مەملەكەت باسشىسى – قازاقستان قارۋلى كۇشتەرىنىڭ جوعارعى باس قولباسشىسى قاسىم-جومارت توقاەۆتىڭ ايتۋىنشا, بۇگىندە جاس قازاقستاندىقتاردى وتانشىلدىققا تاربيەلەۋ ماڭىزدى مىندەتتەردىڭ ءبىرى بولىپ وتىر. وسى تۇستا ەلدىڭ تۇپكىر-تۇپكىرىندە 9 مىڭعا جۋىق اسكەري-پاتريوتتىق ۇيىم اشىلعان.
«تاعى ءبىر ماڭىزدى مىندەت – جاستاردى وتانشىلدىققا تاربيەلەۋ. ەلىمىزدە 9 مىڭعا جۋىق اسكەري-پاتريوتتىق ۇيىم جۇمىس ىستەيدى. سول ۇيىمداردىڭ قاتارىندا 260 مىڭنان استام ءجاسوسپىرىم بار. «جاس سارباز» قوزعالىسىنىڭ اياسىندا 400 «سمارت سارباز» ۇيىرمەسى اشىلدى. بۇل ۇيىرمەلەرگە 6 مىڭعا جۋىق جاس جەتكىنشەك قاتىسادى», دەدى قاسىم-جومارت توقاەۆ بۇكىلارميالىق كەڭەس وتىرىسى بارىسىندا.
بۇل رەتتە پرەزيدەنت ۇلى وتان سوعىسىنا قاتىسقان قازاقتىڭ داڭقتى باتىرى, اسكەري قولباسشى ءارى تالانتتى جازۋشى باۋىرجان مومىش ۇلىنىڭ قاناتتى ءسوزىن نەگىزگە الىپ, وسكەلەڭ ۇرپاقتىڭ پاتريوتتىق رۋحىن كوتەرۋگە نازار اۋدارۋ قاجەت ەكەنىن ايتتى.
«وسكەلەڭ ۇرپاقتىڭ اسكەري-پاتريوتتىق رۋحىن كوتەرۋگە باسا ءمان بەرۋ قاجەت. باۋىرجان مومىش ۇلى «ەشكىم باتىر بولىپ تۋمايدى. باتىرلىق تا مىنەز سەكىلدى, وسكەن ورتا, كورگەن تاربيەگە بايلانىستى قالىپتاسادى» دەگەن.ء بىز باتىرلارىمىزدىڭ ەرلىگىن ۇنەمى دارىپتەپ وتىرۋىمىز قاجەت. وسىعان وراي اسكەري-پاتريوتتىق تاربيە بەرۋدىڭ 2030 جىلعا دەيىنگى تۇجىرىمداماسىن ازىرلەۋ كەرەك. سونداي-اق «جاس سارباز» قوزعالىسىن دامىتىپ, ونى ۇلتتىق دەڭگەيگە كوتەرگەن ءجون», دەدى مەملەكەت باسشىسى.
ءسوزىن اياقتاي كەلە, پرەزيدەنت قازاق ارمياسىندا قىزمەت ەتەتىن ءار جاۋىنگەر وتان الدىندا, حالىق الدىندا بەرگەن انتىنا ادال بولاتىنىنا سەنىم ءبىلدىردى.
«قورعانىس جانە قاۋىپسىزدىك سالاسى ەلىمىزدى تۇراقتى دامىتۋ ىسىندە ايرىقشا ماڭىزدى ءرول اتقارادى. ايبىندى ارميا – قاسيەتتى جەرىمىزدى جانە ەلىمىزدى قورعايتىن سەنىمدى قالقان. حالقىمىز الاڭسىز ءومىر ءسۇرۋى ءۇشىن اسكەري قىزمەتشىلەر ءوز مىندەتىن مۇلتىكسىز اتقارۋى كەرەك. مەن وتان كۇزەتىندەگى ءاربىر جاۋىنگەرىمىز انتىنا ادال بولادى دەپ سەنەمىن», دەپ تۇيىندەدى قاسىم-جومارت كەمەل ۇلى.
