ەلوردامىزداعى ەكىنشى دۇنيەجۇزىلىك سوعىس جاۋىنگەرلەرىنە ارنالعان مونۋمەنتالدى كەشەنگە گۇل شوقتارىن قويۋ راسىمىنە قورعانىس ءمينيسترى, گەنەرال-پولكوۆنيك رۋسلان جاقسىلىقوۆ قاتىستى. قازا تاپقان باتىرلار ەرلىگىنە قۇرمەت كورسەتۋ ءۇشىن مونۋمەنتكە قورعانىس مينيسترلىگىنىڭ باسشىلىعى, اقمولا گارنيزونىنىڭ اسكەري قىزمەتشىلەرى, قارۋلى كۇشتەر مەن سوعىس ارداگەرلەرى, تىل ەڭبەككەرلەرى, «جاس سارباز» بالالار-جاسوسپىرىمدەر اسكەري-پاتريوتتىق قوزعالىسىنىڭ تاربيەلەنۋشىلەرى كەلدى. ءىس-شاراعا قاتىسۋشىلار قازا تاپقان باتىرلاردى ءبىر مينۋت ۇنسىزدىكپەن ەسكە الدى. ءراسىم سوڭىندا قورعانىس ءمينيسترى, گەنەرال-پولكوۆنيك رۋسلان جاقسىلىقوۆ جينالعانداردى جەڭىس كۇنىمەن قۇتتىقتادى.
– بۇل مەرەكە – الەمدى فاشيزمنەن قورعاپ قالعان اعا بۋىننىڭ ەرلىگىن ەسكە الىپ, ريزاشىلىق بىلدىرەتىن كۇن. بۇگىنگى ۇرپاق بەيبىتشىلىكتىڭ قادىرىن سەزىنىپ, بىرلىك پەن ىنتىماقتى ساقتاۋعا ۇلەسىن قوسسا, ەل ەرتەڭى جارقىن, كەلەشەگىمىز كەمەل بولارى ءسوزسىز, – دەدى مينيستر.
قازىر ەلىمىزدە 222 سوعىس ارداگەرى بار بولسا, سولاردىڭ 9-ى تاراز قالاسىندا تۇرادى. مەرەكە قارساڭىندا وڭىرلىك گارنيزون قىزمەتشىلەرى ءاربىر ارداگەردىڭ ۇيىنە بارىپ, سىي-سىياپاتتارىن تابىستادى. ولاردىڭ شاڭىراقتارىنا وبلىس اكىمى نۇرجان نۇرجىگىتوۆ تە باس سۇقتى.
بۇگىندە مايدانگەرلەردىڭ ءبارى دە عاسىر جاساعان اتا-اجەلەر. سوعىس باستالعاندا كامەلەت جاسىنا, ياعني 18-گە تولعان بوزبالالاردىڭ ءوزى بيىل 100-گە كەلەدى ەكەن. سولاردىڭ ءبىرى – قاراعاندى قالاسىندا تۇراتىن 97 جاستاعى يسماگيل گاليۋللين. ول مايداندا ايگىلى ت-34 تانكىسىن ايداعان. قۇتتىقتاي كەلگەن قاراعاندى گارنيزونىنىڭ اسكەرى قىزمەتشىلەرىنە مايدانگەر 2014 جىلى «سپاسسك» پوليگونىنا بارعانى جايىندا ايتىپ بەردى. سول كەزدىڭ وزىندە ونىڭ جاسى 88-دە كەلىپ قالسا دا, قازىرگى قورعانىس ءمينيسترىنىڭ ورىنباسارى, گەنەرال سۇلتان كامالەتدينوۆپەن بىرگە ت-72ب تانكىسىنە وتىرىپ, جۇرگىزۋ نورماتيۆتەرىن «وتە جاقسى» دەگەن باعاعا ورىنداعانىن ەسكە الدى.
قوناەۆ قالاسىندا جاسى 103-كە قاراعان وكسانا بەتەباەۆا ەسىمدى ارداگەر تۇرادى. بۇگىندە قالانىڭ قۇرمەتتى ازاماتى. ول 1941 جىلى 20 جاسىندا ءوز ەركىمەن اسكەر قاتارىنا سۇرانىپ, شۋيا قالاسىنىڭ اسكەري گوسپيتالىندە ەڭبەك ەتىپتى. قوناەۆ گارنيزونى اسكەري پوليتسيا ءبولىمىنىڭ اسكەري قىزمەتشىلەرى ونىڭ شاڭىراعىنا ارنايى بارىپ, مەرەكەمەن قۇتتىقتاپ قايتتى.
الماتى قالاسىندا تۇراتىن 102 جاستاعى اديش ءابدىرايىموۆ تا بۇل كۇنى قۇرمەتتەن كەندە قالعان جوق. ارداگەر 9 مامىردا دۇنيەگە كەلگەن. مايدانعا اتتانعان ول تۇتقىنعا ءتۇسىپ, گەرمانياداعى «نويەنگاممە» كونتسلاگەرىندە وتىرعان. الماتى وبلىسى قاراساي اۋدانى قورعانىس ىستەرى جونىندەگى ءبولىمىنىڭ اسكەري قىزمەتشىلەرى ارداگەردى تۋعان كۇنىمەن جانە جەڭىس كۇنىمەن قۇتتىقتادى.
18 جاسىندا ءوز ەركىمەن مايدانعا اتتانعان وسكەمەندىك ەۆگەني فەدوروۆيچ ي.ۆ. پانفيلوۆ اتىنداعى 8-گۆارديالىق اتقىشتار ديۆيزياسىنىڭ قۇرامىندا سوعىسقان. ءفاشيزمدى جەڭۋگە ءوز ۇلەسىن قوسقان ارداگەردى وسكەمەن گارنيزونىنىڭ اسكەري قىزمەتشىلەرى ارنايى بارىپ قۇتتىقتادى.
ال قورعانىس مينيسترلىگىنىڭ گۆاردەيسك گارنيزونىندا جەڭىس كۇنىنە وراي ۇيىمداستىرىلعان سالتاناتتى جيىندا اتى اڭىزعا اينالعان قولباسشى باۋىرجان مومىش ۇلىنىڭ كەلىنى, جازۋشى زەينەپ احمەتوۆا قوناقتا بولدى. ول اسكەري قىزمەتشىلەر الدىندا ءسوز سويلەپ, بەيبىتشىلىكتىڭ قادىرى, قازاقتىڭ سالت-ءداستۇرى مەن ادەت-عۇرىپتارى جايىندا ءسوز سويلەدى.
