«ەنەرگەتيكا سالاسىنداعى, ونىڭ ىشىندە, مۇناي-گاز سەكتورىنداعى قارىم-قاتىناستى دامىتۋعا مول مۇمكىندىك بار. ءبىز مۇناي ەكسپورتىن كوبەيتۋگە مۇددەلىمىز. سول ءۇشىن «قازاقستان – قىتاي» مۇناي قۇبىرىنىڭ تاسىمال مۇمكىندىگىن ارتتىرۋدى جوسپارلاپ وتىرمىز. كۇن تارتىبىندە قولدانىستاعى «اتىراۋ – كەڭقياق», «كەڭقياق – قۇمكول» مۇناي قۇبىرلارىنىڭ وتكىزۋ مۇمكىندىگىن ارتتىرۋ ماسەلەسى تۇر. قازىر مۇناي ونىمدەرىن تۇتىنۋ كولەمى ۇدايى ءوسىپ كەلەدى. سوندىقتان, شىمكەنت مۇناي وڭدەۋ زاۋىتىنان شىعاتىن ءونىم كولەمىن جىلىنا 6-دان 12 ميلليون تونناعا دەيىن كوبەيتۋدى كوزدەپ وتىرمىز», دەدى پرەزيدەنت.
سونداي-اق ول گاز وڭدەۋ قۋاتىن ارتتىرۋ جانە گاز تاسىمالداۋ جۇيەسىن جەتىلدىرۋ قازاقستان ءۇشىن باسىم باعىت ەكەنىن ءسوز ەتتى.
ء«بىز ءۇشىن «بەينەۋ – بوزوي – شىمكەنت» ماگيسترالدى گاز قۇبىرىنىڭ ەكىنشى تارماعىن سالۋ وتە ماڭىزدى. قاشاعان كەنىشىندە جىلىنا 4 ميلليارد تەكشە مەتر گاز وڭدەيتىن زاۋىت قۇرىلىسىنا دا باسا ءمان بەرەمىز. قىتايلىق دوستارىمىز ايماقتاعى وسى ماڭىزدى جوبالارعا قولداۋ كورسەتۋدى جالعاستىرادى دەپ سەنەمىز», دەدى ق.توقاەۆ.
