ءاليحان سمايىلوۆتىڭ ايتۋىنشا, ەۋرووداق – قازاقستاننىڭ ساۋدا-ساتتىق سالاسىنداعى ەڭ ءىرى جانە ماڭىزدى سەرىكتەستەرىنىڭ ءبىرى, ەلىمىزدىڭ سىرتقى ساۋداسىنىڭ شامامەن 30%-ى ەۋرووداقتىڭ ۇلەسىنە تيەسىلى. ماسەلەن, وتكەن جىلى تاۋار اينالىمىنىڭ ءوسىمى 38%-دان اسىپ, شامامەن $40 ملرد بولدى. بيىل دا بۇل كورسەتكىش قارقىندى ءوسىپ كەلەدى: 3 ايدا ساۋدا كولەمى 12,5%-عا ۇلعايىپ, $10 ملرد-تان استى. وسى ورايدا قازاقستان ەۋروپاعا جالپى قۇنى شامامەن $2,3 ملرد بولاتىن 175 تاۋار پوزيتسياسى بويىنشا ەكسپورتتى ۇلعايتۋعا دايىن.
ء«بىز ەۋروپالىق وداقپەن ىنتىماقتاستىقتىڭ ساپاسىن ارتتىرۋعا باسىمدىق بەرەمىز جانە قازاقستان مەن ەۋروپا اراسىنداعى سەنىم مەن قۇرمەتكە نەگىزدەلگەن ءوزارا ءىس-قيمىلدى ءارى قاراي نىعايتۋعا نيەتتىمىز», دەدى پرەمەر-مينيستر.
سونىمەن قاتار, ۇكىمەت باسشىسى قازاقستان مەن ەو اراسىنداعى ينۆەستيتسيالىق ىنتىماقتاستىقتىڭ جاڭا دەڭگەيگە كوتەرىلىپ جاتقانىن اتاپ ءوتتى. اتاپ ايتقاندا, وتكەن جىلى ەۋرووداقتان قازاقستان ەكونوميكاسىنا تارتىلعان تىكەلەي ينۆەستيتسيالار كولەمى شامامەن 23%-عا ءوسىپ, $12,5 ملرد بولدى, بۇل – سوڭعى 10 جىلداعى رەكوردتىق كورسەتكىش.
ء«بىز ينۆەستيتسيالىق ىنتىماقتاستىقتى ودان ءارى كەڭەيتۋ ءۇشىن قولدا بار مۇمكىندىكتەردىڭ بارلىعىن ىسكە قوسۋعا مۇددەلىمىز», دەدى ءاليحان سمايىلوۆ.
ءوز تاراپىنان ۆالديس دومبروۆسكيس ەۋرووداق پەن قازاقستان اراسىنداعى قارىم-قاتىناستار وتە سەرپىندى دامىپ كەلە جاتقانىن, وعان كەڭەيتىلگەن ارىپتەستىك پەن ىنتىماقتاستىق تۋرالى كەلىسىم جانە شيكىزات, اككۋمۋلياتورلىق باتارەيالار جانە جاڭارتىلاتىن سۋتەكتىڭ تۇراقتى قۇن تىزبەكتەرى جونىندەگى مەموراندۋم ىقپال ەتەتىنىن اتاپ ءوتتى.
«سونىمەن قاتار, ءبىز ورتالىق ازيا مەن ەۋروپالىق وداق ەلدەرى اراسىندا جۇك تاسىمالداۋدىڭ جاڭا جولدارى مەن مۇمكىندىكتەرىن دامىتۋعا مۇددەلىمىز. ول ءۇشىن ينۆەستورلاردى وڭىردەگى جوبالارعا تارتۋ قاجەت, بۇل تاسىمالداۋ كەزىندە كەدەرگىلەردى جويۋعا جانە ينفراقۇرىلىمدى دامىتۋعا ىقپال ەتەدى», دەدى ۆالديس دومبروۆسكيس.
كەزدەسۋ قورىتىندىسى بويىنشا شيكىزات, اككۋمۋلياتورلىق باتارەيالار جانە جاڭارتىلاتىن سۋتەكتىڭ تۇراقتى قۇن تىزبەكتەرى سالاسىنداعى ستراتەگيالىق ارىپتەستىك تۋرالى قر مەن ەو اراسىنداعى ءوزارا تۇسىنىستىك تۋرالى مەموراندۋمدى ىسكە اسىرۋ بويىنشا جول كارتاسىن بەكىتۋ ءراسىمى ءوتتى.
ەسكە سالا كەتەيىك, وسى مەموراندۋمعا وتكەن جىلى بۇۇ-نىڭ كليماتتىڭ وزگەرۋى جونىندەگى «COP-27» كونفەرەنتسياسىندا قر پرەمەر-ءمينيسترى ءاليحان سمايىلوۆ پەن ەۋروپالىق كوميسسيانىڭ پرەزيدەنتى ۋرسۋلا فون دەر ليايەن قول قويعان بولاتىن.
سونىمەن قاتار, قازاقستاندا 9 ملن ەۋرو سوماسىنا جوبالاردى ىسكە اسىرۋدى كوزدەيتىن «قر-ەو ىنتىماقتاستىق قۇرالى» قارجىلىق كەلىسىمىنە قول قويىلدى.
كەزدەسۋ قورىتىندىسى بويىنشا ءاليحان سمايىلوۆ پەن ۆالديس دومبروۆسكيس بىرگە باق-قا مالىمدەمە جاسادى.
