اقپارات جانە قوعامدىق دامۋ مينيسترلىگىنىڭ قولداۋىمەن اتالعان باستاما بيىل ءساتتى جۇزەگە اسىپ جاتىر. «تاۋەلسىزدىك ۇرپاقتارى» جوباسىنىڭ گرانتىن ۇتىپ العان قازاق ۇلتتىق ونەر ۋنيۆەرسيتەتى كوللەدجىنىڭ ستۋدەنتى ەرتاي مامىربەكوۆ اتالعان وقۋ ورنىنداعى ستۋدەنت دوستارىمەن «Juzz band» اتتى ۆوكالدى اسپاپتىق توپ قۇرىپ, تۇڭعىش كونتسەرتتەرىن بەرىپ تە ۇلگەردى.
وتكەن اپتا سوڭىندا قازاق ۇلتتىق ونەر ۋنيۆەرسيتەتىنىڭ ەركەعالي راحماديەۆ اتىنداعى زالىندا العاشقى كونتسەرتىن ۇسىنعان كوللەدج ستۋدەنتتەرىنىڭ ونەرىن كوپشىلىك تاماشالادى. كونتسەرتكە اقپارات جانە قوعامدىق دامۋ مينيسترلىگىنىڭ جاستار جانە وتباسى ىستەرى بويىنشا كوميتەتىنىڭ توراعاسى قايرات بايمۋلدينوۆ كەلىپ, جاستارعا ءسات ساپار تىلەدى.
جاڭادان قۇرىلعان جاس تالاپتاردىڭ العاشقى اياق الىستارى جامان ەمەس. توپتى قۇرۋشى قازۇوۋ كوللەدجىنىڭ ءى كۋرس ستۋدەنتى ەرتاي مامىربەكوۆ – بارابانشى, قاسىنداعى سانجار سماعۇلوۆ – پيانيست, دانيال يروماشۆيلي – ساكسوفونشى, ءاسانالى ليان مەن ەرنۇر جانحان – گيتاراشىلار.
«تاۋەلسىزدىك ۇرپاقتارى» جوباسىنىڭ ونەر جانە مادەنيەت سالاسىنا 70-تەن اسا ۇمىتكەر قاتىسىپ, ەرتاي مامىربەكوۆ ۆوكالدىق-اسپاپتىق انسامبل قۇرۋ جانە كونتسەرت وتكىزۋ يدەياسىمەن جەڭىپ الدى. بۇل ءبىزدىڭ ۋنيۆەرسيتەت ءۇشىن ۇلكەن ماقتانىش قانا ەمەس, وقۋ وردامىزدىڭ 25 جىلدىعىنا تارتۋ بولدى», دەدى قازاق ۇلتتىق ونەر ۋنيۆەرسيتەتىنىڭ پرورەكتورى عايني مۇحتاروۆا قۇتتىقتاۋ سوزىندە.
كونتسەرتتە ءانسامبلدىڭ اسپاپتىق ورىنداۋلارىنا ەسترادا ماماندىعىنىڭ ستۋدەنتتەرى قاتىسىپ, كوبىنە اعىلشىنشا, فرانتسۋزشا اندەر شىرقادى. اراسىندا عانا قازاق تىلىندە بىرەر ءان ورىندالدى. جاستار مۇنداي ولقىلىقتىڭ ورنىن كەيىنگى كونتسەرتتەرىندە تولتىرسا قۇبا-قۇپ.
