قالا اكىمىنىڭ «ينتەرناتسيونالنىي», «كۇيگەنجار», «ميچۋرينو» ەلدى مەكەندەرىنىڭ تۇرعىندارىمەن كەزدەسۋىندە بىرقاتار ماسەلە قوزعالدى. مۇنداعى ماسەلەلەر نەگىزىنەن ينجەنەرلىك جەلىلەر, الەۋمەتتىك نىساندار, جولدار ساپاسى, جارىقتاندىرۋ جانە قيۋى قاشىپ تۇرعان باسقا دا جاعدايلارعا قاتىستى بولدى. وسى ورايدا تۇرعىندار اكىمگە سۋمەن جابدىقتاۋ, ەلەكتر ەنەرگياسى, اۆتوبۋستاردى ىسكە قوسۋ بويىنشا ناقتى سۇراقتارىن قويدى.
«جازدا قوسىمشا اۋىز سۋ ستانساسىن (سسس-3) ىسكە قوسۋدى كوزدەپ وتىرمىز. بۇل بۇكىل قالا بويىنشا سۋ ماسەلەسىن شەشۋگە مۇمكىندىك بەرەدى. سونداي-اق قالاعا جىلۋمەن, ەلەكترمەن جابدىقتاۋدا قوسىمشا كۇش بەرەتىن بىرقاتار تىرشىلىكتى قامتاماسىز ەتۋ جۇيەلەرى نىساندارىنىڭ قۇرىلىسىن اياقتاۋ جوسپاردا تۇر. سونىمەن قاتار بيىل 11 مەكتەپ, 6 مىڭعا جۋىق الەۋمەتتىك پاتەردى پايدالانۋعا تاپسىرامىز. بۇعان قوسا 14 مەكتەپ سالىنىپ جاتىر. سونداي-اق قالاعا 400-500 اۆتوبۋس جەتكىزەمىز, ەكى جىل ىشىندە ينۆەستورلار ەسەبىنەن 40-قا جۋىق بالاباقشا سالىنادى», دەپ جاۋاپ بەردى ج.قاسىمبەك.
كەزدەسۋدە قالا باسشىسى تۇرعىندار كوتەرگەن ماسەلەلەر شەشىلەتىنىن, ونىڭ ءبارى كەزەڭ-كەزەڭىمەن ىسكە اسىراتىنىن اتاپ ءوتتى.
مۇنىڭ الدىندا استانا اكىمى قۇرىلىسى ۇزاققا سوزىلعان نىسانداردىڭ ۇلەسكەرلەرىمەن دە كەزدەستى. اتاپ ايتقاندا, اكىم «زەرە-2», «ارابي 2 – گرانيتنىي 2», «ميرنىي دوم», «كورگالجينسكي كۆارتال» سياقتى قۇرىلىسى تۇرالاپ تۇرعان نىسانداردى ارالاپ شىقتى.
ء«بىز قۇرىلىسى سوزبالاڭعا سالىنعان نىسانداردى نازاردا ۇستايمىز. ويتكەنى تۇرعىنداردىڭ ماسەلەسىن شەشۋمەن قالا تىرشىلىگى جاندانا بەرەدى. سوندىقتان وسىنداي «ساقالدى» قۇرىلىسقا ءجىپسىز بايلانىپ, ءوز پاتەرىن 10 جىلداپ سارىلا كۇتىپ جۇرگەن تۇرعىنداردى قاشاندا قولداۋ كورسەتۋگە ءازىرمىز. ماسەلەگە كەلسەك, كەيبىر نىسانداردىڭ قۇرىلىسى كەستەدەن قالىپ بارادى, ال ەندى ءبىر جەرىندە قۇرىلىس ساپاسى كوڭىلگە قونىمسىز. قۇرىلىس سالۋشىلاردىڭ موينىندا جۇمىس قارقىنىن ارتتىرۋ, قۇرىلىس ماۋسىمىن بارىنشا پايدالانۋ, سول سياقتى ساپاعا ەرەكشە كوڭىل ءبولۋ مىندەتتەرى تۇر. جىلۋ بەرۋ ماۋسىمىنا دەيىن نىساندار جىلۋ جۇيەسىنە قوسىلۋى كەرەك. قۇرىلىس سالۋشىلار قاتارداعى جاي نىسان رەتىندە قاراستىرماۋى كەرەك, ونىڭ ارتىندا ءوز پاتەرىن جىلدار بويى كۇتىپ جۇرگەن جانداردىڭ تاعدىرى بار», دەيدى ەلوردا اكىمى.
