ءوز كەزەگىندە قالا اكىمى مۇرات ايتەنوۆ ءتۋرنيردىڭ سالتاناتتى اشىلۋىندا قاتىسۋشىلارعا ساتتىلىك تىلەپ, بۇل چەمپيوناتتىڭ جاستارىمىزدىڭ سپورتتىق الەۋەتىن ارتتىرىپ قانا قويماي, تەننيستە جاڭا بەلەستەردى باعىندىرۋدا ماڭىزى زور ەكەنىن اتاپ وتكەن ەدى. شاھار باسشىسى جارىستىڭ جاس ورەندەردىڭ تەننيسكە قىزىعۋشىلىعىن ارتتىراتىنىنا مول سەنىم ءبىلدىردى.
سونىمەن 16 جاسقا دەيىنگى قىزدار اراسىنداعى Juniors Billie Jean King كۋبوگى (كوماندالىق الەم چەمپيوناتى) ازيا – تىنىق مۇحيتى ايماعى بويىنشا ىرىكتەۋ ءتۋرنيرىنىڭ اقتىق سىنىندا ياروسلاۆا شۆەدوۆانىڭ شاكىرتتەرى جارىستىڭ ءبىرىنشى راكەتكالارى – جاپونيا قۇراماسىنا ەسە جىبەرىپ العانىمەن, العاش رەت كوماندالىق الەم چەمپيوناتىنا جولداما جەڭىپ الدى. ونىڭ الدىندا قازاقستان قىزدار قۇراماسى Billie Jean King كۋبوگىنىڭ بەس دۇركىن چەمپيونى اۋستراليا كومانداسىن 2:0 ەسەبىمەن ۇتقان ەدى. ەندى ۇلتتىق قۇراما تامىز ايىندا چەحيادا وتەتىن تەننيستەن الەم چەمپيوناتىندا باق سىنايدى. وعان وسى جارىستا العاشقى ءۇش ورىن العان توپتار عانا قاتىسادى. بىلتىر قازاقستان قۇراماسى ۇندىستانداعى جارىستا 4-ورىن الىپ, الەمدىك تەننيس دوداسىنا قاتىسۋعا مۇمكىندىكتەن ايىرىلىپ قالعان ەدى. بيىل ولجا سالىپ, الەمدىك چەمپيوناتقا جولدامانى جەڭىپ الىپ تۇر.
وسى قۋانىشقا وراي قازاقستان تەننيس فەدەراتسياسىنىڭ پرەزيدەنتى بولات وتەمۇراتوۆ ءوز پىكىرىن ءبىلدىردى.
«16 جاسقا دەيىنگى قىزدار قۇراماسىن الەم چەمپيوناتىنا جولداما الۋىمەن قۇتتىقتايمىن. كوماندا ءوز جەرىمىزدە ىرىكتەۋ ساتىسىنان ءساتتى ءوتىپ, كۇشتى قۇرامالاردى جەڭدى. اسىرەسە, جارتىلاي فينالدا جاسوسپىرىمدەر اراسىندا بيللي دجينگ كينگ كۋبوگىنىڭ بەس دۇركىن چەمپيونى – اۋستراليادان باسىم تۇسكەنى تاڭعاجايىپ وقيعا. فينالداعى تارتىستى باسەكەدە جاپونياعا جول بەرگەنىمەن, باستى مىندەت ورىندالدى. العاش رەت 16 جاسقا دەيىنگىلەر اراسىندا الەم چەمپيوناتىنا شىقتى. وسى جارىستا باپكەرلەر ءۇمىتىن اقتاعان ءجاسوسپىرىم قىزدار جوعارى دەڭگەيدە ونەر كورسەتە ءبىلدى. بۇل ءبىزدىڭ قازاقستان تەننيسىن دامىتۋداعى جولىمىزدىڭ دۇرىستىعىن كورسەتەدى. ىرىكتەۋ سايىسىنداعى جەڭىستەر الەم چەمپيوناتىندا جالعاسادى دەپ سەنەمىن», دەدى ب.وتەمۇراتوۆ.
مەگاپوليستەگى ۇلتتىق تەننيس ورتالىعىندا 16 جاسقا دەيىنگىلەر اراسىندا تەننيستەن الەم چەمپيوناتىنا ازيا – تىنىق مۇحيت ايماعى بويىنشا ىرىكتەۋ كەزەڭىنىڭ جەرەبەسى تارتىلىپ, بوزبالالار اراسىندا جارىس باستالدى. بۇل 7-13 مامىر ارالىعىندا وتەدى. چەمپيوناتقا 16 كوماندا قاتىسادى.
قازاقستان تەننيس فەدەراتسياسىنىڭ ۆيتسە-پرەزيدەنتى دياس دوسقاراەۆتىڭ ايتۋىنشا, حالىقارالىق تەننيس فەدەراتسياسى ەلىمىزدىڭ ءوتىنىشىن قابىلداپ, ماتچتى وتكىزۋگە ءدال شىمكەنت قالاسىن تاڭداعان. ويتكەنى مەگاپوليس اۋقىمدى جارىستى ۇيىمداستىرۋعا بارلىق تالابى جاعىنان قولايلى بولعان. بىرىنشىدەن, سپورتتىق ينفراقۇرىلىمى ۇنادى. ەكىنشىدەن, ويىنشىلاردىڭ ءجۇرىپ-تۇرۋىنا ىڭعايلى دەپ تانىلدى. قوناقۇي ماسەلەسى دە حالىقارالىق تەننيس فەدەراتسياسىنىڭ كوڭىلىنەن شىققان. 16 مەملەكەتتەن كوماندالار ۇشىپ كەلدى. ولاردى كۇتىپ الۋ, ورنالاستىرۋ جاعى دا جوعارى دەڭگەيدە ۇيىمداستىرىلدى. ۇلتتىق تەننيس ورتالىعى تەك جارىس الاڭى ەمەس, تاجىريبە الماسۋ ورنى بولدى دەسەك بولادى. ويتكەنى ەلىمىزدىڭ بارلىق وڭىرىنەن باپكەرلەر كەلىپ ويىندى تاماشالادى. ەكىنشى كوماندالار دا, جاسى كىشى سپورتشىلار دا ۇلتتىق قۇراماعا جانكۇيەر بولدى. ولار تەك جارىستىڭ قىزىعىن تاماشالاپ قويماي, مىقتى كوماندالاردىڭ ويىن ورنەگىن, ءادىس-تاسىلدەرىن دە باقىلاپ, ىشتەي وي ءتۇيىپ وتىردى.
تەننيس فەدەراتسياسىنىڭ ۆيتسە-پرەزيدەنتى د.دوسقاراەۆ بايانداعانداي ەلىمىز بويىنشا 400-دەن اسا كورت بار. سونىڭ ىشىندە شىمكەنتتە 40 كورتتىڭ يگىلىگىن تەننيسشىلەر كورىپ ءجۇر. ۇلتتىق تەننيس ورتالىعىنا 20 كورت تيەسىلى. ودان باسقا «سۇڭقار», «دينامو», «سپارتاك» سپورت كلۋبتارىندا جەكەمەنشىك كورتتار ورنالاسقان. دەي تۇرعانمەن حالقىنىڭ سانى ميلليوننان اساتىن مەگاپوليس ءۇشىن ءالى دە كورتتار كەرەك.
«وسىدان ەكى جىل بۇرىن قالا اكىمى مۇرات ايتەنوۆ پەن فەدەراتسيا پرەزيدەنتى بولات وتەمۇراتوۆ ارنايى كەلىسىم جاساپ, تەننيس سپورتىن دامىتۋعا ۋاعدالاستى. وسىعان وراي ارنايى جوبا جاسالىپ, ول قازىرگى كۇنى دايىن تۇر. وسى جوبا اياسىندا بيىل ۇلكەن تەننيس سپورت كەشەنىنىڭ قۇرىلىسى شىمسيتي اۋماعىندا باستالادى. بۇل شاھارداعى ەكىنشى ۇلكەن تەننيس ورتالىعىنا اينالادى. جىلدان جىلعا بالالار سانى كوبەيىپ كەلەدى. سونىڭ ەسەبىنەن تەننيس سپورتىنا دا قىزىعۋشىلىق ارتىپ جاتىر. حالىقارالىق دارەجەدە سپورتشىلارىمىز ۇلكەن ناتيجەلەر كورسەتىپ جاتقان سوڭ دا بالالاردا تەننيسشى بولسام دەگەن جاقسى وي قالىپتاسۋدا. تەننيس – ەلىمىزدە كەيىنگى جىلدارى تەز دامىپ كەلە جاتقان سپورتتىڭ ءبىرى. بۇكىل ەلىمىز بويىنشا بۇگىندە تەننيس سەكتسيالارى تولىپ تۇر. تەننيس سپورتىن قولعا الۋ 2007 جىلدان باستالدى. فەدەراتسيانىڭ جاڭا پرەزيدەنتى ينفراقۇرىلىمدى دامىتۋعا ءوز ەسەبىنەن مول قاراجات قۇيدى. قوسىمشا دەمەۋشىلەر دە تارتىلدى. ادامداردىڭ بۇل سپورتقا اۋەستىگى دە وسە ءتۇستى. 2007 جىلى 500 ادام تەننيسپەن اينالىسسا, بۇگىندە ولاردىڭ سانى 30 مىڭنان استى. تەننيسكە قىزىعۋشىلىقتى ارتتىرۋ ءۇشىن 10 جاسقا دەيىنگى بالالارعا ارنالعان «بەيبي تەننيس» باعدارلاماسى قۇرىلدى. ودان بولەك «Team Kazakhstan» اكادەمياسى اشىلدى. وعان دارىندى ويىنشىلاردى وڭىرلەردەن ىرىكتەپ الامىز» دەدى د.دوسقاراەۆ.
تەننيس فەدەراتسياسىنىڭ وكىلى شىمكەنتتەن شىققان تالانتتى ورەندەردى دە اتاپ ءوتتى. ولاردىڭ ىشىندە 12 جاسقا دەيىنگى ۇلتتىق قۇراما ساپىندا ونەر كورسەتەتىن سابينا شۇحراتوۆا, سول سەكىلدى نيكيتا نيكولەنكو سىندى جاقسى ويىنشىلار بار. سونداي-اق مەگاپوليستى تەننيس سپورتى ءۇشىن ەرەكشە ماڭىزدى ايماق سانايدى. سەبەبى تەننيس جازعى سپورت تۇرىنە كىرەتىندىكتەن قىستان كەيىن ەڭ ءبىرىنشى سىرتقى كورتتا ويىن باستايتىن شىمشاھار سانالادى. ينفراقۇرىلىمى جاقسى بولعاندىقتان وزبەكستاننىڭ قۇراما كومانداسى وسىندا جاتتىعۋ جاساپ تۇرادى. ۇلتتىق تەننيس ورتالىعى رەسپۋبليكالىق سپورت كەشەنىنە جاتپايدى. بۇل جەردە الەمدىك تەننيس دوداسىنا ليتسەنزيالىق جارىستار ۇيىمداستىرىلادى. تەننيستەن حالىقارالىق ازيا فەدەراتسياسىنىڭ ورتالىعى بولىپ سانالادى. «ۇلكەن دۋلىعاعا» جول سالۋ ءۇشىن ازيانىڭ مىقتى راكەتكالارى وسىندا دايىندالادى. رەسپۋبليكالىق تەننيس فەدەراتسياسىنىڭ شىمكەنت فيليالىندا 20 ادام جۇمىس ىستەيدى. ولار قۇراما كوماندانى قازاقستان كۋبوگىنە, شەتەلدىك جارىستارعا باپتايدى. سونىمەن بىرگە بۇگىنگىدەي حالىقارالىق جارىستاردى وتكىزۋگە اتسالىسادى.
تەننيستىڭ ارتىقشىلىعى تۋرالى ايتقان مامان بۇل سپورتتىڭ جەكەلەي سىنعا ارنالعانىن بايان ەتتى. سوندىقتان شەشىم قابىلداۋ جەكە سپورتشىنىڭ وزىنە بايلانىستى بولادى. سونىمەن بىرگە تەننيس سپورتشىنىڭ بويىندا قايسار مىنەز, تاباندىلىق ءوز-وزىنە دەگەن جاۋاپكەرشىلىكتى سەزىنۋدى قالىپتاستىرادى. راكەتكامەن دوپتى ۇرۋ تەك قيمىل-قوزعالىس ەمەس, ول سونىمەن قاتار دەنە بۇلشىقەتى مەن ميدى دامىتادى. تەننيس تە شاحمات سەكىلدى. الداعى ويىنىڭدى جوسپارلاپ وتىراسىڭ. بىراق مۇندا تەز شەشىم قابىلداۋ كەرەك. الەمنىڭ كوپتەگەن زەرتتەۋشىسى 5 جىل بويى قاي سپورت ادامعا پايدالى ەكەنىن زەرتتەپتى. سوندا تەننيس ءبىرىنشى ورىن العان. ويتكەنى جوعارىدا ايتىلعانداي تەننيستە كوز دە, مي دا, اياقتان باستاپ بۇكىل دەنە قيمىل-قوزعالىستا بولادى. سونداي-اق ءاربىر ماتچ الدىندا ويىنشىلار ءبىر-ءبىرىن سىيلاۋعا, ەرەجەنى بۇزباۋعا انت بەرەدى. سوندىقتان د.دوسقاراەۆ تەننيستى ادامدى ىزگىلىككە, تارتىپكە تاربيەلەيتىن ەڭ ارداقتى سپورتقا جاتقىزادى.
ەكى مىڭىنشى جىلداردىڭ باسىندا تەننيسپەن شۇعىلدانۋ سپورتشىلارعا قىمباتقا تۇسەتىن. ونىمەن نەگىزىنەن قالتالى ازاماتتار اينالىساتىن. دەي تۇرعانمەن ەلىمىزدىڭ تەننيس فەدەراتسياسى تەننيستى بۇقارالىق سپورتقا اينالدىرۋ ءۇشىن الدىنا ءۇش ستراتەگيالىق ماقسات قويدى. ول بىرىنشىدەن كورتتار سانىن كوبەيتۋ ياعني ينفراقۇرىلىمدى دامىتۋ. ەكىنشىدەن, جوعارى دارەجەلى بىلىكتى باپكەرلەردى دايىنداۋ. ۇشىنشىدەن, تاجىريبە الماسۋ ءۇشىن ءتۇرلى حالىقارالىق جارىستار ۇيىمداستىرۋ. مىنە وسى ماقساتتىڭ ۇشەۋى دە شىمكەنت قالاسىندا ءساتتى جۇزەگە اسىپ كەلەدى. وسىنداي جۇمىستاردىڭ ناتيجەسىندە تەننيس سپورتىنىڭ باعاسى ارزاندادى. باپكەرلەر سانى ارتتى. شىمشاھاردا 1994 جىلى 2 توپىراقتى كورت سالىنعانىن ايتادى مامان. ونىڭ الدىندا سپورتشىلار اسفالتتا ويناعان. كەيىن 2004 جىلى سۇڭقاردا 4 كورت بوي كوتەردى. 2010 جىلى ۇلتتىق تەننيس ورتالىعى اشىلادى. سودان سوڭ قوسىمشا 8 كورت پايدا بولدى. مەگاپوليستە جان باسىنا قارجىلاندىرۋ باعدارلاماسى – ارتسپورتى بويىنشا 190 بالا تەننيستەن تەگىن سەكتسيالارعا قاتىسىپ ءجۇر. ال 20 كورتپەن جابدىقتالعان بۇل ورتالىقتا قازىر 500-دەن اسا كاسىبي سپورتشى جاتتىعۋدا. قازاقستاندا 10 جاسقا دەيىنگى دارىندى بالالاردى ءدال وسى سپورت بويىنشا ىرىكتەپ الۋعا ارنالعان باعدارلاما جۇمىس ىستەيدى. وعان جىلىنا 115 مىڭ دوللار بولىنەدى. بۇل قاراجاتقا تەننيسكە قاجەتتى بارلىق ويىن قۇرالدارى ساتىپ الىنادى. فەدەراتسيا سونى بارلىق وڭىرگە تەڭدەي ۇلەستىرىپ بەرەدى. ەندى فەدەراتسيا ۇلكەن قالالاردا ەمەس, اۋداندار مەن شالعاي اۋىلداردا دا تەننيس سپورتىن دامىتۋدى الدىنا ماقسات قويىپ وتىر.
مەگاپوليستە تەننيستەن 30 باپكەر جۇمىس ىستەيدى. جالپى شىمكەنت, استانا مەن الماتى سەكىلدى رەسپۋبليكاداعى تەننيس سپورتى دامىعان قالالاردىڭ الدىڭعى ۇشتىگىنە كىرەدى.
شىمكەنت
