يندۋستريا جانە ينفراقۇرىلىمدىق دامۋ ءمينيسترى مارات قاراباەۆتىڭ ايتۋىنشا, ءىس-شارانى ۇيىمداستىرۋداعى نەگىزگى ماقسات – ەلىمىزدەگى يندۋستريالىق-يننوۆاتسيالىق كەشەننىڭ تۇراقتى دامۋىنا ىقپال ەتۋ. رەسمي اشىلۋ سالتاناتىنان كەيىن ۆەدومستۆو باسشىسى مەن «قازاقستان ماشينا جاساۋشىلار وداعى» زتب باسقارما توراعاسى مەيرام پىشەمباەۆ كورمەگە قويىلعان ەكسپوزيتسيالاردى ارالاپ شىقتى.
«كورمەنىڭ ماڭىزدىلىعى جىلدان-جىلعا ارتىپ كەلەدى. مۇنداي فورماتتاعى ءىس-شارالار بيزنەس ءۇشىن ۇلكەن مۇمكىندىكتەرگە جول اشادى. اتاپ ايتقاندا, ينۆەستيتسيالار مەن جاڭا تەحنولوگيالاردى تارتۋ, جاڭا سەرىكتەستەر تابۋدا ۇلكەن ۇلەس قوسپاق», دەپ اتاپ ءوتتى م.پىشەمباەۆ.
ONDEU EXPO 6 ماڭىزدى بەيىندى حالىقارالىق كورمەلەردى بىرىكتىرەتىنىن ايتا كەتكەن ورىندى. اتاپ ايتقاندا, Kazakhstan Machinery Fair, Su Arnasy – Water Expo, AgroSpecMash, سhem Tech Kazakhstan, Stroy Expo Astana جانە Infra Tech Kazakhstan.
يندۋستريا جانە ينفراقۇرىلىمدىق دامۋ ۆيتسە-ءمينيسترى دينارا ششەگلوۆا ONDEU EXPO وڭدەۋ ونەركاسىبىنىڭ حالىقارالىق كورمەسى اياسىندا ۇيىمداستىرىلعان «ونەركاسىپتى تسيفرلى ترانسفورماتسيالاۋ» پانەلدىك سەسسياسىنا قاتىسىپ, يندۋستريا 4.0 تەحنولوگياسىن ەنگىزۋدىڭ ماڭىزدىلىعىنا توقتالدى. ۆيتسە-مينيستر ايتقانداي, قازىر ەلىمىزدە تسيفرلى تەحنولوگيالارعا باسىمدىق بەرگەن ءىرى جانە ورتا ونەركاسىپ كاسىپورىندارىنىڭ ۇلەسى 12,9%-عا جەتىپ وتىر. بۇل رەتتە جىلدىق ءوسىم ورتا ەسەپپەن 3,5% مەجەسىندە بايقالىپ وتىرعانىن ايتا كەتەيىك.
«يندۋستريا 4.0 – ونەركاسىپ كاسىپورىندارىن اقپاراتتىق تەحنولوگيالاردىڭ نەگىزىندە دامىتۋعا باعىتتالعان تىڭ قادام. بۇل وندىرىستىك ۇدەرىستەردىڭ تيىمدىلىگىن ايتارلىقتاي ارتتىرۋعا جول اشادى. وسى اۋقىمدى جيىننىڭ سالاداعى وزەكتى ماسەلەلەردى شەشۋدە ماڭىزدىلىعى جوعارى. ماسەلەن, قازىر وتاندىق ونەركاسىپتىڭ ۇلتتىق اقپاراتتىق جۇيەسىن قۇرۋ جونىندەگى جۇمىس قولعا الىنعانىن ايتا كەتكەن ورىندى. ونىڭ ناتيجەسىندە بارلىق مۇددەلى تاراپ, اتاپ ايتقاندا, مەملەكەت, IT-كومپانيالار, دامۋ ينستيتۋتتارى مەن ونەركاسىپ كاسىپورىندارى ورتاق تسيفرلى ەكوجۇيەدە بىرىگىپ, ۇيلەسىمدى جۇمىس اتقاراتىن بولادى», دەدى ۆەدومستۆو وكىلى.
