ءىس-شارادا بايانداما جاساعان ىشكى ىستەر ءمينيسترىنىڭ ءبىرىنشى ورىنباسارى, پوليتسيا گەنەرال-لەيتەنانتى مارات قوجاەۆ مەملەكەت باسشىسى العا قويعان ستراتەگيالىق مىندەتتەردىڭ باسىم باعىتتارىن جۇزەگە اسىرۋ اياسىندا ىشكى ىستەر ورگاندارىندا ىشكى جۇيەلىكتى قايتا قۇرۋ ماقساتىندا جاسالىپ جاتقان جۇمىستارعا كەڭىنەن توقتالدى.
«ادىلەتتى قازاقستاندى قۇرۋ جولىنداعى ەڭ باستى باعىتتاردىڭ ءبىرى – قوعامدىق قاۋىپسىزدىكتى قامتاماسىز ەتۋ. ىشكى ىستەر مينيسترلىگى – ەلدەگى ەڭ ءىرى جانە جۇمىس باعىتى اۋقىمدى قۇقىق قورعاۋ ورگانى. ەلىمىزدە تىركەلەتىن بارلىق قىلمىستىق ىستەردىڭ – 96, ال اكىمشىلىك ءوندىرىستىڭ 97 پايىزىن ىشكى ىستەر ورگاندارى جۇرگىزەدى. وعان قوسا, مەملەكەتتىك قىزمەتتەردىڭ 39 ءتۇرى بويىنشا جىل سايىن 10 ميلليوننان استام قىزمەت كورسەتەدى. ياعني حالىقپەن ەڭ ءجيى جانە تىعىز جۇمىس ىستەيتىن ورگان – ول پوليتسيا», دەگەن ءمينيستردىڭ ءبىرىنشى ورىنباسارى بۇگىندە ەل پوليتسياسى زاماناۋي سەرۆيستىك مودەلگە كوشىپ جاتقانىن ايتتى.
ونىڭ ايتۋىنشا, زاماناۋي سەرۆيستىك مودەلدىڭ نەگىزگى قاعيدالارىنا زاڭدىلىق, جان-جاقتىلىق, ادەپتىلىك, حاباردارلىق جانە جەدەلدىك جاتادى. بۇل ماسەلەلەر قوعاممەن بىرگە قاۋىپسىزدىكتى قامتاماسىز ەتۋ تۇجىرىمداماسىندا كوزدەلگەن. قۇجاتتىڭ باستى ەرەكشەلىگى – قوعامدىق قاۋىپسىزدىكتى قامتاماسىز ەتۋ سالاسىنداعى جيناقتالعان جۇيەلى پروبلەمالاردىڭ سەبەبىن جويۋ.
مارات قوجاەۆ ستراتەگيالىق قۇجاتتىڭ نەگىزگى باعىتتارىنا كەڭىنەن توقتالدى. سونىڭ ءبىرى – ىشكى ىستەر ورگاندارى جۇمىسىن تسيفرلاندىرۋدى جالعاستىرۋ. ونىڭ ايتۋىنشا, كەيىنگى جىلدارى ءتارتىپ ساقشىلارىنا كولىكتەردى سەبەپسىز توقتاتۋعا تىيىم سالىندى. بىراق ونىڭ ورنىنا باسقا ەشقانداي شارالار ەنگىزىلگەن جوق. سونىڭ سالدارىنان جول ەرەجەسىن ورەسكەل بۇزاتىن كولىك جۇرگىزۋشىلەرىنىڭ قاتارى ارتقان.
– جول قوزعالىسىن قاداعالاۋ ۇدەرىستەرىن تسيفرلاندىرىپ جاتىرمىز. اتاپ ايتقاندا, ەرەجە بۇزۋ فاكتىلەرىن انىقتايتىن اۆتوماتتى جۇيەلەردى كوبەيتتىك. بۇگىندە ولاردىڭ سانى 18 مىڭنان اسادى. وتكەن جىلدىڭ وزىندە ولار 4 ميلليوننان استام زاڭ بۇزۋشىلىقتى انىقتادى. مۇنداي كامەرالار جۇرگىزۋشىلەردى تارتىپكە كەلتىرىپ جاتىر, – دەدى ول.
بۇدان بولەك, ءمينيستردىڭ ءبىرىنشى ورىنباسارى قىلمىستىق ىستەردى تسيفرلاندىرۋ, ءىىو اۆتو-شارۋاشىلىقتارىن جاڭارتۋ, ءمودۋلدى پوستتار ورناتۋ, پوليتسيا قىزمەتكەرلەرىن الەۋمەتتىك قورعاۋ سەكىلدى وزەكتى ماسەلەلەرگە توقتالىپ, جۋرناليستەردىڭ سۇراقتارىنا جاۋاپ بەردى.
