كىتاپ ورىس جانە قازاق تىلدەرىندە Etage ديزاين ستۋدياسى مەن «شەۆرون» كومپانياسىنىڭ قولداۋىمەن جارىق كورگەن. كىتاپتىڭ ماقساتى - قازاقستانننىڭ تابيعات بايلىعىن, قايتالانباس سۇلۋلىعىن, ءار ولكەنىن جەرگىلىكتى مادەنيەتى داستۇرلەرىن كىشكەنتاي وقىرماندارعا تانىستىرۋ جانە دارىپتەۋ. وندا بالالار ادەبيەتىندە قالام تەربەپ جۇرگەن جاس جازۋشىلاردىڭ اڭگىمەلەرى توپتاستىرىلعان. ءار شىعارمانىڭ سيۋجەتى بالالاردى وزىنە ەلتىپ, اتامەكەنىمىزدىڭ ءارتاراپىنا ساياحات جاساۋعا, تۋعان جەردىڭ سىرى مەن جىرىن, تىلسىم قۇپياسى مەن تاريحىن بىلۋگە جەتەلەيدى.
كىتاپ كىشكەنتاي وقىرمانداردىڭ كوڭىلىنەن شىعىپ ۇلگەردى دەۋگە بولادى. ويتكەنى, قازاق تىلىندە شىققان كىتاپتىڭ باسىم بولىگى ساتىلىپ كەتكەن.
«قۋىرشاق» تەاترىندا وتكەن تانىستىرىلىمعا تولىمبەك ءابدىرايىم, زاۋرە تورەحان, سەرىكبول حاسان سىندى بالالار جازۋشىلارى مەن اقىندارى, دارحان مىڭباي, ايگۇل مۇكەي جانە باسقا دا قوعام قايراتكەرلەرى مەن مەديا-تۇلعالار, جۋرناليستەر مەن بلوگەرلەر, سونداي-اق اتالمىش جوبا مەن كىتاپ اۆتورلارى, «شەۆرون» كومپانياسىنىڭ وكىلدەرى قاتىسىپ, بالالار ادەبيەتى توڭىرەگىندە پىكىر الماستى. اۆتورلار جوبا تاريحى مەن ونى جۇزەگە اسىرۋ بارىسى تۋرالى ايتىپ, ارىپتەستەرىنىڭ ساۋالدارىنا جاۋاپ بەردى.
ء«بىزدىڭ ينۆەستيتسيالارىمىز مۇناي-گاز وندىرىسىمەن عانا شەكتەلمەيدى. «شەۆرون» كومپانياسىنىڭ الەۋمەتتىك ينۆەستيتسيالارى قازاقستاندىقتاردىڭ ساپالى ءبىلىم الۋ, دەنساۋلىق ساقتاۋ مۇمكىندىكتەرىن كەڭەيتىپ, جاستارعا كاسىپكەرلىك پەن يننوۆاتسيا سالاسىندا بۇگىننەن باستاپ جاعداي جاسايدى. بۇگىن سەرىكتەستەرىمىزبەن بىرگە ماقتانىشپەن ۇسىنىپ وتىرعان كىتابىمىز جاس قازاقستاندىقتاردىڭ وقۋعا قۇشتارلىعىن ارتتىرىپ, سونىمەن قاتار, قورشاعان الەمگە قىزىعۋشىلىق تانىتىپ, ىزدەنىمپاز بولىپ وسۋىنە جاعىمدى ىقپالىن تيگىزەدى دەپ سەنەمىز. بۇل مەملەكەت بولاشاعى ءۇشىن دە وتە ماڭىزدى. بالاقايلار ءار ءوڭىردىڭ تىلسىم قۇپيالارىن وسى كىتاپتان تابادى دەپ ويلايمىز. بۇل كىتاپ كوپشىلىككە جەتسىن دەگەن ماقساتپەن كىتاپحانالارعا تاراتامىز», دەدى ەركىن زىكىباەۆ.
ايتا كەتسەك, بۇل كىتاپقا بالالار جازۋشىسى نۇراينا ساتپاەۆانىڭ اڭگىمەلەرى ەنگەن. ول الەمدەگى ونەرتابىستىڭ كوبى تابيعاتتىڭ تۋىندىسىنا قاراپ شىعارىلعانىن اتاپ ءوتىپ, بالالار ءۇشىن تابيعاتتى تانۋ ماڭىزدى ەكەنىن جەتكىزدى.
سونىمەن قاتار, ءىس-شاراعا دارحان مىڭباي ارنايى قاتىسىپ, قۇتتىقتاۋ ءسوز سويلەدى.
«بالالارعا ارنالعان كەز-كەلگەن كىتاپتى قۋانىشپەن قابىلداۋىمىز كەرەك. ەرەسەكتەرگە ارنالعان كىتاپتارعا قاراعاندا بالالار ادەبيەتىن قىزىعىراق قىلىپ جازۋ كەرەك. بۇگىندە يلليۋستراتسيا جاسايتىن ماماندار از. ال يلليۋستراتسياسىز كىتاپ - كىتاپ ەمەس. بالالارعا ارنالعان تۋىندىنىڭ پايداسى وزىمىزگە بىرنەشە ەسە بولىپ قايتادى», دەدى ول.
ال تولىمبەك ءابدىرايىم بالالارعا ارنالعان كىتاپتاردى قازاق تىلىندە شىعارۋدىڭ ماڭىزىن اتاپ ءوتىپ, وسىنداي كىتاپتاردى ءار ولكەگە ارناپ, جەكە-جەكە سەريا قىلىپ شىعارۋدى ۇسىندى. جازۋشى بۇل كىتاپتى وقىعان بالالار بولاشاقتا مىندەتتى تۇردە تۋعان جەردىڭ تابيعاتىن تانۋعا تالپىناتىن بولادى دەدى.
ءىس-شارانىڭ ەكىنشى بولىگى كىشكەنتاي وقىرمانداردىڭ قاتىسۋىمەن جالعاستى. ونىڭ بارىسىندا كىتاپ اۆتورلارىنىڭ ءبىرى نۇراينا ساتپاەۆا بالدىرعاندارعا ءوز حيكاياتىن وقىپ بەرسە, «قۋىرشاق» تەاترىنىڭ ارتىستەرى كىتاپقا كىرگەن شىعارما نەگىزىندە دايىنداعان شاعىن قويىلىمىن كورسەتتى. ال ۇيىمداستىرۋشىلار تەاترعا كەلگەن بارلىق بالاعا باسىلىمنىڭ ءبىر-ءبىر داناسىن تارتۋ ەتتى. ءبىر ايتا كەتەرلىگى, جاڭا كىتاپتىڭ ساتىلىمعا شىقپاعاندارى كوپشىلىككە قولجەتىمدى بولۋى ءۇشىن ەلىمىزدىڭ ءىرى كىتاپحانالارىنا, گالەرەيالارى مەن مادەني ورتالىقتارىنا تەگىن تاراتىلعان.
