مەرەكەلىك كونتسەرتكە حالىق قاھارماندارى – باقىتجان ەرتاەۆ پەن ايدىن ايىمبەتوۆ جانە استانا قالاسى اكىمىنىڭ ورىنباسارى ەسەت بايكەن, استانا قالالىق ءماسليحاتىنىڭ حاتشىسى ەرلان كاناليموۆ, قالالىق ارداگەرلەر كەڭەسىنىڭ توراعاسى سانسىزباي ەسىلوۆ جانە باسقالار قاتىستى.
«بەيبىتشىلىك جانە كەلىسىم» سارايىندا وتكەن كونتسەرتتە ەلگە بەلگىلى انشىلەر روزا رىمباەۆا, جەڭىس ىسقاقوۆا, مەدەت سالىقوۆ پەن كلارا تولەنباەۆا, ايگۇل قوسانوۆا جانە باسقالار پاتريوتتىق رۋحتاعى اندەردى شىرقاپ, كورەرمەننىڭ ىستىق ىقىلاسىنا بولەندى.
كونتسەرت سۇراپىل سوعىس جىلدارىنداعى ەرجۇرەك جاۋىنگەرلەردىڭ ەرلىگى مەن تىلداعى قاراپايىم ەڭبەك ادامدارىنىڭ تاعدىرىن سيپاتتادى. ارداگەرلەرگە قۇرمەت كورسەتۋ, تاريحقا تاعزىم ەتۋ, بەيبىتشىلىكتى ساقتاۋ سياقتى قۇندىلىقتار دارىپتەلدى.
«ماعان ءبارى ۇنادى. قويىلىم دا, اكتەرلەردىڭ ونەرى دە, رەجيسسۋرا دا كوڭىلىمنەن شىقتى. باتىرلارىمىزدىڭ ەسىمى اتالعان اندەردىڭ شىرقالعانى كەرەمەت ءبىر اسەر بەردى. قازاقستان مايدان دالاسىنا اتتانعان ءاربىر باتىرىنىڭ ەرلىگىن قۇرمەتتەيدى», دەدى قالا تۇرعىنى دياس تەمىرحانوۆ.
مەرەكەلىك كەش بارىسىندا مايدان اندەرىمەن قاتار, تەاترلاندىرىلعان قويىلىمدار قويىلدى.
