تاياۋدا التىنشى مۇشەلگە كىرگەن اسىل ءسوزدىڭ يەسى قازاقتىڭ ماڭدايىنا بىتكەن دارا ونەردىڭ وتكەنى مەن كەلەشەگىنەن وي تولعاپ, كەزىندە وزىمەن ءسوز قاعىستىرىپ, ونەر جارىستىرعان اتاقتى ايتىسكەر اقىندار جونىندە قىزىقتى ەستەلىكتەر ايتتى.
ءاسيا اقىن ءۇشىن, اسىرەسە, ونەردە قارسىلاسى, ومىردە جاننان قىمبات ەڭ جاقىن سىرلاس-سەرىگى بولعان اسەلحان قالىبەكوۆانىڭ ورنى بولەك ەدى. ءبىرى شۋاقتى شاۋىلدىردەن, ەكىنشىسى ارۋاقتى اۋليەكولدەن تۇلەپ ۇشىپ, ايتىس تاريحىندا وزگەشە ايشىق قالدىرعان وت اۋىزدى, وراق ءتىلدى قوس ونەرپازدىڭ ەكەۋى دە ءبىر كۇندە – 1950 جىلى 22 ساۋىردە دۇنيەگە كەلگەن تۇيدەي قۇرداس. ەكەۋى دە سەكسەنىنشى جىلدارى سەمىپ بارا جاتقان ءتول ونەردىڭ تامىرىنا قان جۇگىرتىپ, قايتا جاندانۋىنا اتسالىستى. ەكەۋى دە اۋىزدىقپەن الىسقان نەبىر ءدۇلدۇل اقىندارمەن قاتار تۇسكەن ايتۋلى الامانداردا اق الماستاي جارقىراپ, قارا بۇلتتاي كۇركىرەپ, ءوز جىرىن, ءوز ءۇنىن, ءوز ماقامىن ماڭگىلىك حالىق جۇرەگىنە جازىپ قالدىردى. قالىڭ ەلدىڭ ىستىق ىقىلاسىنا بولەنىپ, حالىق اقىنى اتاعىن الدى. ءاسيا ايىپقىزىنىڭ اسەلحان اقىن تۋرالى تەبىرەنىسكە تولى ەستەلىگى ساعىنىش پەن مۇڭنان ورىلە بەرەتىنى دە وسىدان بولار.
كەش بارىسىندا ءاسيا بەركەنوۆا كەزىندە وزىنە اسەلحان اقىن سىيلاعان دومبىراسىن مۋزەيگە تارتۋ ەتتى. بۇل دومبىرانىڭ تاريحىن جينالعاندارعا وبلىستىق مادەنيەت باسقارماسىنىڭ باسشىسى ەرلان قالماقوۆ تارقاتىپ ايتىپ بەردى.
– كەزىندە اسەلحان اپا ەكى دومبىرا جاساتىپ, ءبىر فۋتليارعا ءاسيا دەپ جازدىرىپ, وزىنە الىپ, ەكىنشىسىنە اسەلحان دەپ جازدىرىپ ءاسيا اپايعا سىيلاعان ەكەن. ءاسيا اپاي ەكى بىردەي شاپان تىكتىرىپ, بىرەۋىن وزىنە, ەكىنشىسىن مارقۇم اسەلحان اپاعا بەرگەن. بيىل ءاسيا اپاي مۇشەلگە تولدى. قازاقتا مۇشەل جاسقا كەلگەن ادام ءبىر قىمبات دۇنيەسىن سىيعا تارتاتىن جاقسى ءداستۇر بار عوي. ءاسيا ايىپقىزى دا بۇگىن ىرىمداپ دومبىراسىن مۋزەيگە سىيلاپ جاتىر. ايتىستىڭ قوس اقبەرەنى اتانعان اقىن اپالارىمىزدىڭ اراسىنداعى كىرشىكسىز سىيلاستىق پەن ادال دوستىقتىڭ تۇمارىنداي بولعان اسىل دومبىرا وسى مۇراجايدىڭ قۇندى جادىگەرلەرىنىڭ قاتارىنان ورىن الاتىن بولادى, – دەدى باسقارما باسشىسى.
كەزدەسۋگە كەلگەن اقىننىڭ شاكىرتتەرى ۇستازدارىنا ارناپ جىردان شاشۋ شاشسا, زيالى قاۋىم وكىلدەرى جۇرەكجاردى لەبىزدەرىن ايتىپ, سىي-قۇرمەتتەرىن كورسەتتى.
– ءاسيانىڭ شىققان بيىگى, العان اسۋلارى, ايتىس ونەرىندە تالاي جۇرتتى تاڭعالدىرىپ, تامساندىرعانى مەنىڭ ءالى كۇنگە دەيىن كوڭىلىمدە, كوز الدىمدا. ءاسيا توم-توم كىتاپتاردى اقتارىپ, ۇيرەنىپ-وقىپ, بۇرىنعى ايتىسكەرلەردىڭ ونەرىنەن سۋسىنداعان اقىن دەپ ايتا المايمىن. ول ءوزى قازاق مەكتەبىندە ورىس تىلىنەن ساباق بەردى. الاتاۋ باۋرايىنداعى الامان ايتىسقا قوسىلعان العاشقى ءساتتىڭ وزىندە-اق ءداندى دالانىڭ قۇنارلى توپىراعىنان جارق ەتىپ شىققان سوم التىنداي تابيعي تالانتىمەن جارقىراي كورىنىپ, ايتىستىڭ بەل بالاسى, سونىڭ بەسىگىنەن شىققان پەرزەنتىندەي بولىپ تانىلدى. سودان بەرى ءوزىنىڭ اقىندىق ءۇنى, ادامي بولمىسى مەن ازاماتتىق ۇستانىمىنان اينىپ كورگەن ەمەس, – دەدى جيىنعا كەلگەن كوپشىلىككە باتاسىن بەرگەن قارت اقىن جولبارىس بايازيت.
قوستاناي وبلىسى
