تەگىندە تال بويىنا اكە مەن شەشەنىڭ ءتالىمدى تاربيەسىن, وتباسىلىق قۇندىلىقتاردى سىڭىرگەن ۇرپاقتىڭ وسال بولمايتىنى انىق. سول سەبەپتەن, وتباسىلىق قۇندىلىقتار دارىپتەلەتىن كۇن حالىقارالىق دەڭگەيدە اتاپ وتىلەدى. وسىعان وراي اتىراۋدا ءار جاستاعى ەرلى-زايىپتىلار عانا ەمەس, بارشا تۇرعىنداردىڭ دەمالىس ورنىنا اينالاتىن وتباسى ساياباعى اشىلدى. ءوڭىر تۇرعىندارىن وبلىس اكىمىنىڭ ورىنباسارى جاسۇلان بيسەمبيەۆ وتباسى كۇنىمەن قۇتتىقتاپ, بۇل مەرەكەنىڭ ماڭىزىنا توقتالدى.
– وتباسى كۇنى تەك ەلىمىزدە عانا ەمەس, الەم ەلدەرىندە دە حالىقارالىق مانگە يە بولعان. بۇل كۇندى اتاپ ءوتۋ تىرشىلىك اتاۋلىنىڭ جانداناتىن كوكتەمنىڭ شۋاقتى كەزەڭىنە سايكەس كەلۋىنىڭ وزىندىك ءمانى بار. ال قازاقتىڭ «وتان وتباسىنان باستالادى» دەيتىن كەرەمەت ءتامسىلىنىڭ استارىندا ۇرپاقتى وتانشىلدىققا تاربيەلەۋدىڭ ءتىنى اتا-انانىڭ تالىمىمەن ۇشتاسىپ جاتىر. ويتكەنى مەملەكەتتىڭ دامۋى مەن قوعامنىڭ قالىپتاسۋىنا ۇرپاق تاربيەسىنىڭ تيگىزەر ماڭىزى زور, – دەدى جاسۇلان بيسەمبيەۆ.
اكىم ورىنباسارىنىڭ ايتۋىنشا, ءوڭىردىڭ ءار سالاسىندا وتباسىلىق ديناستيا بار. ماسەلەن, وتاندىق ەكونوميكانىڭ جەتەكشى سالاسىنا اينالعان مۇناي-گاز ونەركاسىبىندە بالعىمباەۆ, بالجانوۆ, بەشىموۆ, بولەكباەۆ, قارامۇرزيەۆ, مىرزاعاليەۆ, ورجانوۆ, وتەباەۆ, وتەعاليەۆ, شىرداباەۆ, ماراباەۆ, دوسمۇحامبەتوۆ, جۇماعاليەۆ, وگاي اۋلەتتەرىنىڭ ەڭبەك جولىن بۇگىنگى ۇرپاعى ابىرويلى جالعاستىرىپ كەلەدى. ال باساروللا حارەسوۆتىڭ وتباسىن دارىگەرلەر ديناستياسى دەۋگە بولادى. ءۇشىنشى بۋىنعا جالعاسقان دارىگەرلىك كاسىپتى ەكى ۋرولوگ, فتيزياتور, وكۋليست, نەۆروپاتولوگ, ستوماتولوگ, جالپى تاجىريبە دارىگەرى جالعاستىرىپ كەلەدى. مۇنداي ديناستيالار مەملەكەتتىك قىزمەت, تەمىرجول, اۋىل شارۋاشىلىعى, ءبىلىم مەن مادەنيەت سالاسىندا دا بار.
– اتىراۋ قالاسىندا تۇرعىنداردىڭ دەمالىس ورنىنا اينالعان ساياباقتار از ەمەس. ەندى سونىڭ قاتارىنا وتباسى ساياباعى قوسىلدى. قازاقتىڭ ساز ونەرىنە مول مۇرا قالدىرعان سازگەر, قازاقستاننىڭ حالىق قاھارمانى نۇرعيسا تىلەنديەۆتىڭ ەسىمى بەرىلگەن كوشەدەگى الاڭدى وتباسى ساياباعى دەپ اتاۋعا شەشىم قابىلدادىق, – دەدى ج.بيسەمبيەۆ.
جاڭا ساياباقتىڭ اشىلۋىنا جاراسىمدى جانۇيالىق جۇپ قۇرىپ, ونەگەلى ۇرپاق ءوسىرىپ وتىرعان وتباسىلار جينالدى. سونداي وتباسىنىڭ قاتارىنداعى تەمىرجان سانداشەۆ پەن بيعايشا جولمۇحانوۆا 57 جىل بۇرىن شاڭىراق كوتەرگەن. قازىر بالالارىنان وربىگەن نەمەرەلەرىنىڭ بال قىلىعىن قىزىقتاپ وتىر.
ءومىرى دە, ونەگەسى دە ۇلاعاتقا تولى ۇلكەندەر وتباسىلىق قۇندىلىقتار, ۇرپاق تاربيەسى جونىندە اڭگىمە ءوربىتتى. ال نەمەرەلەرى ءتۇرلى تاقىرىپقا سۋرەت سالىپ, اتا-اجەسىنە, اكە-شەشەسىنە سىيعا تارتتى. اعاش پەن تەمىردەن, وزگە دە ماتەريالدان ءتۇيىن تۇيگەن قولونەر شەبەرلەرى ۇلتتىق ناقىشتاعى بۇيىمدارىن جۇرتشىلىق نازارىنا ۇسىندى. بۇل كۇنى جاڭا ساياباققا جەمىس اعاشتارىنىڭ كوشەتى ەگىلدى.
اتىراۋ وبلىسى
