بۇۇ باعدارلاماسى ماڭعىستاۋدا جۇزەگە اسادى

مۇنايلى ماڭعىستاۋدىڭ دامۋىنان تىس, ايماقتا ەكولوگيا, حالىق دەنساۋلىعى, كۇن مەن جەل ەنەرگياسىن پايدالانۋ, بيزنەستى وركەندەتۋ سەكىلدى باعىتتاردا بۇدان دا قارقىندى جۇمىس جۇرگىزۋگە, جەتىسپەي تۇرعان تۇستاردى از ۋاقىت ىشىندە قالىپقا كەلتىرۋگە بولادى. بىرىككەن ۇلتتار ۇيىمىنان كەلگەن دەلەگاتسيا وسىلاي دەپ, بىرلەسە جۇمىس جاساۋ ءۇشىن ءوز باعدارلامالارىن ۇسىندى. بۇۇ-نىڭ بۇل ۇسىنىسىن قابىل العان ماڭعىستاۋ وبلىستىق اكىمدىگى ءوزارا بىرلەسكەن جاڭا باعدارلامانى اشۋ ماقساتىندا ەكىجاقتى كەلىسىمگە قول قويدى. بىرلەسكەن باعدارلاما بۇۇ-نىڭ UNDP – بىرىككەن ۇلتتار ۇيىمىنىڭ دامۋ باعدارلاماسى, UNESCO – ءبىلىم, عىلىم جانە مادەنيەت ماسەلەلەرى جونىندەگى بىرىككەن ۇلتتار ۇيىمى, UNFPA – بۇۇ حالىق سالاسىنداعى قورى, UNHCR – بۇۇ بوسقىندار ءىسى جونىندەگى جوعارعى كوميسسارىنىڭ باسقارماسى, UNICEF – بىرىككەن ۇلتتار ۇيىمىنىڭ بالالار قورى, UN Women – بۇۇ گەندەرلىك تەڭدىك جانە ايەلدەردىڭ قۇقىعى مەن مۇمكىندىكتەرىن كەڭەيتۋ ماسەلەلەرى جونىندەگى قۇرىلىمى جانە WHO –دۇنيەجۇزىلىك دەنساۋلىق ساقتاۋ ۇيىمى سىندى جەتى اگەنتتىكتىڭ بىلىكتى ماماندارى كەڭەسىمەن جۇزەگە اسادى. – ماڭعىستاۋ وبلىسى قارقىندى دامۋ ۇستىندەگى جانە تاريحي كونە ەس­كەرت­كىشتەرگە تولى ولكە. وسى ەس­كەرت­كىشتەردى الەمدىك دەڭگەيدە بۇۇ-نىڭ مۇراسىنا ەنگىزۋگە بولادى. وبلىس اكىمدىگىمەن بىرلەسە جۇزە­گە اسى­راتىن باعدارلامامىزدىڭ ما­ق­ساتى – جارقىن بولاشاقتى بىرلەسە جا­ساۋ. باعدارلامادا جاسىل ەكونوميكا­نى دامىتۋ, تۇرعىندار دەنساۋلىعىن جاق­سارتۋ, كاسىپكەرلىكتى وركەندەتۋ, – دەپ تانىستىردى باعدارلاما بارىسىن بۇۇ تۇراقتى ۇيلەستىرۋشىسى ستيۆەن تۋلل. اۋىلدىق جەرلەردە جاڭا كاسىپكەر­لىكتى دامىتۋدى جۇزەگە اسىرىپ, كىشى گرانتتارمەن قامتاماسىز ەتەتىن  تەتىكتەردى قۇرۋعا قازاقستان رەسپۋب­لي­كاسى ۇكىمەتىمەن بىرگە ارەكەت ەتەتىن ولار بالالار دەنساۋلىعى, جىنىستى جانە رەپرودۋكتيۆتi دەنساۋلىق, جۇق­پالى ەمەس اۋرۋلاردىڭ الدىن الۋ جانە ەمدەۋ, وزىنە ءوزى قول جۇمساۋ, تۇرمىستاعى زورلىق-زومبىلىقتى بولدىرماۋ باع­دار­لامالارىنان قۇرالعان بۇۇ-نىڭ ەڭ ۇزدiك دەگەن حالىقارالىق ستاندارتتار مەن پراكتيكالاردى اكەلەمىز دەپ وتىر. سونداي-اق, اۋىل شارۋاشىلىعى, سۋ مەن ەنەرگيانى ۇنەمدەۋ, تابيعي اپاتتى ازايتۋ جانە توتەنشە جاعدايلارعا دايىندالۋ تاجىريبەلەرى دە نازاردان تىس قالماق ەمەس. باستاعان شارۋالارىنىڭ ءساتتى جۇزەگە اسۋى ءۇشىن وتاندىق ساراپشىلاردى جانە حالىقارالىق مامانداردى باعدارلاماعا قاتىستىرىپ, سەمينار-ترەنينگتەر ۇيىمداستىرۋ جوسپارلانعان. قازىرگى تاڭدا ەلىمىزدىڭ قىزىلوردا, شىعىس قازاقستان وبلىستارىندا جۇزەگە اسىرىلا باستاعان باعدارلاما ءۇش جىلدان سوڭ ءوز ناتيجەسىن بەرە باستايدى ەكەن. باعدارلامانى ۇسىنۋشىلار ماڭعىستاۋ وبلىسىندا ايماقتىڭ الەۋمەتتىك-ەكونوميكالىق, ەكولوگيالىق سالاسىن دامىتۋدى كوزدەيدى, سونداي-اق, دەنساۋلىق سالاسى جانە جاستار ماسەلەسىمەن اينالىسپاق. بۇل سالاداعى كەمشىن تۇستارعا كوز جەتكىزۋ ءۇشىن ماڭعىستاۋ وبلىستىق دەنساۋلىق ساقتاۋ باسقار­ماسىمەن قويان-قولتىق جۇمىس جۇرگىزۋ­دى قالايدى. سالاماتتى ءومىر تۋرالى اقپاراتتاردى, مەديتسينالىق قىز­مەت كورسەتۋدى انالار مەن جاستارعا قولجەتىمدى ەتۋدى ءوز جۇمىستارىنىڭ باسىم باعىتتارى سانايدى. – جاسىراتىنى جوق, قازاقستاندا انالار ءولىمى ءجيى ورىن الادى. بۇل كوكەي­كەستى ماسەلەگە ۇنەمى ينفرا­قۇ­رى­لىمنىڭ نەمەسە جوعارى مەدي­تسينالىق جابدىقتاردىڭ جەتىسپەۋشىلىگى سەبەپ بولا بەرمەيدى, كەي جاعدايلاردا ءدارى­گەرلەردىڭ ناۋقاسقا دەگەن قارىم-قاتىناسىنان دا ماسەلە تۋىنداپ جاتادى. ەمدەلۋشىنىڭ وڭالۋىنا دارىگەردىڭ كۇتىمى, وزىنە دەگەن قارىم-قاتىناسى ۇلكەن پسيحولوگيالىق اسەر ەتەتىندىگى انىقتالعان. ءبىز وسى ماسەلەگە نازار اۋدارا وتىرىپ, ماڭعىستاۋ مەديتسيناسىنا شۆەيتساريانىڭ مەديتسينالىق جۇيەسىن ەنگىزۋدى ويلايمىز, – دەيدى UNFPA-بۇۇ حالىق سالاسىنداعى قورىنىڭ ديرەكتورى ن.بوتەۆ دەنساۋ­لىق ساقتاۋ سالاسى بويىنشا جاسالاتىن جۇمىستار جونىندە. ماڭعىستاۋدا بۇۇ باعدارلاماسىن ۇسىنۋشى دەلەگاتسيا ماڭعىستاۋ وبلى­سىنىڭ اكىمى ا.ايدارباەۆپەن كەزدەسىپ, ەكىجاقتى كەلىسىمگە قول قويدى. گۇلايىم شىنتەمىرقىزى, «ەگەمەن قازاقستان». اقتاۋ. سۋرەتتى تۇسىرگەن سەرىك مايەمەروۆ.