قالاداعى قاتتى تۇرمىستىق قالدىقتاردى قايتا وڭدەۋ جانە كومۋ كومبيناتى 2019 جىلى «تازالىق-س» جشس-نە سەنىمگەرلىك باسقارۋعا بەرىلگەن. الايدا سەرىكتەستىك جاۋاپكەرشىلىگىنە العان نەگىزگى مىندەتتەلەمەلەردى ورىنداماعان, ياعني كومبينات ارنايى تەحنيكانىڭ جەتكىلىكتى سانىمەن قامتاماسىز ەتىلمەگەن, قاتتى-تۇرمىستىق قالدىقتاردى قايتا وڭدەۋ ءوندىرىسى كەڭەيتىلمەگەن, پوليمەرلى قۇبىرلار ءوندىرىسى ىسكە اسىرىلماعان.
جاڭاوزەن قالاسى پروكۋراتۋراسىنىڭ قاداعالاۋ اكتىسى بويىنشا قالا اكىمدىگى مامانداندىرىلعان اۋدانارالىق ەكونوميكالىق سوتىنا سەنىمگەرلىك شارتتى توقتاتا تۇرۋ تۋرالى تالاپ ارىز بەرىپ, ول تولىعىمەن قاناعاتتاندىرىلعان. اپەللياتسيالىق ساتىمەن جوعارىدا اتالعان سوتتىڭ شەشىمى وزگەرىسسىز قالدى. ناتيجەسىندە, بالانستىق قۇنى 1 ملرد تەڭگەدەن اساتىن م ۇلىكتىك كەشەن جەرگىلىكتى اتقارۋشى ورگاننىڭ كوممۋنالدىق مەنشىگىنە قايتارىلدى.
ەستەرىڭىزگە سالا كەتەيىك, قازىرگى تاڭدا جاڭاوزەندە «قازمۇنايگاز» ارنايى جۇمىس توبىنىڭ «وزەنمۇنايگاز» جانە قالانىڭ مۇناي سەرۆيس كاسىپورىندارىنىڭ قىزمەتىن تەكسەرۋ بويىنشا جۇمىسى جالعاسىپ جاتىر.
جۇمىس توبىنىڭ ماماندارى ءبىر ءتيپتى سۋ جىلىتۋ قوندىرعىلارىن قايتا جاڭارتۋ كەزىندە جۇمىس قۇنى اراسىنداعى ايتارلىقتاي ايىرماشىلىقتى دا انىقتاعان. «ماسەلەن, 3 سۋ جىلىتۋ قوندىرعىسىن (ۆگۋ-1 نگدۋ-3) قايتا جاڭارتۋدىڭ جالپى قۇنى قوسىلعان قۇن سالىعىمەن بىرگە 525 ملن 482 مىڭ تەڭگە بولعان, ال ءبىر عانا قوندىرعىنى (ۆگۋ-3ا-س نگدۋ-1) قايتا جاڭارتۋ قۇنى قوسىلعان قۇن سالىعىمەن بىرگە 380 ميلليون تەڭگەدەن اسىپ كەتكەن. بۇل – وسىعان ۇقساس نگدۋ-3 قوندىرعىسىن جوندەۋدەن 2 ەسە قىمبات. مۇنداي ۇلكەن ايىرماشىلىقتىڭ سەبەپتەرىن ماماندار انىقتاپ جاتىر», دەلىنگەن «قازمۇنايگاز» كومپانياسى تاراتقان حابارلامادا.
سونداي-اق ساتىپ الۋ قىزمەتىن باسقارۋ ستاندارتىنا سايكەس ومگ مەن «بەرالى ماڭعىستاۋ Company» جشس اراسىندا 2022 جىلى جالپى سوماسى 2 ميلليارد 582 ميلليون 699 مىڭ تەڭگەگە ۇڭعىمالاردى جەراستى جوندەۋ جۇمىستارىنا كەلىسىمشارتتار جاسالعان, جۇمىستىڭ جالپى كولەمى – 371 ۇڭعىمانى جەراستى جوندەۋ (نەمەسە 30 040,7 بريگادا-ساعات).
«تەكسەرۋ بارىسىندا ومگ بيۋدجەت كودەكسىنىڭ 97-بابىنىڭ 6-1 تارماعىن بۇزعانى, اتاپ ايتقاندا, جالپى سوماسى 26 ميلليون 951 مىڭ تەڭگەگە تەڭ, جۇمىس ۋاقىتى 300 ساعاتقا ارتىق كورسەتىلگەن ورىندالعان جۇمىس اكتىلەرىن قابىلداعانى انىقتالدى. سونىمەن قاتار ورىندالماعان جۇمىس كولەمى بەلگىلى بولدى. سەبەپتەرى ناقتىلانىپ جاتىر», دەلىنگەن حابارلامادا.
جۇمىس توبى ومگ «سامۇرىق-قازىنا» ۇاق اق ساتىپ الۋ ءتارتىبىنىڭ نورمالارىن ساقتاماي, 2022 جىلدىڭ جەلتوقسانىنان 2023 جىلدىڭ قاڭتارىنا دەيىن جانە 2023 جىلدىڭ ناۋرىزدان باستاپ قازىرگى ۋاقىتقا دەيىن «اي-95» ماركالى بەنزيندى جۇرگىزۋشىلەردىڭ جالاقى الاتىن كارتالارىنا قاراجات اۋدارۋ ارقىلى ساتىپ الىپ كەلگەنىن دە انىقتاپ وتىر.
سونداي-اق بيىل قاڭتاردا «وزەنمۇنايگاز» ساتىپ الۋ ءتارتىبىن بۇزا وتىرىپ, كۇندەلىكتى جانە (نەمەسە) اپتا سايىن قاجەت تاۋارلار, جۇمىستار مەن قىزمەتتەردى ساتىپ الۋعا بەكىتىلگەن تىزبەسىز كولەمى 69 توننا «اي-95» ماركالى بەنزين ساتىپ العان.
ماڭعىستاۋ وبلىسى
