استانا اكىمدىگى «Halyk Bank»-پەن بىرلەسىپ, الماتى جانە سارىارقا اۋداندارىنداعى 100 جەكە ءۇيدى تەگىن گازداندىرۋ تۋرالى مەموراندۋمعا قول قويدى. جالپى, بيۋدجەتى 230 ملن تەڭگەنى قامتيتىن گازداندىرۋ جوباسى «Halyk»-تىڭ 100 جىلدىعىنا ارنالعان «100 يگى ءىس» اۋقىمدى ناۋقانى اياسىندا ىسكە اسىرىلىپ جاتىر. بيىل «Halyk Bank» قاراجاتى ەسەبىنەن مۇقتاج وتباسىلار تۇراتىن 230-عا جۋىق تۇرعىن ءۇيدى, دالىرەك ايتقاندا, استاناداعى 100 ءۇيدى جانە الماتى قالاسىنىڭ ناۋرىزباي, الاتاۋ جانە مەدەۋ اۋداندارىندا تۇراتىن 130 ءۇيدى گازعا تولىقتاي قوسۋ ءۇشىن قارجىلاندىرۋ جوسپارلانىپ وتىر.
«استانا قالاسىنداعى الماتى جانە سارىارقا اۋداندارىندا گازعا قولجەتىمدىلىك تولىق قامتاماسىز ەتىلگەن. بۇل – شامامەن 12 مىڭ ابونەنت. ونىڭ ىشىندە 8 مىڭنان اسا ابونەنت گازعا قوسىلدى. ۇيلەردى گازعا قوسۋ شىعىندارىن ازايتۋ ءۇشىن جۇيەلى جۇمىس جۇرگىزىپ جاتىرمىز. حالىقتىڭ الەۋمەتتىك وسال توپتارى ءۇشىن 450 مىڭ تەڭگەگە جۋىق سوماعا گازداندىرۋ شىعىندارىنا وتەماقى كوزدەلگەن, سونداي-اق قۇنى 150 مىڭ تەڭگەگە جۋىق ەسەپتەۋ قۇرالدارى تەگىن بەرىلەدى. بۇرىن بانكپەن پايىزسىز نەسيەلەۋ باعدارلاماسى ىسكە قوسىلعان ەدى. ەندى «Halyk»-پەن ەلورداداعى 100 ءۇيدى تەگىن گازداندىرۋ جوباسىن ىسكە اسىرۋعا كىرىسەمىز. قالعان اۋداندار بويىنشا گاز قۇبىرىن جەتكىزۋ جەلىلەرىن, ورامىشىلىك جەلىلەردى سالۋ جۇمىستارى كەلەسى جىلى جۇرگىزىلەدى. گازداندىرۋ ۇدەرىسى – مەملەكەت باسشىسىنىڭ باقىلاۋىندا», دەدى استانا اكىمى جەڭىس قاسىمبەك.
قازىرگى ۋاقىتتا ەلوردا اكىمشىلىگى الەۋمەتتىك وسال ساناتىنا جاتاتىن مۇقتاج ادامداردىڭ ءتىزىمىن ۇسىندى. ولارعا ماتەريالدىق جاعدايى گازداندىرۋدى ءوز بەتىنشە تولەۋگە مۇمكىندىگى جوق تۇرعىندار ەنگىزىلدى.
بانكتىڭ باسقارما توراعاسى ءۇمىت شاياحمەتوۆانىڭ ايتۋىنشا, «Halyk» بىرنەشە جىل بويى گازداندىرۋ ماسەلەسىن شەشۋگە ءوز رەسۋرستارىن سالىپ جاتىر.
ء«بىز ازاماتتاردىڭ ءومىر ءسۇرۋ ساپاسىن ارتتىرۋ ءۇشىن بانكتىك قىزمەتتەرىن جەتىلدىرۋ بۇكىل رەسپۋبليكا بويىنشا الەۋمەتتىك جوبالاردى ىسكە اسىرۋ ارقىلى دا ۇنەمى ءوز ۇلەسىمىزدى قوسىپ كەلەمىز. 2021 جىلى بانك الماتىدا جالپى سوماسى 92 ملن تەڭگەگە 100 جەكە ءۇيدى تولىقتاي گازداندىرۋدى قارجىلاندىردى, سونداي-اق تۇرعىن ۇيلەرگە گاز جۇرگىزۋگە جەڭىلدىكپەن نەسيە بەرۋدىڭ جەكە باعدارلاماسىن ىسكە قوستى. بانك تۇرعىن ۇيلەرگە گاز جۇرگىزۋگە جەڭىلدىكپەن نەسيە بەرۋدىڭ جەكە باعدارلاماسىن ىسكە قوستى. گازداندىرۋ جوباسىن جالعاستىرا جانە كەڭەيتە وتىرىپ, ءبىز بىردەن ەكى مىندەتتى – وتانداستارىمىزدىڭ نەعۇرلىم وسال توپتارىنا كومەكتەسۋگە جانە ەلدەگى ەكولوگيالىق جاعدايدى جاقسارتۋعا بارىنشا جاردەمدەسۋگە تىرىسامىز», دەدى ءۇ.شاياحمەتوۆا.
