وسى ورايدا مەگاپوليستىڭ 2021-2025 جىلدارعا ارنالعان دامۋ جوسپارىندا سپورت سالاسىن دامىتۋ ماسەلەسى قامتىلعان. وسىعان بايلانىستى ناقتى كورسەتكىشتەر مەن ينديكاتورلار بەلگىلەنگەن. سونىڭ تىزبەسىندە حالىقتى جالپى سپورتقا تارتۋ جوسپارى 4 باعىتقا نەگىزدەلگەن.
بىرىنشىدەن, دەنە شىنىقتىرۋمەن جانە سپورتپەن اينالىساتىن ازاماتتاردىڭ سانىن جالپى حالىقتىڭ ەلۋ پايىزىنا دەيىن جەتكىزۋ ماقساتى تۇر. ەكىنشىدەن, قالا تۇرعىندارى مىڭ ادامعا ارنالعان سپورتتىق ينفراقۇرىلىمدارمەن قامتاماسىز ەتىلۋگە ءتيىس. ۇشىنشىدەن, دەنە شىنىقتىرۋمەن جانە سپورتپەن جۇيەلى تۇردە اينالىساتىن مۇمكىندىگى شەكتەۋلى جانداردىڭ قاتارىن ارتتىرۋ كوزدەلىپ وتىر. تورتىنشىدەن, سپورتقا قۇمار جاستار (14-18 جاس) سانىن كوبەيتۋ جوسپارى تۇر.
مەجەنىڭ ورىندالۋىنا كەلسەك, بىلتىردىڭ قورىتىندىسى بويىنشا قالاداعى دەنە شىنىقتىرۋ جانە سپورتپەن جۇيەلى شۇعىلدانۋشىلار سانى 498 852 ادامدى (42%) قۇرادى. سونداي-اق وتكەن جىلى «On Fit» سپورت كەشەنى, «World class-2» سپورت كەشەنى, «Urpaq» سپورت نىسانى, «Turan گXA» سپورت نىسانى پايدالانۋعا بەرىلىپ, حالىقتى سپورتتىق ينفراقۇرىلىمدارمەن قامتاماسىز ەتۋ كورسەتكىشى 60 پايىزعا ورىندالدى. قازىرگى ۋاقىتتا قالا اۋماعىندا دەنە شىنىقتىرۋ جانە سپورتپەن اينالىسۋعا قارسى كورسەتىلىمى جوق 15 644 مۇگەدەك تۇرادى, ونىڭ 2 036-ى سپورتپەن شۇعىلدانادى. سوڭعى جوسپارعا سايكەس بۇگىندە 45 مىڭنان اسا جاس سپورت ۇيىرمەلەرىنە بارادى.
«2023 جىلدىڭ ءى توقسانىندا وتكىزىلگەن بۇقارالىق سپورتتىق ءىس-شارالار تۋرالى ايتساق, قالا مەكتەپتەرى اراسىندا فۋتبول, ۆولەيبول, باسكەتبول, شاحمات سياقتى سپورت تۇرلەرىنەن ناۋرىز-ماۋسىم ايلارى ارالىعىندا 526 كوماندا قۇرامىنداعى 6 240 بالا قاتىساتىن «شىمكەنت جاستار ليگاسى» وتەدى. سونداي-اق بيىل زاماناۋي اتشاباردىڭ اشىلۋىنا جانە «ناۋرىز شىمكەنتتەن باستالادى» اتتى اۋقىمدى مەرەكەلىك ءىس-شاراعا وراي سپورتتىڭ 9 تۇرىنەن (قازاق كۇرەسى, بايگە, كوكپار, جامبى اتۋ, ءداستۇرلى ساداق اتۋ, اسىق اتۋ, تەڭگە ءىلۋ, اۋدارىسپاق جانە توعىزقۇمالاق) «Great qazaq games» ۇلتتىق ويىندارى وتكەنى بەلگىلى. ۇلتتىق ويىندارعا ەلىمىزدىڭ ءار وڭىرىنەن جانە شەتەلدەردەن جالپى مىڭنان اسا سپورتشى قاتىستى. ونىڭ ىشىندە قىرعىزستان, وزبەكستان, مونعوليا, قىتاي, رەسەي, تاجىكستان, پولشا, ساۋد ارابياسى, تۇركيا مەملەكەتتەرىنەن دە ورەندەر بولدى» دەدى قالالىق دەنە شىنىقتىرۋ جانە سپورت باسقارماسىنىڭ باسشىسى باۋىرجان تۇمانباەۆ.
شىمكەنتتە جالپى 34 سپورتتىق ۇيىم جۇمىس ىستەيدى. وسى سپورت ۇيىمدارىندا 18 242 سپورتشى مەن شتاتتاعى 906 جاتتىقتىرۋشى وقۋ-جاتتىعۋ ساباقتارىن جۇرگىزۋدە. بالالار مەن جاسوسپىرىمدەر اتالعان مەكەمەلەردە سپورتتىڭ 75 ءتۇرى بويىنشا جاتتىعادى. ونىڭ 37-ءى وليمپيادالىق, 28-ءى وليمپيادالىق ەمەس جانە 10-ى ۇلتتىق سپورت تۇرلەرىنە كىرەدى. جوعارى سپورتتىق جەتىستىكتەر بويىنشا 2023 جىلدىڭ 3 ايداعى جەتكەن ناتيجەلەرى جايلى بايانداساق, قالا سپورتشىلارى قازاقستان رەسپۋبليكاسىنىڭ بىرنەشە چەمپيوناتتارىنا قاتىسىپ, 185 التىن, 182 كۇمىس, 180 قولا مەدال جەڭىپ الدى. جالپى مەدال سانى – 547. ازيا چەمپيوناتتارىندا شىمكەنتتىك ورەندەر 6 التىن, 9 كۇمىس جانە 10 قولاعا قول جەتكىزسە (جالپى 25 مەدال), وسى ۋاقىت اراسىندا الەم چەمپيوناتتارىندا 1 قولا مەدالعا يە بولدى. ماسەلەن, 2023 جىلدىڭ 16-27 قاڭتارى ارالىعىندا بانگكوك قالاسىندا بوكستان 22 جاسقا دەيىنگى جاستار اراسىندا وتكەن ازيا چەمپيوناتىندا 57 كگ سالماقتا سابىرحان ماحمۋد 1-ورىن, 67 كيلودا ونەر كورسەتكەن ابزال سەرىك 2-ورىن جانە 75 كگ سالماقتا شارشى الاڭعا شىققان ديداي دانا 3-ورىندى يەلەندى. وسى سالاعا جاۋاپتى باسقارمانىڭ بەرگەن مالىمەتىنە سايكەس بيىل 3 ايدىڭ قورىتىندىسى بويىنشا ەڭبەگى سىڭگەن 1 سپورت شەبەرى, 5 حالىقارالىق دارەجەدەگى سپورت شەبەرى, 29 قازاقستان رەسپۋبليكاسىنىڭ سپورت شەبەرى, 46 سپورت شەبەرىنە ۇمىتكەر سپورتشىلار دايىندالدى. سونىمەن قاتار ۇلتتىق قۇراما ساپىنداعى ەرەسەكتەر قۇراماسىنا – 427, جاستار قۇراماسىنا – 353, جاسوسپىرىمدەر قۇراماسىنا 331 سپورتشى ەندى. جالپى, 1 111 سپورتشى ۇلتتىق قۇراما ىشىندە ەل نامىسىن قورعايدى.
ءوز كەزەگىندە حالىقتى سالاماتتى ءومىر سالتىن ۇستانۋعا بەيىمدەۋ ماقساتىندا قالا تۇرعىندارىنىڭ قاتىسۋىمەن اۋقىمدى سپورتتىق ءىس-شارالار ۇيىمداستىرۋ جوسپاردا بار. مۇنان وزگە, شاھارداعى تانىمال سپورتشىلاردىڭ جاستارمەن كەزدەسۋىن وتكىزۋ, سپورتتىق بەينەروليكتەر دايىنداپ الەۋمەتتىك جەلىلەرگە جاريالاۋ جۇمىستارى جۇرگىزىلمەك.
«باسقارماعا سپورت سالاسىنا قاتىستى تۇسكەن حاتتامالىق تاپسىرمالار باقىلاۋعا الىنىپ, بارلىق جوسپاردى تۇراقتى ورىنداپ كەلەمىز. ءوز كەزەگىندە قالا اكىمى م.ايتەنوۆتىڭ حالىقپەن كەزدەسۋىندە وسى سالاعا قاتىستى بىرنەشە ماسەلە كوتەرىلگەن بولاتىن. سونىڭ ىشىندە مۇمكىندىگى شەكتەۋلى ازامات, سپورتشى ە.قالىمبەتوۆكە 1-قاباتتان 2 بولمەلى پاتەر الىپ بەرۋ كەرەك بولعان. بۇگىنگى تاڭدا بۇل ماسەلە ءوز شەشىمىن تاپتى», دەدى باسقارما باسشىسى ب.تۇمانباەۆ.
سونداي-اق بيىل 17 قىركۇيەك كۇنى 5 مىڭنان اسا قالا تۇرعىنىنىڭ قاتىسۋىمەن «شىمكەنت مارافون» سپورتتىق ءىس-شاراسىن وتكىزۋ جوسپارلانىپ وتىر. سونىمەن قاتار قالا جاسوسپىرىمدەرى اراسىندا فۋتبولدان چەمپيونات, مەملەكەتتىك قىزمەتشىلەر, مەديتسينا, قۇقىق قورعاۋ, بۇقارالىق اقپارات قۇرالدارى قىزمەتكەرلەرى اراسىندا سپارتاكيادا, ۇلتتىق سپورت تۇرلەرىنەن مەكتەپ وقۋشىلارى اراسىندا جارىس, شىمكەنت قالاسىنىڭ قىزدار اراسىندا فۋتبولدان چەمپيونات وتكىزۋ جوسپارلانىپ, اتالعان سپورتتىق ءىس-شارالارعا 42 مىڭ قالا تۇرعىنى مەن سپورتشىلار قاتىسادى دەپ كۇتىلۋدە.
بيىل حالىقارالىق جانە رەسپۋبليكالىق دەڭگەيدەگى جارىستاردى وتكىزۋگە ارنالعان 3 سپورتتىق نىسان اشىلادى دەپ جوسپارلانعان بولسا, جىل باسىنان بەرى ەكى نىسان اشىلىپ, پايدالانۋعا بەرىلدى. سولاردىڭ ءبىرى – ۇستەل تەننيسى سپورت كەشەنى. قۇرىلىستى «وتاۋ ستروي» كومپانياسى جۇرگىزدى, نىساننىڭ جالپى اۋماعى 2 مىڭ شارشى مەتردى الىپ جاتىر. جوبانىڭ جالپى قۇنى – 1,2 ملرد تەڭگە. مامانداندىرىلعان زالدا 12 ۇستەل قاراستىرىلعان جانە تەك ايماقتا عانا ەمەس, رەسپۋبليكا كولەمىندەگى تەننيسشىلەر جارىستارعا دايىندالىپ, وقۋ-جاتتىعۋ جيىندارىن وتكىزىپ, تۋرنيرلەر ۇيىمداستىرا الادى. جوباداعى ءۇشىنشى نىسان – «مەتاللۋرگ» ستاديونى. قازىرگى تاڭدا ستاديوننىڭ رەكونسترۋكتسيالاۋ جۇمىستارى اياقتالۋعا تاياۋ. جوبا قۇنى – 3 813,5 ملن تەڭگە. جاڭارتىلعان نىساندا سپورتشىلار ءۇيى, ويىن تۇرلەرىنە ارنالعان 2 سپورت زال, جەكپە-جەك سپورت تۇرلەرىنە ارنالعان 2 سپورت زال, 1 504 ورىندىقتى فۋتبول ستاديونى قاراستىرىلعان.
قايتا قالپىنا كەلتىرۋ جۇمىستارى «جۇمىسپەن قامتۋدىڭ جول كارتاسى» باعدارلاماسى اياسىندا وتكەن جىلدىڭ ناۋرىز ايىندا قولعا الىنعان. مەردىگەر مەكەمە – «يۋگسترويسەرۆيس-ن» جشس. قازىرگى تاڭدا قۇرىلىس-مونتاجداۋ جۇمىستارى اياقتالۋعا جاقىن قالدى. نىساننىڭ قۇرىلىسىنا 60 جۇمىسشى, 5 تەحنيكا جۇمىلدىرىلعان. قۇرىلىستى جىل سوڭىنا دەيىن تاپسىرۋ كوزدەلۋدە. ايتا كەتەيىك, سپورت كەشەنى وتكەن عاسىردىڭ 70-جىلدارى سالىنعان جانە 2017 جىلى اكىمدىك بالانسىنا وتكەن. جوسپارعا ساي مۇندا تەك فۋتبول عانا ويناپ قويمايدى. سونىمەن بىرگە سپورتتىڭ 11 تۇرىمەن اينالىسادى. 1500 ادامعا ارنالعان مىنبەر بار, سونداي-اق اكىمشىلىك-تۇرمىستىق كورپۋس, كوماندالىق ويىندارعا ارنالعان سپورت زالدار مەن شىمكەنتتە تۇڭعىش رەت سپورتشىلار ءۇيى اشىلادى.
«بۇقارالىق سپورتتىڭ دامۋ قاجەتتى سپورتتىق ينفراقۇرىلىمعا بايلانىستى. قالادا ستاتيستيكالىق ەسەپ بويىنشا 1 077 سپورتتىق نىسان بولسا, سونىڭ 150-ءى – جەكەمەنشىكتە. بيىل 6 سپورت نىسانىنىڭ قۇرىلىسى جۇرگىزىلەدى. بۇل – تۇران شاعىن اۋدانىنداعى «تەننيس ورتالىعى», №15 سپورت مەكتەبىنىڭ سپورت كەشەنى جانە جەكە كاسىپكەرلەر ەسەبىنەن سالىناتىن سپورتتىق نىساندار. بۇدان بولەك, مەگاپوليستەگى قاجىمۇقان اتىنداعى ورتالىق ستاديون قايتا جاڭعىرتىلادى. شىمسيتي اۋماعىنان كوپفۋنكتسيونالدى «شىمكەنت ارەنا» سپورت كەشەنى بوي كوتەرەدى. كەيىنگى ەكى جوبانىڭ جۇزەگە اسىرىلۋى كەلەشەكتىڭ ەنشىسىنە قالىپ وتىر. ال ازىرگە شاھاردىڭ 5 اۋدانىن تولىق سپورتتىق سەكتسيالارمەن قامتاماسىز ەتۋ بويىنشا ارنايى كارتا ازىرلەندى. سونىڭ ناتيجەسىندە, ءتيىستى سپورتتىق ينفراقۇرىلىمى جوق اۋماقتار انىقتالدى. ولاردىڭ قاتارىندا دوستىق, اسار-2, قايناربۇلاق, ساۋلە, تەكەسۋ, بادام, وڭتۇستىك, ماياتاس, توعىس, سۇلتانرابات, تۇردىاباد, بازارقاقپا, جۇلدىز, قاراباستاۋ سەكىلدى ەلدى مەكەندەر بار. قازىرگى ۋاقىتتا اۋدان اكىمدىكتەرىمەن بىرلەسىپ سپورت نىسانى قۇرىلىستارىن جۇرگىزۋ ءۇشىن جەر تەلىمدەرىن قاراستىرىپ جاتىرمىز», دەدى باسقارما باسشىسى ب.تۇمانباەۆ.
شىمكەنت
