«اسكەري ءبىلىم جانە عىلىم جۇيەسىن دامىتۋ – اسا ماڭىزدى مىندەت. اسكەري اكادەميالار, ينستيتۋتتار الەمدىك ستاندارتتارعا ساي بولۋعا ءتيىس. وسى سالاداعى جوعارى وقۋ ورىندارىنىڭ ماتەريالدىق بازاسىن نىعايتۋ كەرەك. سونداي-اق وقۋ باعدارلاماسىن زامان تالابىنا ساي بەيىمدەۋ قاجەت», دەدى قاسىم-جومارت توقاەۆ.
مەملەكەت باسشىسىنىڭ ايتۋىنشا, بۇگىندە جىگەرلى اسكەري مامانداردى دايارلاۋ ءۇشىن باسقا دا جوعارى وقۋ ورىندارىنىڭ مۇمكىندىگىن كەڭىنەن پايدالانۋ قاجەت. بۇل رەتتە رەكتورلار ستۋدەنتتەردىڭ جاۋىنگەرلىك دايىندىعىنا تىكەلەي جاۋاپتى بولۋعا ءتيىس ەكەنى ايتىلدى.
پرەزيدەنتتىڭ پايىمداۋىنشا, اسكەري قاۋىپسىزدىك ماسەلەسى عىلىمي تۇجىرىمعا دا سۇيەنۋى كەرەك. ياعني, عىلىمي-زەرتتەۋ جۇمىسىنا باسىمدىق بەرۋ قاجەت.
«اسكەري وقۋ ورىندارى قورعانىس سالاسىنداعى كاسىپورىندارمەن تىعىز بايلانىس ورناتۋى كەرەك. قازىرگى قاقتىعىستاردىڭ سيپاتى مۇلدە بولەك. الەمدە گيبريدتى سوعىس ءجۇرىپ جاتىر. سوندىقتان قارۋلى كۇشتەردىڭ زياتكەرلىك قابىلەتىن ارتتىرۋ – وتە ماڭىزدى مىندەت. ءبىلىم مەن تاربيە ءاردايىم ءبىرىن-ءبىرى تولىقتىرىپ وتىرۋى قاجەت. ساربازدارىمىز قايسار, باتىل, سونداي-اق ءبىلىمدى بولۋى شارت. جاۋىنگەرلەردىڭ بويىنا وتانشىلدىق, ادامگەرشىلىك, ىزگىلىك قاسيەتتەردى ءسىڭىرۋىمىز كەرەك. ولار ناعىز ازامات دەگەن اتقا لايىق بولۋى قاجەت. ءبىر سوزبەن ايتساق, ارميا – بۇل رۋحاني تاربيە ورتالىعى», دەپ اتاپ وتتى قازاقستان قارۋلى كۇشتەرىنىڭ جوعارعى باس قولباسشىسى.
قاسىم-جومارت كەمەل ۇلىنىڭ ايتۋىنشا, قازاقستان ازاماتتارى قاتىگەزدىك, الىمجەتتىك سياقتى قوعامعا قاۋىپتى ۇردىستەرگە جول بەرمەۋى قاجەت.
«بۇگىن وسى جەردە ارداقتى ارداگەرلەرىمىز وتىر. ولاردىڭ تاجىريبەسى, كورگەن-تۇيگەنى مول. ءبىز ارداگەرلەرگە زور قۇرمەت كورسەتەمىز. اعا بۋىننىڭ تاجىريبەسىن جاس ساربازداردى تاربيەلەۋ ىسىنە ءتيىمدى پايدالانعان ءجون», دەپ تۇيىندەدى مەملەكەت باسشىسى.
