قىتايدىڭ قازاقستانمەن ۆيزاسىز رەجىم ورناتۋعا قادام باسۋىنىڭ استارىنان ەلىمىزگە قارسى جىمىسقى ساياسي ىلىك ىزدەۋ دۇرىس ەمەس. الايدا بۇل ەسىكتى ايقارا اشىپ قويىپ, كورىنگەن كوك اتتىنى ىشكە كىرگىزە بەرۋ دەگەن دە ءسوز ەمەس. بۇدان بىلاي كوشى-قون سالاسىنا جاۋاپتى قۇزىرلى ورگاندار شەكارادان كىرگەن-شىققان ادامداردى بۇرىنعىدان دا ءجىتى قاداعالاۋعا الىپ, تياناقتى جۇمىس جۇرگىزۋى كەرەك. قىتايدىڭ ەلىمىزگە قاتىستى جىمىسقى ساياساتى بولماسا دا, ول جاقتان كەلەتىندەردىڭ قانداي ادامدار ەكەنىن, قانداي پيعىلى بارىن كىم ءبىلسىن؟ سوندىقتان ىشكى ىستەر مينيسترلىگى مەن ۇلتتىق قاۋىپسىزدىك كوميتەتى ەلىمىزگە كىرەتىن شەتەلدىكتەردىڭ ءجۇرىس-تۇرىسىن, ءىس-ارەكەتتەرىن قاتاڭ باقىلاۋعا الاتىن بولسا, ءبىز ەكى ەل اراسىنداعى قابىلدانىپ جاتقان وسى شارالارعا ۇركە قاراماۋىمىز كەرەك.
قازاقتا «تورىمىزگە شىعارامىز, بىراق توبەمىزگە وتىرعىزبايمىز» دەگەن ءسوز بار. ۆيزاسىز رەجىم جاعدايىندا دا وسى قاعيدانى باسشىلىققا العانىمىز دۇرىس. ءبىر مىسال ايتايىن, دۋبايعا قاراڭىز. ونىڭ جەر استىنداعى بايلىعى ءبىزدىڭ اتىراۋ مەن ماڭعىستاۋدان اسىپ بارا جاتقان جوق. بىراق ارابتار تۋريزمگە بارلىق جاعدايدى جاساپ قويعان. سونىڭ ارقاسىندا الەمگە تانىلدى, تۋريستەر ارقىلى تۇسكەن پايداسى شاشەتەكتەن, حالقى باقۋاتتى. قازىرگى كۇنى قىتايلار – الەمدەگى ەڭ كوپ ساياحاتتايتىن حالىقتاردىڭ ءبىرى. ولاردى ءبىزدىڭ ەلگە قاراي تارتاتىن بولساق, مۇندا كەلۋ ءۇشىن مىندەتتى تۇردە ۇشاعىمىزعا وتىرادى, قوناقۇيىمىزدى جالدايدى, مەيرامحانامىزدان ءدام تاتادى, تاكسيگە وتىرادى, وسىنىڭ ءبارى – ەلگە شەتتەن كىرىپ جاتقان تابىس.
سوندىقتان قىتايمەن ارادا ۆيزاسىز رەجىم ەنگىزىلۋىن قولدايمىن. تەك جوعارىدا ايتقانىمداي, ءاربىر شەتەلدىكتى باقىلاۋعا الىپ, قاداعالاۋدى ۇستاۋ جاعىن بوساڭسىتىپ الماساق بولدى.
ءجادي شاكەن ۇلى,
جازۋشى
