2019 جىلى وزبەكستاننان قونىس اۋدارىپ كەلگەن سەگىزباي ءجۇنىسوۆ بۇگىنگە دەيىن رۋدنىيداعى سوكولوۆ-سارىباي كەن بايىتۋ كومبيناتىندا توكار بولىپ جۇمىس ىستەپ كەلگەن. ەندى جەكە كاسىبىن ىسكە قوسىپ, ءارى قاراي دامىتۋ ءۇشىن جۇمىسىنان شىعىپ جاتىر. كىر سابىن شىعاراتىن قۇرىلعىنى نەسيەگە الىپتى. 380 ۆولتپەن جۇمىس ىستەيتىن قۇرىلعى ساعاتىنا 500-گە دەيىن ءونىم شىعارا الادى. الايدا بىزگە ساعاتىنا 300 كىر سابىن شىعارساق تا جەتكىلىكتى دەيدى كاسىپكەر. «ۇشقۇدىق» كىر سابىنىنىڭ سالماعى – 200 گرامم, قۇرامىنداعى كىر اشاتىن مايلى قىشقىلدىڭ ۇلەسى 72 پايىزعا جەتەدى.
كاسىپكەر العاش 100 سابىن شىعارىپ, قالاداعى «باق-باق» بازارىنا قويىپ كورگەن ەكەن, دەمدە ءوتىپ كەتىپتى. التىن كەنىنە باي ۇشقۇدىقتان اۋعان قانداستاردىڭ دەنى بۇگىندە رۋدنىيدىڭ ماڭايىنا شوعىرلانعان. «ۇشقۇدىق» سابىنىن, اسىرەسە, سول كىسىلەر ىزدەيدى ەكەن.
– بازاردا 250 تەڭگەدەن ساتىلىپ ەدى. قازىر جوق بولىپ كەتتى. ءوزىمىز ءبىر-ەكەۋىن الىپ, پايدالانىپ كوردىك. سىرتتان كەلىپ جاتقان سابىنداردىڭ كوبى ۆاننادا ءبىر كۇن قالدىرىپ كەتسەڭ, ەرىپ بىلجىراپ كەتەدى. ال بۇل سابىن سۋدا قالىپ كەتسە دە ەرىمەيدى. جاقسى كوپىرەدى, كىردى دە جاقسى اشادى, دەيدى رۋدنىي قالاسىنىڭ تۇرعىنى سۇلۋشاش ءومىروۆا.
سەگىزباي وزبەكستاندا ءبىراز جىل سابىن شىعاراتىن كاسىپورىندا جۇمىس ىستەپتى. بۇل كاسىپتىڭ قىر-سىرىن سول جەردە ءجۇرىپ ابدەن مەڭگەرىپ السا كەرەك. قازىرشە, ءىنىسىنىڭ گاراجىن جالعا الىپ وتىر. سابىن قايناتۋعا مالدىڭ كادىمگى ءىشمايى, ودان كەيىن كۇنباعىس مايى كەرەك ەكەن. كاسىپكەر ولاردى جەرگىلىكتى ەت كومبيناتتارى مەن مال سويۋ تسەحتارىنان, ءدامحانالار مەن مەيرامحانالاردان ساتىپ الادى. ال دايىن حيميالىق قوسپانى شىمكەنت پەن الماتىدان الدىرتادى.
– سىرتتان كەلىپ جاتقان كىر سابىننىڭ كوبىندە ءبىرتۇرلى جاعىمسىز ءيىس بولادى. ونى بىردەن بايقايسىز. جۇرتتىڭ كوبى مۇنداي سابىنداردىڭ دوڭىزدىڭ تەرىسىن قايناتىپ جاسالاتىنىن ايتادى. ناماز وقيتىن كىسىلەر كوبىنە كىر سابىنمەن جۋىنادى عوي. سوندىقتان ءبىز ءىشمايدى تەك سيىر, جىلقى عانا سوياتىن ەت كومبيناتتارىنان ساتىپ الامىز. بۇعان دەيىن ولار مالدىڭ تازا ەتىن عانا الىپ, ءىشمايىن كوبىنە لاقتىرىپ جىبەرىپ وتىرادى ەكەن. ءبىز وسى زايا كەتىپ جاتقان دۇنيەنى كادەگە جاراتىپ جاتىرمىز. ودان كەيىن حالال ءدامحانالار باۋىرساق, تاعى دا باسقا نەشە ءتۇرلى مايلى تاعامدار پىسىرەدى. سولاردان سۇيىق مايدىڭ قالدىعىن ساتىپ الامىز. وعان حيميكات قوسپا ارالاستىرىپ, سابىننىڭ پايىزىن 72-گە جەتكىزەمىز. سابىن نەعۇرلىم اعارعان سايىن, سوعۇرلىم ساپالى بولادى, – دەيدى كاسىپكەر.
كوتەرمە باعامەن ساتىپ الۋشىلار تابىلىپ جاتسا, كاسىپكەر باعانى 200 تەڭگەگە دەيىن تۇسىرۋگە ءازىر. ءوندىرىستى تولىق ىسكە قوسۋ ءۇشىن 5 ملن تەڭگەدەي قاراجات كەرەك. وكىنىشكە قاراي, كاسىپكەر قازىرشە بيزنەستى دامىتۋ جونىندەگى مەكەمەلەردەن قولداۋ تابا الماي وتىر.
– «اتامەكەن» كاسىپكەرلىكتى قولداۋ پالاتاسىنىڭ فيليالىنا باردىم. ونداعىلار كەپىلدىككە قوياتىن جىلجىمايتىن مۇلكىڭ بولۋى كەرەك دەيدى. وعان كەپىلدىككە قويا قوياتىن ءۇي-جايىم بولماي تۇر. «تسەنتركرەديت بانكىنە» بارىپ سويلەستىم. ولار الدىمەن ءبىزدىڭ بانكتەن جەكە ەسەپشوت اشىپ, سوعان جارتى جىل قارجى جيناۋىڭ كەرەك دەيدى. قازىر قۇجاتتارىمدى جيناپ, تاياۋدا عانا وبلىس اكىمدىگى جاريالاعان كاسىپكەرلىكتى قولداۋعا ارنالعان تاعى ءبىر باعدارلاماعا قاتىسىپ جاتىرمىن. ول باعدارلاماعا قاتىسۋ ءۇشىن جۇمىسسىز بولۋىڭ كەرەك ەكەن. سوكولوۆ-سارىباي كەن بايىتۋ كومبيناتىندا توكار بولىپ ءجۇر ەدىم. امالسىز جۇمىستان شىقتىم. ماعان ەڭ باستىسى, ءوندىرىستى ىسكە قوساتىن قاراجات كەرەك. قالعان نارسەنى ءوزىم تابامىن. مۇنىڭ سىرتىندا, ۇنتاق سابىن, سۋ سابىن, اعارتقىش, شامپۋن جاسايتىن ستانوكتاردى دا ساتىپ الماقپىن, دەيدى سەگىزباي ءجۇنىسوۆ.
كاسىپكەر سوكولوۆ-سارىباي كەن بايىتۋ كومبيناتىنا قولداۋ سۇراپ بارعان ەكەن. كاسىپورىن باسشىلارى ءونىمىڭدى شىعارا باستاساڭ, ساتىپ الۋ جاعىن ويلاستىرامىز دەگەن ۋادە بەرىپتى.
قوستاناي وبلىسى
