سالتاناتتى جيىننىڭ رەسمي بولىگىندە شىمكەنت قالاسىنىڭ اكىمى مۇرات ايتەنوۆ ءسوز الىپ, جاۋىنگەرلەردى كاسىبي مەرەكەلەرىمەن قۇتتىقتادى.
«بۇگىن – حالقىمىزدىڭ باتىرلىعىن ايعاقتايتىن جانە وتانسۇيگىشتىكتىڭ شىنايى بەلگىسىن كورسەتەتىن مەرەكە. بابالارىمىز «اق بىلەكتىڭ كۇشىمەن, اق نايزانىڭ ۇشىمەن» كەڭ-بايتاق دالامىزدى قورعاپ, بۇگىنگى ۇرپاققا اماناتتاپ قالدىرعان. ەندىگى جەردە بۇل اماناتقا ادال بولۋ – بۇگىنگى ۇرپاقتىڭ پەرزەنتتىك پارىزى. تاريح قويناۋىنداعى ەرلىككە تولى جەڭىستى جولىمىز ۇرپاق جادىندا ماڭگى ساقتالۋعا ءتيىس. بيىل ەلىمىزدىڭ قارۋلى كۇشتەرىنىڭ قۇرىلعانىنا 31 جىل تولىپ وتىر. وسى جىلدار ىشىندە ۇلتتىق اسكەرىمىز دامۋ جاعىنان بيىككە ورلەدى. سونىڭ ناتيجەسىندە قارۋلى كۇشتەرىمىز جىلدان-جىلعا قۋاتىن ارتتىرىپ كەلەدى. بۇگىندە دايىندىق دەڭگەيى جوعارى, جاۋىنگەرلىك رۋحى اسقاق, زاماناۋي قارۋ-جاراقپەن, تەحنيكالارمەن جابدىقتالعان ۇلتتىق اسكەرمەن ماقتانا الامىز. ايتىلار اڭگىمەنىڭ توبىقتاي ءتۇيىنى, ايبىندى اسكەرىمىز – تۇعىرلى تاۋەلسىزدىگىمىز مەن مەملەكەتىمىزدىڭ بەرىك قورعانى», دەدى مۇرات دۇيسەنبەك ۇلى.
سونداي-اق قالا باسشىسى الەمدە قالىپتاسقان كۇردەلى گەوساياسي احۋال ەل تاۋەلسىزدىگى مەن تەرريتوريالىق تۇتاستىقتى قورعاۋ, ۇلتتىق قاۋىپسىزدىكتى قامتاماسىز ەتۋ ماسەلەسىن بۇرىنعى كەزبەن سالىستىرعاندا وزەكتى ەتە تۇسكەنىن اتاپ ءوتتى. وسىعان بايلانىستى قالا اكىمى ءسوزىنىڭ سوڭىن «وتان قورعاۋ – پەرزەنتتىك پارىز, مارتەبەلى مىندەت. ەلىمىزدىڭ تىنىشتىعى مەن جەرىمىزدىڭ تۇتاستىعىن ساقتاۋ جولىندا قالتقىسىز قىزمەت ەتىپ جۇرگەن ەرجۇرەك جاۋىنگەرلەرىمىزدىڭ ەڭبەگى ەرەن. حالقىمىز انتىنا ادال, سەرتىنە بەرىك پەرزەنتتەرىن ارقاشان قادىر تۇتادى», دەگەن ويمەن اياقتادى.
سالتاناتتى ءىس-شارادا شاھار باسشىسى بىرقاتار اسكەري قىزمەتكەردى ءمىنسىز قىزمەتى ءۇشىن ارنايى ماراپاتتادى. سونىمەن بىرگە «وڭتۇستىك» وڭىرلىك قولباسشىلىعى اسكەرلەرىنىڭ قولباسشىسى, گەنەرال-مايور مەرەكە كوشەكباەۆ قارۋلى كۇشتەردىڭ ارداگەرلەرى مەن جاۋىنگەرلەردى مەرەكەمەن قۇتتىقتاپ, قۇرمەت كورسەتتى.
وتان قورعاۋشىلار كۇنىنە ارنالعان مەرەكەلىك باسقوسۋ سوڭى شىمكەنت اسكەري گارنيزونىنىڭ ساربازدارى جانە قالاداعى اسكەري وقۋ ورىندارىنىڭ كۋرسانتتارى مەن ەسترادا جۇلدىزدارى ازىرلەگەن مەرەكەلىك كونتسەرتكە ۇلاستى.
شىمكەنت
