نايزاگەرلىگى ءوز الدىنا, سەمسەرلەسۋدىڭ حاس شەبەرى اتانعان ەر جانىبەككە جەرلەستەرى 2009 جىلدىڭ قىركۇيەگىندە ورتابۇلاق اۋىلى ماڭىندا ۇلكەن كەشەن ورناتتى. باتىرعا ارنالعان ەسكەرتكىشتىڭ بيىكتىگى 37 مەتر, جان-جاعى ءمارمار تاسپەن اشەكەيلەندى. جىل سايىن ارنايى اس بەرۋدى, سپورتتىڭ سەمسەرلەسۋ تۇرىنەن اۋقىمدى تۋرنير وتكىزۋدى جەرلەستەرى داستۇرگە اينالدىرعان. تەك پاندەمياعا بايلانىستى سوڭعى ەكى جىل بۇل ءداستۇر توقتاپ قالعان بولاتىن.
سونىمەن وسكەمەندە وسىمەن 17-ءشى رەت ەر جانىبەك بەرداۋلەت ۇلىن ەسكە الۋعا ارنالعان رەسپۋبليكالىق تۋرنير ءوتتى. بۇرىندارى حالىقارالىق تۋرنير اتانعان ءداستۇرلى جارىس قازىر رەسپۋبليكالىق دەڭگەيدە ۇيىمداستىرىلىپ ءجۇر. سەبەبى بەلگىلى, مەملەكەتتەر اراسىنداعى قارىم-قاتىناس ءدال بۇرىنعىداي بولماي تۇر. ال تۋرنير سەمسەرلەسۋ جانە راپيرا بويىنشا ءوتتى. ونىڭ سالتاناتتى اشىلۋىندا وبلىستىق دەنە شىنىقتىرۋ جانە سپورت باسقارماسى باسشىسىنىڭ ورىنباسارى سەرىك قۇسامباەۆ, وبلىستىق سەمسەرلەسۋ جانە راپيرا فەدەراتسياسىنىڭ پرەزيدەنتى يگور گريازنوۆ, وسى تۋرنير باستالعالى باسى-قاسىندا ءجۇرىپ, دەمەۋشىلىك تانىتىپ كەلە جاتقان ىسكەر جاندار توقتاسىن ەرۋباەۆ, سەيىلجان سايلاۋباەۆ, قايرات ورازباەۆ, باسقا دا ازاماتتار ءسوز الىپ, وليمپيادا باعدارلاماسىنا ەنەتىن بۇل سپورت ءتۇرىن ەلىمىزدە دامىتۋ ءۇشىن جاسوسپىرىمدەر اراسىندا جىل سايىن وسىنداي ءدۇبىرلى جارىس وتكىزۋدىڭ جەمىس بەرەتىنىن تىلگە تيەك ەتتى.
تۋرنير بىرنەشە كۇنگە سوزىلدى. تارتىستى وتكەن جارىستا سەمسەرلەسۋدەن جاسوسپىرىمدەر اراسىندا ءبىرىنشى ورىندى الماتى وبلىسىنىڭ تالانتتى جاسى الەكسەي كاساتكين جەڭىپ الدى. ەكىنشى ورىندى الماتىلىق گەورگي تيننيكوۆ, ءۇشىنشى ورىنداردى شىعىس قازاقستان وبلىسىنىڭ قوس وكىلى كيريلل پروحوروۆ پەن بوگدان لۋكين يەلەندى.
قىزدار اراسىندا الماتى قالاسىنىڭ وكىلى ناتاليا زينياكوۆا چەمپيون اتاندى. كريستينا كراسيكوۆا (شقو), كارولينا فومينا (الماتى), ءلاززات كاريپوۆا (شقو) كەيىنگى ورىنداردى ءبولىستى. ال كادەتتەر اراسىندا كيريلل پروحوروۆ جەڭىمپاز اتاندى. ەكىنشى جانە ءۇشىنشى ورىنداردى تيمۋر يۆانوۆ, الەكساندر شەشين, جاناربەك جانۇزاقوۆ (بارلىعى الماتى قالاسى) ءوزارا ءبولىستى. بۇرىمدىلار اراسىندا (كادەتتەر) كريستينا كراسيكوۆا قارسىلاس شاق كەلتىرمەدى. ەكىنشى جانە ءۇشىنشى ورىنداردى پولينا لەسوۆايا (الماتى) مەن ءامينا ساماتوۆا (شقو) جانە حاۆا ۋماەۆا (الماتى) جەڭىپ الدى.
راپيرا سايىستارىندا الماتىلىق گاليم نۇرىموۆ جاسوسپىرىمدەر اراسىندا جەڭىمپاز اتاندى. قىزدار اراسىندا الماتى قالاسىنان سوفيا اقتاەۆا ۇزدىك شىقتى. كادەتتەر اراسىندا اباي وبلىسىنان كەلگەن قۇسمان ەدىل چەمپيون اتاندى. ال قىزدار اراسىنداعى تارتىستى سايىستا تاعى دا سوفيا اقتاەۆا جەڭىس تۇعىرىنىڭ ەڭ بيىك ساتىسىنا كوتەرىلدى. كوماندالىق ەسەپتە الماتى, قىزدار اراسىندا شىعىس قازاقستان وبلىسىنىڭ وكىلدەرى سۋىرىلىپ الدان كورىندى.
«سەمسەرلەسۋ مەن راپيرا سپورتى كەيىنگى جىلدارى ەلىمىزدە ايتارلىقتاي جاقسى دامىپ كەلەدى. اسىرەسە الماتى قالاسى مەن الماتى, شىعىس قازاقستان وبلىستارى جانە شىمكەنت قالاسىندا سپورتتىڭ بۇل تۇرىنە كوپ كوڭىل بولىنەدى. وسىنداي ءدۇبىرلى جارىستاردى تۇراقتى وتكىزۋدىڭ ماڭىزى زور. جاستاردىڭ شەبەرلىگىن ارتتىرادى. ماسەلەن, رۋسلان كۋردانوۆ, ۆاديم شارلايموۆ, الينا ەسكەندىروۆا سياقتى تالانتتى جاستار ازيا چەمپيوناتىندا توپ جاردى, الەم كۋبوگىندە جۇلدە تەردى. قىسقاسى, سپورتتىڭ بۇل تۇرىنەن ءتۇرلى جارىستا ءۇمىتىمىز بار», دەدى قازاقستان رەسپۋبليكاسى سەمسەرلەسۋ جانە راپيرا فەدەراتسياسىنىڭ ۆيتسە-پرەزيدەنتى قارلىعاش سايحانوۆا.
جارىستا جەڭىمپازدار مەن جۇلدەگەرلەرگە گراموتالار مەن ەسكەرتكىش سىيلىقتار تاپسىرىلدى.
وڭداسىن ەلۋباي,
قازاقستاننىڭ قۇرمەتتى سپورت قىزمەتكەرى
شىعىس قازاقستان وبلىسى
