ولكە تاريحىن حاتتاپ, شەجىرەسىن شىنجىرداي تىزبەلەگەن گازەت – ەسكىنىڭ ءۇنى, كەشەگىنىڭ كوزى, بۇگىنگىنىڭ ءوزى مەن ءسوزى. شاڭىراعى استىندا نەبىر مارعاسقا جۋرناليستەر ەڭبەك ەتكەن, تالاي جاس جۋرناليست «تارىداي بولىپ كىرىپ, تاۋداي بولىپ» جەتىلىپ شىققان قارا شاڭىراق گازەتتىڭ تاعدىرى توقىراۋعا دا, تولىسۋعا دا تولى. باسىلىمعا ءار جىلدارى باسشىلىق ەتكەن ر.مۋسين, ج.وسپانوۆ, ك.مىرزاعۇلوۆ, ن.قىدىروۆ, س.ەسىموۆ, ج.بوشالاق, م.قوسىمباي سىندى قايراتكەر قالامگەرلەردىڭ جانسەبىل تىرلىگى, جانقيار ەرلىگى ارقاسىندا شايقالسا دا قۇلاماي, مۇڭايسا دا مۇقالماي جارتى عاسىرلىق عۇمىردى ارتتا قالدىردى. وسى اسقارالى اسۋىنا جاي جەتكەن جوق – ولكە ءومىرىن گازەت بەتىندە ورنەكتەپ, ءوز وقىرماندارىن قالىپتاستىرىپ, جاستاردى تاربيەلەي جەتتى. ا.سۇيەروۆ, م.قيباسوۆ, ت.مىڭجاس, ب.ۇمبەتوۆ, ءا.ساركەنوۆ, ە.نارەمباەۆا, گ.ناۋىرشا, ۆ.قوزىباقوۆا, ءۇ.جالەكە, وزگە دە كوپتەگەن قالامى جۇيرىك جۋرناليست گازەتتە ماقالا كورىگىن قىزدىردى.
وبلىستىق گازەتتىڭ مەرەيتويىنا اقپارات جانە قوعامدىق دامۋ ءمينيسترى د.قىدىرالى, پارلامەنت سەناتى مەن ءماجىلىسىنىڭ دەپۋتاتتارى, ماڭعىستاۋ وبلىسىنىڭ اكىمى ن.نوعاەۆ, ەلىمىزدىڭ وزگە وڭىرلەرىنەن مەدياحولدينگ باسشىلارى مەن جۋرناليستەر كەلدى. رۋحاني شارا بارىسىندا اقتاۋدا «ماڭعىستاۋ» گازەتىنىڭ ءفوتوتىلشىسى, قىرىق جىلدان استام ۋاقىت ولكە ءومىرىن تاسپاعا ءتۇسىرۋ ارقىلى ءوڭىر فوتوشەجىرەسىن حاتتاعان باسىلىم ارداگەرى ت.قۇسايىننىڭ شىعارماشىلىق كورمەسى ءوتتى.
«بۇل كورمە الداعى ۇلكەن اۋقىمدى كورمەنىڭ باستاۋى بولعالى وتىر. ۇزاق جىلدان بەرى وسىنداي تۋىندىلاردى كوپشىلىكتىڭ تاماشالاۋىنا ۇسىنۋدىڭ ورايى كەلمەي ءجۇر ەدى. الدا ەرتەدەگى سارعايعان سۋرەتتەردى دە جيناقتاپ, ءوڭىر تۇرعىندارى كۋا بولادى دەگەن سەنىمدەمىن. كورمەدە قويىلعان سۋرەتتەردىڭ كوبى ىرىكتەلىپ الىندى. مىسالى, كەيبىر تاقىرىپتا تۇسىرىلگەن سۋرەتتەر توپتاماسىنان بولەك كورمە وتكىزۋگە بولادى. سول ارقىلى كورەرمەن ماڭعىستاۋدىڭ اشىق اسپان استىنداعى مۇراجاي ەكەنىنە كوز جەتكىزە تۇسەر ەدى. ۋاقىتپەن بىرگە تۇلەپ كەلە جاتقان مۇنايلى ولكەدەگى ەستەن كەتپەس, ۇمىتىلماس ساتتەرگە تالاي مارتە كۋا بولىپ, تاسپالادىم. سولاردىڭ كورگەن جۇرت وزگەشە اسەرگە بولەنەدى دەگەن سەنىمدەمىن», دەدى تالانت قۇسايىن.
شارا بارىسىندا «ماڭعىستاۋ» گازەتىنىڭ 50 جىلدىعىنا جانە «ماڭعىستاۋ-مەديا» جشس-نىڭ قۇرىلعانىنا 10 جىل تولۋىنا وراي ۇيىمداستىرىلعان شاعىن مۇراجاي اشىلدى.
«كەزىندە مەدياحولدينگتىڭ قۇرامىندا ەكى وبلىستىق, ەكى قالالىق, بەس اۋداندىق گازەت پەن «شەرقالا» جۋرنالى بولاتىن. قازىر «ماڭعىستاۋ-مەديا» جشس ەكى وبلىستىق گازەتتى قامتيدى: «ماڭعىستاۋ» جانە «وگني ماڭعىستاۋ», قالالىق «جاڭا وزەن» گازەتى, بەس وبلىستىق گازەت جانە mangystaumedia.kz سايتى بار. ء«بىز ءاربىر باسىلىمدى, ونىڭ تاريحىن, اتاۋلارىنىڭ قالاي وزگەرگەنىن, شىققان باستاۋىندا كىمدەر تۇرعانىن كورسەتۋگە تىرىستىق. مۇراجايعا قويىلعان بارلىق جادىگەردى رەداكتسيانىڭ وزدەرى, جۋرناليستيكا ارداگەرلەرى نەمەسە ولاردىڭ تۋىستارى سىيعا تارتتى», دەيدى «ماڭعىستاۋ-مەديا» جشس ديرەكتورى گۇلميرا ابىشەۆا.
مۇراجايداعى ەڭ كونە جادىگەر – 1931 جىلى شىعارىلا باستاعان, لاتىن قارپىمەن باسىلعان «كولحوز جولى» گازەتىنىڭ 1934 جىلعى سانى, سونداي-اق «ستالين جولى» گازەتىنىڭ 1942 جىلعى ءنومىرى. مۇراجاي ەكسپوناتتارى اراسىندا جازۋ ماشينكالارى, ءار جىلدارداعى فوتواپپاراتتار, ماگنيتوفوندار, جۋرناليستيكا ارداگەرلەرىنىڭ قىزمەتتىك كۋالىكتەرى مەن جەكە زاتتارى, ءتۇرلى ءىس-شارادان, رەداكتسيانىڭ جۇمىس كۇندەرى مەن مەرەكەلەرىنەن فوتوسۋرەتتەر, ءارتۇرلى مەملەكەتتەردىڭ كونسۋلدىقتارىنىڭ سىيلىقتارى قويىلعان جانە كاسىبي سالاداعى جۋرناليستەردىڭ ماراپاتتارى, سپورتتىق جەتىستىكتەرى ءۇشىن كۋبوكتار مەن مەدالدار بار.
كەڭ اۋقىمدا اتالىپ ءوتىپ جاتقان شارا «دوستىق» ۇيىندە سالتاناتتى جيىنمەن جالعاستى.
جيىندا ايماق باسشىسى ن.نوعاەۆ ءسوز سويلەپ, باسىلىمنىڭ قوعامداعى ورنى مەن مىندەتى تۋرالى كەڭ بايانداپ, گازەت ۇجىمىنا ساتتىلىك تىلەدى. سونداي-اق ءسوز العان قازاقستان رەسپۋبليكاسى اقپارات جانە قوعامدىق دامۋ ءمينيسترى د.قىدىرالى ماڭعىستاۋ جۇرتشىلىعىن وبلىس ءۇنى بولعان «ماڭعىستاۋ» گازەتىنىڭ 50 جىلدىعىمەن قۇتتىقتاپ, بۇگىنگى قازاق ءباسپاسوزى, العا قويعان مىندەتتەر تۋرالى وي ءبولىستى.
سالتاناتتى جيىندا گازەت تاريحى جايلى بەينەفيلم كورسەتىلىپ, ارداگەر جۋرناليستەرگە قۇرمەت كورسەتىلدى. قالامى جۇيرىك جۋرناليستەر مەن گازەت قىزمەتكەرلەرى وبلىس اكىمىنىڭ, اقپارات جانە قوعامدىق دامۋ ءمينيسترىنىڭ, سەنات جانە ءماجىلىس توراعالارىنىڭ قۇرمەت گراموتالارىمەن, العىسحاتتارىمەن ماراپاتتالىپ, ۇجىمعا ۇيىمدار مەن مەكەمەلەردىڭ قۇتتىقتاۋ حاتتارى تابىستالدى.
ماڭعىستاۋ وبلىسى
