«بۇگىن – حالىقارالىق مۇگەدەكتەر قۇقىعىن قورعاۋ كۇنى. بۇل – مۇمكىندىگى شەكتەۋلى ازاماتتاردىڭ قۇقىعىن قورعاۋ ماسەلەسىنە قالىڭ جۇرتشىلىقتىڭ نازارىن اۋدارۋ ءۇشىن قولعا الىنعان يگى باستامالاردىڭ ءبىرى. جالپى, دۇنيەجۇزىلىك دەنساۋلىق ساقتاۋ ۇيىمىنىڭ مالىمەتى بويىنشا, قازىرگى تاڭدا الەمدە مۇگەدەكتىگى بار ادامداردىڭ سانى 1 ملرد-تان اسادى. بۇل كورسەتكىش جەر بەتىندەگى حالىقتىڭ 15 پايىزىنا جۋىعىن قۇرايدى. ونىڭ ىشىندە 100 ملن-نان استامى بالالار ەكەنىن اتاپ وتكەن ءجون», دەپ جازدى م.اشىمباەۆ.
ونىڭ ايتۋىنشا, اتالعان ماسەلە ءبىزدىڭ ەلىمىز ءۇشىن دە وزەكتى. بۇگىندە قازاقستاندا 700 مىڭنان استام مۇمكىندىگى شەكتەۋلى ازامات بولسا, ونىڭ 14 پايىزعا جۋىعى 18 جاسقا دەيىنگى بالالار.
«شىن مانىندە, بۇل ساناتتاعى ازاماتتارعا ءوز قۇقىقتارىن قورعاۋ وڭاي ەمەس. ولار كوبىنە وسى باعىتتا ءتۇرلى كەدەرگىلەر مەن قيىندىقتارعا تاپ بولىپ جاتادى. سوندىقتان ينكليۋزيۆتى قوعام قۇرۋ, مۇگەدەكتىگى بار ادامداردىڭ دەنساۋلىعىن ساقتاۋ, ولاردى ساپالى بىلىممەن جانە جۇمىسپەن قامتۋ ماسەلەلەرى ۇنەمى مەملەكەت باسشىسىنىڭ نازارىندا. بۇل باعىت ەلىمىزدەگى الەۋمەتتىك ساياساتتىڭ نەگىزگى باسىمدىقتارىنىڭ ءبىرى ەكەنىن دە ايتا كەتكەن ابزال.
بۇگىنگە دەيىن قازاقستاندا وسى سالادا اۋقىمدى جۇمىس اتقارىلدى. دەسەك تە, الدىمىزدا ودان دا زور مىندەتتەر تۇر. سوندىقتان قازىر سەنات ينكليۋزيا ماسەلەلەرى جونىندەگى ارنايى زاڭ جوباسىنا باستاماشىلىق جاساۋ جۇمىستارىن قولعا الدى. مۇنداي قۇجات مۇگەدەكتىگى بار ازاماتتارىمىزدىڭ قۇقىعىن قورعاۋدى ودان ءارى كۇشەيتە تۇسەرى ءسوزسىز.
حالقىمىز «كەلىسىپ پىشكەن تون كەلتە بولماس» دەيدى. سول سەبەپتى, مۇددەلى تاراپتاردى ينكليۋزيۆتى قوعام قۇرۋ جولىنداعى وسىنداي يگىلىكتى ىسكە بەلسەندى قاتىسۋعا جانە وزدەرىنىڭ ۇسىنىس-پىكىرلەرىن بىلدىرۋگە شاقىرامىز», دەلىنگەن جازبادا.
