«اگرارلىق نەسيە كورپوراتسياسى» بيزنەس سالاسىندا ءوز يدەيالارىن جۇزەگە اسىرا باستاعان جاستاردى قولداۋ ماقساتىندا جىلدىق مولشەرلەمەسى 2,5 پايىزدان اسپايتىن نەسيە بەرۋدى باستاپ كەتتى. بەس ملن تەڭگەگە دەيىن بەرىلەتىن ارزان نەسيەگە كەرەكۋدە ءۇمىتتى ازاماتتار كوپ. قارىز الۋشى كەپىلگە جىلجىمايتىن م ۇلىك, اۋىلشارۋاشىلىعى ءۇشىن ماڭىزعا يە جەر تەلىمدەرىن, ارنايى تەحنيكالاردى قويا الادى.
ەرەكشەلىگى, قاراجات بەس جىلعا دەيىنگى مەرزىمگە كەز كەلگەن ماقساتقا بەرىلە بەرەدى. ال مال شارۋاشىلىعىن دامىتقىسى كەلەتىندەر ءۇشىن نەسيەنى تولەۋ مەرزىمى جەتى جىلعا دەيىن ۇزارتىلعان. بۇعان قوسا نەگىزگى قارىز بەن سىياقىنى قايتارۋ بويىنشا جەڭىلدىك مەرزىمى قاراستىرىلعان. وعان شاعىن نەسيەنى تولەۋ مەرزىمىنىڭ ۇشتەن ءبىر بولىگىنەن كوپ ەمەس ۋاقىت بەلگىلەنەدى.
وڭىرلىك جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ مالىمەتىنە سۇيەنسەك, جۋىقتا جاستاردى جەڭىلدىكتى شاعىن نەسيەلەندىرۋ بويىنشا وبلىستىق كوميسسيانىڭ وتىرىسى ءوتىپ, وندا بيزنەس جوبالار ىرىكتەلگەن. بۇگىنگە دەيىن 20 ۇمىتكەردەن ءوتىنىم ءتۇسىپتى. جاس كاسىپكەرلەر جولاۋشىلار تاسىمالىن ۇيىمداستىرۋ, كيىم دۇكەنى, جىلقى, سيىر جانە ۇساق مال ءوسىرۋ بويىنشا ءوز جوبالارىن ۇسىنعان.
كاسىپكەرلىكتى دامىتۋدىڭ ۇلتتىق جوباسى بويىنشا 2,5 پايىزدىق شاعىن نەسيەلەر بيزنەسىن جاڭادان باستاعىسى كەلىپ وتىرعاندارعا نەمەسە بيزنەسىن جۇرگىزىپ جاتقان جاستارعا بەرىلەدى. كونكۋرستىق جۇيە ولاردىڭ ىشىندەگى الەۋەتتىلەرىن تاڭداپ الادى. 2023 جىلعا وڭىرگە 785 ملن تەڭگە بولىنگەن. ماماندار بۇل سوما 157 جاس كاسىپكەردى قامتۋعا جەتكىلىكتى دەپ وتىر.
نەگىزى كاسىپكەرلىكتى دامىتۋدىڭ ۇلتتىق جوباسى بۇل نەسيەدەن بولەك كاسىپكەرلىكتەردىڭ وزگە دە ساناتتارىن قارجىلاندىرۋعا, نەسيە پايىزدارىن ازايتۋعا جاعداي تۋدىرۋدا. مىسالى, جۇك تاسىمالىمەن اينالىساتىن پاۆلودارلىق ناريمان مۋسين العاشقى كوممەرتسيالىق كولىكتى نەسيەگە ساتىپ الدى. ول كولىكپەن جول قۇرىلىسىنا قاجەت بيتۋم تاسىمالدايتىن جوسپارى بار. ىسكەرلىك بايلانىستاردىڭ كەڭەيۋىنە بايلانىستى كاسىپكەر «كاسىپكەرلىكتى دامىتۋدىڭ 2021-2025 جىلدارعا ارنالعان ۇلتتىق جوباسى» باعدارلاماسى بويىنشا تراكتور ساتىپ الۋعا ءوتىنىش بىلدىرگەن. ءسويتىپ, ەكىنشى دەڭگەيلى بانكتەن جىلدىق مولشەرلەمەسى 21,75 پايىزبەن نەسيە راسىمدەيدى. سايىپ كەلگەندە كاسىپ يەسى بۇل مولشەرلەمەنىڭ نەبارى 6 پايىزىن عانا تولەيدى. قالعان ايىرمانى مەملەكەت سۋبسيديالاپ بەرەدى. نەسيەنى راسىمدەۋ كەزىندە ناريمان سايلاۋ ۇلىنىڭ كەپىلگە قويعان مۇلكى جەتكىلىكسىز بولىپ شىققان. «دامۋ» قورى وعان كومەككە كەلىپ, جەتپەگەن كەپىلدىڭ ورنىن تولتىردى.
«بۇگىندە ءبىزدىڭ بيزنەسىمىزدىڭ تۇراقتى تۇتىنۋشىلارى بار. جۇمىسىمىزدا ارنايى تەحنيكالار وتە قاجەت. ءبىزدىڭ بيزنەستە ءبىر ورىندا تۇرىپ قالۋعا بولمايدى, ۇنەمى شەكارانى كەڭەيتىپ وتىرعان ماڭىزدى. ەڭ باستىسى, كولىكتەردىڭ جاعدايىن تۇراقتى قاداعالاپ, كليەنتتىك بازانى تولتىرۋىمىز كەرەك. كەلەشەكتە جاعدايىمىز جەتىپ جاتسا تاعى دا ارنايى كولىك قۇرالدارىن ساتىپ الاتىن جوسپارىمىز بار», دەيدى ول.
پاۆلودار وبلىسى
