
«قازاقستان مەن سينگاپۋر قاتىناستارىندا ساۋدا-ەكونوميكالىق جانە ينۆەستيتسيالىق ىنتىماقتاستىق ەرەكشە ورىن الادى. مەملەكەت باسشىسى بۇگىندە ەلىمىزدە 140-تان استام سينگاپۋرلىق كومپانيا مەن بىرلەسكەن كاسىپورىن جۇمىس ىستەپ جاتقانىنا نازار اۋداردى. سينگاپۋردىڭ قازاقستان ەكونوميكاسىنا قۇيعان ينۆەستيتسياسىنىڭ جالپى كولەمى 1,4 ميلليارد دوللاردان استى. ەكونوميكالىق قيىندىقتار مەن پاندەمياعا قاراماستان, بىلتىر ءوزارا ساۋدا-ساتتىق كولەمى 2 ميلليارد دوللارعا جۋىقتادى. بۇل وتە جاقسى ناتيجە دەپ سانايمىن», دەدى قاسىم-جومارت توقاەۆ.
مەملەكەت باسشىسى ەكىجاقتى ىنتىماقتاستىقتىڭ بەرىك نەگىزى قالانعانىنا توقتالدى. بۇل ورايدا جاقىندا قۇرىلعان قازاقستان-سينگاپۋر ىسكەرلىك كەڭەسى ماڭىزدى ءرول اتقارادى.
«سينگاپۋرعا تۋريست رەتىندە باراتىن ازاماتتارىمىزعا قولداۋ كورسەتەمىز. ارينە, ءسىزدىڭ ەلدەن كەلەتىن تۋريستەر مەن بيزنەسمەندەرگە ءبىزدىڭ ەسىگىمىز ءاردايىم اشىق. سوندىقتان قازاقستان ءسىزدىڭ ەلمەن تىعىز قارىم-قاتىناس جاساۋعا دايىن ەكەنىن تاعى دا ايتقىم كەلەدى», دەدى قاسىم-جومارت توقاەۆ.
ءوز كەزەگىندە حاليما ياكوب مەملەكەتتىك ساپارمەن كەلۋگە شاقىرعانى, سونداي-اق وزىنە جانە سينگاپۋرلىق دەلەگاتسياعا قوناقجايلىق كورسەتكەنى ءۇشىن قاسىم-جومارت توقاەۆقا العىس ايتتى. سينگاپۋر پرەزيدەنتى ەكى ەل اراسىنداعى ساياسي ديالوگ پەن ءوزارا ءتيىمدى سەرىكتەستىكتىڭ دەڭگەيىن جوعارى باعالادى.
«وتە دۇرىس ايتاسىز. بۇل – سينگاپۋر پرەزيدەنتىنىڭ قازاقستانعا, جالپى ورتالىق ازياعا العاشقى ساپارى. سوندىقتان بۇل – وتە ماڭىزدى ساپار. قازاقستان – ءبىز ءۇشىن ورتالىق ازيا ايماعىنداعى اسا ماڭىزدى سەرىكتەس. ويتكەنى ەلىڭىزدى, شىن مانىندە, ايماقتاعى كوشباسشى رەتىندە تانيمىز. بۇل ءبىز ءۇشىن وتە ماڭىزدى ءارى كوپ جىلدان بەرى جاقسى قارىم-قاتىناس جاساپ كەلەمىز. ءبىزدى تىعىز قارىم-قاتىناسىمىز عانا ەمەس, اشىقتىق جانە ءتارتىپ سەكىلدى قاعيداتتارعا بەرىكتىگىمىز دە بايلانىستىرادى. بۇل – قازاقستان ءۇشىن دە, ءبىز ءۇشىن دە ماڭىزدى», دەدى سينگاپۋر پرەزيدەنتى.
مەملەكەتتەر باسشىلارى ەكسپورت مۇمكىندىكتەرىن كەڭەيتۋ, ەلىمىزدىڭ اۋماعىندا بىرلەسكەن كاسىپورىندار اشۋ ماسەلەلەرى تۋرالى پىكىر الماستى. اتاپ ايتقاندا, الماتى ماڭىنداعى «G4City» اگلومەراتسياسىنىڭ قۇرىلىسىنا قاتىستى بىرلەسكەن ينۆەستيتسيالىق جوبانىڭ جۇزەگە اسىرىلۋ بارىسى, قارجى ينستيتۋتتارى اراسىنداعى ىنتىماقتاستىقتى كەڭەيتۋ ماسەلەلەرى تالقىلاندى.
سونىمەن قاتار, پرەزيدەنتتەر ترانسكاسپي حالىقارالىق كولىك ءدالىزى مەن ء«بىر جول – ءبىر بەلدەۋ» باستاماسىن ءبىر-بىرىمەن ساباقتاستىرۋ, سونداي-اق ەلدەرىمىز اراسىندا تىكەلەي اۋە قاتىناسىن اشۋ جونىندە ءوزارا ءتيىمدى ىنتىماقتاستىق پەرسپەكتيۆالارىن قاراستىردى.
