دەنساۋلىققا دەم بەرگەن

قاراعاندىداعى پروفەسسور حافيز مۇقاجانوۆ اتىنداعى تراۆماتولوگيا جانە ورتوپەديا وبلىستىق ورتالىعىنىڭ سۇيەك-بۋىن جۇيەسىنىڭ جاراقاتى مەن اۋرۋلارىن ەمدەۋدەگى ۇلگىلى ءىس-قىزمەتى ەرتەدەن ەل اۋزىندا. الدىمەن, اتالعان ەسىمنىڭ ارداق تۇتىلۋىن ايتا كەتسەك, بۇل كىسى وسى ورىننىڭ نەگىزىن قالاعان, سالانىڭ ساناۋلى شەبەر حيرۋرگى رەتىندە تانىلعان, سۇيەكتىڭ تۋا بىتكەن قيسىعىنا جانە سىنىققا وپەراتسيا جاساۋدى جەتىلدىرۋ جونىندەگى عىلىمي ەڭبەكتەرى قۇندىلىعىن جوعالتپاعان بەلگىلى تۇلعا. الدىنان ساباق الىپ, تاجىريبەسىن ءتۇيىپ, ەلىمىزدىڭ مەديتسينالىق مەكەمەلەرىندە ءىسىن جالعاستىرۋشى شاكىرتتەرى جۇزدەپ سانالادى. وبلىستىق دەلىنگەنمەن مۇنداعى شىن مانىندەگى التىن قولدى وتاشىلار مەن دارىگەرلەردىڭ دارمەندى شيپاسى جايلى ريزالىق لەبىزدەر ايشىلىق جەرلەرگە دە جەتىپ جاتۋى-اق اتاق-بەدەلىن اڭعارتار جاي. وسىندايلىق مەديتسينالىق مەكەمە قابىلداۋ بولىمشەسىنىڭ مەڭگەرۋشىسى, ءبىرىنشى ساناتتى تراۆماتولوگ-ورتوپەد دجاماليددينوۆ ۆيدادي سوحرابوعلى بايان ەتكەندەي سوڭعى جىلداردا دياگنوس­تيكا مەن ەمدەۋ ءۇشىن زاماناۋي قۇرال-قوندىرعىلاردىڭ مولىنان قولدانۋى, يننوۆاتسيالىق تەحنولوگيالار ەندىرىلۋى ارقاسىندا سۇيەك سىنىقتارىن قالپىنا كەلتىرۋ جانە وڭالتۋ جاڭا ساپالىق دەڭگەيگە كوتەرىلگەن. سوعان بايلانىستى ءساتتى ىستەردىڭ لايىقتى باعالانۋى از ەمەس. بىلتىر وكسفوردتاعى ەۋروپالىق بيزنەس اسسامبلەياسىنىڭ كاسىبي دەڭگەيى جوعارى       «ەڭ ۇزدىك كاسىپورىن» سوكرات سىيلىعىمەن ماراپاتتالۋى سونىڭ ءبىر دالەلى دەۋگە بولادى. ال جاقىندا مەديتسينالىق قىزمەت كورسەتۋ مەكەمەلەرىنىڭ ساپالىق كورسەتكىشى بويىنشا «European Awards for Best Practices» سىيلىعى تاعى مارتەبە اسىردى. مۇندا تىرەك-قيمىل جاراقاتىن العان, تىزە-بۋىن سىرقاتىنا شالدىعۋشىلاردىڭ جىلىنا 6 مىڭ پاتسيەنتىنە تاۋلىكتىك ستاتسيو­نار بويىنشا جوعارى مامانداندىرىلعان مەديتسينالىق كومەك كورسەتىلەدى. دەنە زاقى­مىنا قاراي شۇعىل جاسالاتىن وپەرا­تسيا­لاردىڭ ءوزى 4 مىڭنان اسىپ جاتادى. بۇگىندە ءارتۇرلى جاعدايلارعا بايلا­نىستى جاراقاتتانۋشىلار, اياق-قول قىزمەتى ناشارلاۋشىلار از ەمەس بولعاندىقتان ولاردىڭ تەز قابىلدانىپ-قارالۋىن قامتاماسىز ەتۋ باستى ماقسات بولىپ تابىلادى. اۋرۋلاردى قابىلداۋ ەكى كەزەك بويىنشا ۇيىمداستىرىلۋى ون­سىز دا قينالىپ كەلۋشىلەردىڭ ۋاقىت ۇزاتپاي قارالا الۋىنا مۇمكىندىك جاساپ, كوڭىلدەرىنە دەم بەرەدى. ءبىز اتالعان بولمەنى ارالاپ تانىسقانىمىزدا, عاجابى سول, ادەتتە وسىندايعى باسقا ورىندارداعىداي ۇزاق سونار كەزەك كۇتىپ, رەنجىپ-كۇيىنىپ وتىرۋشىلاردى كورە المادىق. كلينيكانىڭ بولىمشەلەرى 210 كەرەۋەتكە ەسەپتەلگەن. ەرەسەكتەر مەن بالالار جاراقاتى مەن ورتوپەدياسى, كۇيىك جانە ءىرىڭ جاراقاتى, شۇعىل جاراقات, وڭالتۋ مەن قالىپقا كەلتىرۋ, كۇندىزگى ستاتسيونار بولىمشەلەرى جۇمىس ىستەيدى. ەگەر كورسەتىلگەن مەديتسينالىق قىزمەت ساپاسىنا قاناعاتتانباعان جاعدايدا ماسەلەنى شەشۋ ءۇشىن كومەكتەسەتىن بولىمشە دە بار. ناۋقاستارعا مەديتسينانىڭ سوڭعى وزىق تەحنولوگيالارى پايدالانىلا وتىرىپ, ەم قولدانىلادى. سونىڭ ءبىرىن ايتقاندا, ماسەلەن, وسىرىلگەن اللوفيبروبلاستەردى كۇيىك شالعان كەزدە جەدەل ەمدەۋگە قولدانۋ ەلىمىزدە العاش رەت ەندىرىلدى. ونى ترانسپلانتاتسيالاۋ تەرى بەتىنىڭ 10 پايىزدان استام بولىگىنە تەرى الماستىرعاندا جۇزەگە اسىرىلادى. بىلتىرعى جىل اياعىنان باس­تاپ ەندىرىلگەن بۇل ءادىس 5 پاتسيەنتكە ءساتتى جاسالعان. بارلىق جاعدايدا وڭ اسەرى بايقالدى. – ەرەكشەلىگى سول, ادام ءوزىنىڭ اۋتوترانسپلانتتارى ەداۋىر ۇلاسىپ ءوسىپ, جارانىڭ ىرىڭدەۋى ورىن المايدى. سونىمەن بىرگە, قايتادان وتا جاساۋ تالاپ ەتىلمەيدى جانە اۋرۋ الدىڭعى جالپىعا بىردەي ادىسپەن ەم العاندارعا قاراعاندا از مەرزىم ىشىندە ەمدەلىپ شىعادى, – دەيدى ۆيدادي سوحرابوعلى. سونداي-اق, ول اتاپ وتكەندەي, قويىلعان دياگنوزدى ناقتىلاۋ ءۇشىن كومپيۋتەرلىك توموگرافيانى, وستەودەن­سيتومەتريانى, سۇيەكتىڭ مينەرالدى تىعىزدىعىن انىقتايتىن ۋلترا دىبىس­تى زەرتتەۋدى, جاڭا ۇلگىدەگى ەڭ سەزىمتال رەنتگەنولوگيالىق اپپاراتتاردى قولدانۋدا قاتەلەسۋ ىقتيمالدىعىن الدىن الۋعا مۇمكىندىك بەرەدى. سونىڭ ناتيجەسىندە سىرقات سىرى ءدال انىقتالىپ, وتا جاساۋ نەمەسە وتاسىز ەمدەۋ ءساتتى جۇرگىزىلەدى. مىنە, ايماقتاعى, قالا بەردى ەلىمىزدەگى بەل­دى تراۆماتولوگيا جانە ورتوپەديا ورتا­لى­­­­عى سان-سالالى قىزمەتىنىڭ ءبىر پاراسى, ونى جاقسارتا تۇسۋدەگى ىزدەنىس ىزدەرى وسىنداي. ايقىن نەسىپباي, «ەگەمەن قازاقستان». قاراعاندى.