2020 جىلدىڭ تامىز ايىندا ديماش قۇدايبەرگەننىڭ پولشالىق جانكۇيەرلەرى تاۋلىگىنە 24 ساعات جانە اپتاسىنا 7 كۇن بويى ديماشتىڭ اندەرىن, قازاقستاننىڭ مادەنيەتى تۋرالى باعدارلامالاردى ۇسىناتىن ونلاين راديونى ىسكە قوستى. «ديماش» راديوسى – زاڭدى تۇردە تىركەلگەن حابار تاراتۋ ستانساسى. ونىڭ ۆارشاۆادا ونلاين حابار تاراتۋ جانە باعدارلامالار مەن پودكاستاردى شىعارۋعا ارنالعان جەكە ستۋدياسى بار. راديودان پولشادا تۇراتىن قازاقتارمەن, قازاقستاندا تۇراتىن پولياكتارمەن جانە ديماشتىڭ جانكۇيەرلەرىمەن قىزىقتى سۇحباتتار بەرىلەدى. كەيبىر باعدارلامالار ەكى تىلدە – پولياك جانە قازاق تىلدەرىندە جازىلعان.
سوڭعى ءبىر جىلدا «ديماش» راديوسى ءوز ەفيرىندە قازاق ءتىلىنىڭ ونلاين كۋرسىن جۇرگىزە باستادى. ونداعى قازاق ءتىلى ساباقتارىن الەمنىڭ تۇكپىر-تۇكپىرىنەن كەلگەن تىڭدارماندار پايدالانا الادى. ول ءۇشىن radiodimash.pl سايتىنداعى راديونى قوسساڭىز بولعانى. جاڭا ساباقتار ءار سەيسەنبى سايىن CET 20:00-دە كورسەتىلەدى جانە ترانسلياتسيادان كەيىن پودكاست رەتىندە قولجەتىمدى. بۇل ماتەريالدى وزدەرىنە ىڭعايلى ۋاقىتتا تىڭداۋىنا مۇمكىندىك بەرەدى. ساباقتى الماتىلىق جاس ينجەنەر ءارى ديماش شىعارماشىلىعىنىڭ جانكۇيەرى بەگلان شارىنباي جۇرگىزەدى.
«ديماش» راديوسىنىڭ جەتەكشىسى تەرەزا كاكول پولشا مەن قازاقستاندى 4 مىڭ كيلومەتر ءبولىپ تۇرعانىن, بىراق عالامتور عاسىرىندا بۇل ديماشقا, ديماش ارقىلى ۇلى قازاق حالقىنا دەگەن ماحابباتقا كەدەرگى كەلتىرە المايتىنىن ايتتى. ء«بىز بەگلان مىرزامەن ونلاين جۇمىس ىستەيمىز, بەينەكونفەرەنتسيالار كەزىندە بارلىق تاقىرىپتى تالقىلايمىز جانە ماتەريالداردى قاشىقتان جازىپ الامىز», دەيدى تەرەزا كاكول.
«ديماش» راديوسىنداعى قازاق ءتىلى ساباعىنىڭ العاشقى ناتيجەلەرى جامان ەمەس. «DiVoices» حورىنىڭ پولشالىق جانكۇيەرلەرى ديماشتىڭ «ماحاببات بەر ماعان» ءانىنىڭ ماعىناسىن تۇپنۇسقادا ايتتى. حور سوپرانو, الت, تەنور جانە باستا شىرقالادى. ت.كاكولدىڭ ايتۋىنشا, ديماش اندەرى تۇڭعىش رەت حورمەن پولشادا ايتىلدى. ءاننىڭ ارانجيروۆكاسىن تانىمال پيانيست ولگا پوپوۆا «DiVoices» ءۇشىن جازعان. ايتىلۋى قيىن قازاق سوزدەرىن مەڭگەرۋ ماقساتىندا حور مۇشەلەرى ب.شارىنبايمەن جەلىدە كەزدەسىپ, ءان ءماتىنىنىڭ تۇپنۇسقاسىن زەردەلەپ, جۇرەك سۇزگىسىنەن وتكىزىپ جەتكىزدى. «جۇرەكتەن شىققان ءان جۇرەككە جەتەدى. تالانت پەن تاڭعاجايىپ داۋىس الەمگە ورتاق. قازىر بۇل جوباعا ەۋروپالىق وداقتىڭ وزگە مۇشە مەملەكەتتەرىندەگى تىڭدارماندار دا ىقىلاس تانىتا باستادى», دەيدى ت.كاكول.
«DiVoices» حورىنداعى انشىلەردىڭ باسىم كوپشىلىگى بۇرىن ءان ايتپاعان. ديماشتىڭ داۋىسىنىڭ تىلسىم قۇدىرەتى ولاردى ساحناعا الىپ كەلگەن. از عانا ۋاقىت ىشىندە قازاق ءتىلىن ۇيرەنىپ قانا قويماي, ۆوكال ونەرىنىڭ قىر-سىرىن مەڭگەرۋگە تالپىنىپ ءجۇر. ت.كاكولدىڭ ايتۋىنشا, راديوداعى كاسىبي ماماندار حور مۇشەلەرىنە ىرعاقتى, ديكتسيانى جانە داۋىس شىعارۋدى جاتتىقتىرۋمەن اينالىسادى. كومەيدىڭ قالتارىسىندا جاسىرىنىپ جاتقان اۋەزدى ءۇندى ارشىپ الىپ, جارىققا شىعارىپ, دۇرىس قالىپتاسۋىنا, داۋىستىڭ دۇرىس قويىلۋىنا سەپتىگىن تيگىزىپ ءجۇر.
