ساحنادا قارىم-قاتىناستارى كۇردەلەنگەن وتباسىنىڭ شىم-شىتىرىق ءومىرى بارىنشا انىق كورسەتىلدى. ءبىر شاڭىراق استىندا تۇرىپ جاتقان ەرلى-زايىپتىلاردىڭ ورتاق مۇددەسى جوق, ولاردىڭ ءوزارا ءتىل تابىسا الماۋىنىڭ زاردابىن بالالارى تارتقان. ەرجەتكەن ۇلدارى قايىرىمسىز دا قاتال, جاستايىنان اتا-انانىڭ مەيىرىمىنە شولدەپ وسكەن قىزدارى بويجەتكەن كەزدە ۇيلەرىنەن كەتۋگە ءماجبۇر بولادى. وتاعاسىنىڭ ويى – سىرتتا, اڭدىعانى – اتاق پەن مانساپ, سول ءۇشىن دە ارىن ساتۋدان ارلانبايدى. شاڭىراقتى ۇيىستىرىپ وتىراتىن وتاعاسىنىڭ بالالارىمەن شارۋاسى بولماعان سوڭ, ەرجەتكەندە ولار دا اكەسىن ونشا كەرەك قىلمايدى. بۇل ءۇيدىڭ كەرەگەسىن وتاناسى عانا تىرەپ تۇرعانداي. اناسى وتاعاسى مەن بالالارىن تاتۋلاستىرۋعا تىرىسىپ, جاماندى جاسىرىپ, جاقسىسىن اسىرىپ, جانى قالماي شىرىلداپ جۇرسە دە, ەڭبەگى زايا كەتەدى. ويتكەنى ىزگىلىك پەن مەيىرىمگە, ءبىر-بىرىنە دەگەن جانى اشۋ سەزىمى ىرگەتاسىنا اۋەل باستان قالانباعان ءۇيدىڭ بەرەكەسى جوق. ورتاق قۇندىلىق بولماسا, ءبىر اكە-شەشەدەن تۋعان ادامداردىڭ دا وگەي بولاتىنىن جاس ارتىستەر كورەرمەن جۇرەگىنە جەتكىزە ءبىلدى.
قويىلىم پرەمەراسىنا وبلىس اكىمى ەرالى توعجانوۆ قاتىسىپ, كورەرمەندەرگە وي سالارلىق دۇنيەنى ساحنالاعان №78 مەكتەپ وقۋشىلارى مەن اكتەرلىك مەكتەپتىڭ جەتەكشىسى فارحات شىنتەمىروۆكە العىس ايتتى. ءوڭىر باسشىسى ءاربىر مەكتەپتە وسىنداي شىعارماشىلىق وشاقتارى بولۋى كەرەكتىگىن العا تارتىپ, مۇنداي ورتالىقتار بالالاردىڭ تۇلعالىق جاعىنان قالىپتاسۋىنا اسەر ەتەتىنىن جەتكىزدى.
وسىدان ەكى جىل بۇرىن قۇرىلعان مەكتەپ تەاترىنىڭ ماقساتى – وقۋشىلاردىڭ شىعارماشىلىعىن دامىتۋ, بالالار بويىنا رۋحاني قازىنانى ءسىڭىرىپ, كىتاپ وقۋ مەن ونەرگە باۋلۋ.
اقتوبە وبلىسى
