تاراپتار قازاق-وزبەك ءوزارا ءىس-قيمىلىنىڭ بىرقاتار وزەكتى ماسەلەسىن, ونىڭ ىشىندە ساۋدا, ونەركاسىپ كووپەراتسياسى, ينۆەستيتسيالىق قىزمەت, ەنەرگەتيكا, لوگيستيكا, ترانسشەكارالىق سۋ نىساندارىن پايدالانۋ, مادەني-گۋمانيتارلىق بايلانىستاردى نىعايتۋ جانە ت.ب. سالالارداعى بىرلەسكەن قادامداردى تالقىلادى.
ءاليحان سمايىلوۆ وزبەكستان ەلىمىزدىڭ ساۋدا سالاسىنداعى ءىرى سەرىكتەستەرىنىڭ ءبىرى ەكەنىن ايتىپ ءوتتى. اتاپ ايتقاندا, 2022 جىلدىڭ قورىتىندىسى بويىنشا ەكىجاقتى تاۋار اينالىمى جوسپارلانعان $5 ملرد-قا جەتتى.
«بۇل ورتاق كۇش-جىگەردىڭ ارقاسىندا مۇمكىن بولىپ وتىر. ەندى العا قويىلعان جوعارى دەڭگەيدەگى مىندەتتەرگە سايكەس ورتا مەرزىمدى پەرسپەكتيۆادا ءوزارا تاۋار اينالىمىنىڭ كولەمىن $10 ملرد-قا دەيىن ۇلعايتۋ كەرەك», دەدى قازاقستاننىڭ ۇكىمەت باسشىسى.
سونىمەن قاتار ءا. سمايىلوۆ قازاق-وزبەك ۇكىمەتارالىق كوميسسياسىنىڭ ەكىجاقتى ءوزارا ءىس-قيمىلدىڭ كەڭ اۋقىمدى ماسەلەلەرىن شەشۋدەگى ەرەكشە ءرولىن اتاپ ءوتتى.
ءوز تاراپىنان ابدۋللا اريپوۆ ەكى ەل اراسىنداعى ستراتەگيالىق ارىپتەستىكتى ودان ءارى نىعايتۋ ءۇشىن الەۋەتتىڭ زور ەكەنىن ايتتى.
ء«وزارا ساۋدادا وڭ ديناميكا بايقالادى. ەكونوميكانىڭ كوپتەگەن سالاسىندا ونەركاسىپ كووپەراتسياسىنىڭ ماڭىزدى جوبالارى ىسكە اسىپ جاتىر. وزبەكستان ساۋدا, ەنەرگەتيكا, كولىك, اۋىل شارۋاشىلىعى مەن سۋ شارۋاشىلىعى جانە باسقا دا سالالارداعى ىنتىماقتاستىقتى ودان ءارى نىعايتۋعا نيەتتى. جالپى ءبىز باۋىرلاس قازاقستانمەن اراداعى قارىم-قاتىناستى ودان ءارى تەرەڭدەتۋگە مۇددەلىمىز», دەدى ابدۋللا اريپوۆ.
