راپۋنتسەل ەرتەگىسىنىڭ ۇزىن شاشتى كەيىپكەرىنىڭ ەسىمىمەن اتالعان «شاش جۇتۋ» سيندرومى – وتە سيرەك كەزدەسەتىن سىرقات. بۇل ىسىك اسقازان-ىشەك جولىندا قورىتىلمايتىن, سىڭىرىلمەيتىن شاشتىڭ ۇلكەن كولەمدە جينالۋىنان پايدا بولىپ, ىشكى اعزالاردىڭ كىدىرىسسىز جۇمىسىنا كەدەرگىسىن كەلتىرەدى. الەۋمەتتىك مەديتسينالىق ساقتاندىرۋ قورىنىڭ استانا قالاسى بويىنشا فيليالى بەرگەن مالىمەتكە سۇيەنسەك, وسىناۋ دەرتكە دۋشار بولعان 15 جاستاعى بالا اتىراۋ وبلىسىنان شيپا ىزدەپ كەلىپتى.
«بۇل اۋرۋ وتە سيرەك كەزدەسەدى. اسقازاندا جينالعان شاشتىڭ كوپ مولشەرى تريحوبەزواردىڭ نەمەسە «شاشتى ىسىكتىڭ» پايدا بولۋىنا اكەلىپ سوعادى, سوسىن اسقازاندى بىرتە-بىرتە جاۋىپ, بىتەپ تاستايدى. مۇنداي ىسىك «ۇزىن قۇيرىقتى» اسقازاننىڭ پىشىنىنە كەلەدى, اش ىشەككە دەيىن جەتەدى. عىلىمي مالىمەتتەر بويىنشا, راپۋنتسەل سيندرومى بار ناۋقاستاردىڭ 70 پايىزى – 20 جاسقا تولماعان ايەل ادامدار», دەپ ءتۇسىندىردى №2 كوپسالالى قالالىق بالالار اۋرۋحاناسىنىڭ جوسپارلى حيرۋرگيا ءبولىمىنىڭ مەڭگەرۋشىسى ازامات ورازالينوۆ.
دارىگەردىڭ ايتۋىنشا, ۇلدارعا قاراعاندا قىزدار راپۋنتسەل سيندرومىنا ءجيى ۇشىرايدى. ايەلدەردىڭ شاشتارى ادەتتە ەر ادامدارعا قاراعاندا ۇزىن, سوندىقتان اسقازاننىڭ شىرىشتى قاباتىندا قالىپ قويۋ ىقتيمالدىعى جوعارى. بالا شاشتى جۇتقان كەزدە ىسىك كولەمى ۇلعايادى جانە بۇل ىشكى اعزالاردى زاقىمدايدى.
«پاتسيەنتتەردە تريحوفاگيا بەلگىلەرىنىڭ پايدا بولۋىن, ياعني ولاردىڭ نەگە شاش جەيتىنىن تۇسىندىرەتىن كوپتەگەن تەوريا بار. مىسالى, سترەسسكە قارسى قۇرال سەكىلدى ۇنەمى دۇرىس تاماقتانباۋ نەمەسە داعدىلاردىڭ اسەرىنەن تۋىندايتىن بالالىق نەگاتيۆيزم. تريحوفاگيا جانە پيكاتسيزم, ياعني تابەتتىڭ بۇزىلۋى جانە جەۋگە جارامسىز زاتتاردى جەگىسى كەلەتىن, باقىلاۋعا كونبەيتىن بۇل ادەت اعزاسىندا تەمىر جەتىسپەيتىن ادامداردا كەزدەسەدى. راپۋنتسەل سيندرومىنىڭ كەيبىر عىلىمي سيپاتىندا پاتسيەنت قۇرامىندا تەمىر بار پرەپاراتتاردى قابىلداعاننان نەمەسە تسەلياكيا سىرقاتىنان ەمدەلگەننەن كەيىن شاشتى جۇلۋدى جانە جەۋدى قويادى. بۇل اۋرۋدىڭ ىقتيمال سەبەپتەرىن جوققا شىعارعان كەزدە مىندەتتى تۇردە پسيحولوگتىڭ كەشەندى كومەگى قاجەت. وكىنىشكە قاراي, كوپ جاعدايدا حيرۋرگيالىق ءادىس «شاشتى ىسىك» ماسەلەسىن بىردەن شەشەتىن جانە اسقازان-ىشەك جولدارىن قالپىنا كەلتىرەتىن ەڭ ءتيىمدى ءادىسى بولىپ قالا بەرەدى. بالاعا ءبىزدىڭ اۋرۋحانادا جوسپارلانعان حيرۋرگيا بولىمىندە لاپاروتوميا, گاستروتوميا, اسقازاننىڭ تريحوبەزواراسىن الىپ تاستاۋ وپەراتسياسى جاسالدى. وپەراتسيانى استانا قالاسىنىڭ شتاتتان تىس باس بالالار حيرۋرگى رينات بايگەرەەۆ جاسادى. قازىرگى ۋاقىتتا بالا دارىگەرلەر باقىلاۋىندا», دەدى ا.ورازالينوۆ.
اۋرۋحاناعا تۇسكەن بالانىڭ اتا-اناسى الدىمەن ءوز ەمحاناسىنا جۇگىنىپ, وندا فيبروگاسترودۋودەنوسكوپيا (فگدس) ارقىلى تەكسەرۋ جۇرگىزگەن ەكەن.
ء«بىز اتىراۋ وبلىسىنان كەلدىك. بالامىز – 15 جاستا. قازىرگى ۋاقىتتا وقۋ جىلى اياقتالعانشا استانادا تۇرىپ جاتىرمىز. №2 ەمحانادا تىركەۋدەمىز. بالا مەزگىل-مەزگىل ءىشى اۋىرىپ, تاماق ىشكەننەن كەيىن قۇساتىن. تەكسەرۋ كەزىندە اسقازانىندا تريحوبەزوار انىقتالدى. سودان №2 كوپسالالى قالالىق بالالار اۋرۋحاناسىنا جولداما بەرىپ, پورتالعا قويدى. ءمامس جۇيەسى ارقىلى قىسقا مەرزىمدە اۋرۋحاناعا جاتقىزىپ, وپەراتسيا جاسادى. بالا قازىر ءوزىن جاقسى سەزىنەدى. سول ءۇشىن كومەك قولىن سوزعان التىن قولدى ابزال جانداردىڭ بارىنە ريزاشىلىعىمىزدى بىلدىرەمىز», دەيدى اجەسى سۆەتا.
