بۇگىندە بالالارىمىزدىڭ الدىنداعى جاۋاپكەرشىلىگىمىزدى تەك كيىندىرۋ, تويىندىرۋ, وقىتۋ ءتارىزدى يگىلىكتەرمەن قامتاماسىز ەتۋ دەپ, تار شەڭبەرگە «قاماپ» قويعاندايمىز. شىن مانىندە اتالعان بورىشىمىزعا قانداي قاجەتتىلىكتەردى وتەۋ جاتاتىنىنا تەرەڭىرەك ۇڭىلسەك, سوعان قاراي امال ەتسەك پەرزەنتىمىزدىڭ, ودان ارعىسى ۇلتىمىزدىڭ الدىنداعى پارىزىمىزدى دۇرىس ورىنداۋعا تىرىسقان بولار ەدىك. اتالعان ماسەلەگە تەرەڭ بويلاساڭ ايتىلار جاعدايات وتە كوپ. دەگەنمەن, سولاردىڭ ىشىندە قوعامدا كوزگە ءجيى كورىنىپ, جۇيكەمىزگە سالماق تۇسىرەتىن ءبىر جايتقا از-كەم توقتالا كەتسەك.
بۇگىندە ءومىردى سمارتفوندار مەن پلانشەتتەرسىز كوزگە ەلەستەتۋ قيىن. باسقاسىن ايتپاعاندا, بۇلاردى بايلانىس, اقپارات الۋ ءۇشىن عانا ەمەس, ەس توقتاتپاعان بالانى جىلاعاندا الداۋسىراتاتىن, جۇباتاتىن ويىنشىق رەتىندە دە جاپپاي قولداناتىن بولدىق. مۇنىڭ مىسالىن الىستان ىزدەۋدىڭ قاجەتى جوق, اينالاڭدا ء«ورىپ» ءجۇر. كوپتەگەن اتا-انا ءۇشىن كەز كەلگەن جاستاعى بالاسىنىڭ قىڭقىل-سىڭقىلىنان قۇتىلۋدىڭ تاپتىرمايتىن ءتاسىلى – ونىڭ قولىنا ءىشى جارق-جۇرق ەتكەن ويىنعا تولى سمارتفون ۇستاتا سالۋ. سونىمەن شارۋا ءبىتتى. ەڭ باستىسى – مازانى الماسا بولدى.
ءبىر كەلىنشەك كەتىپ بارادى. سوڭىنان ەكى بالاسى ەرگەن. ۇشەۋىنىڭ دە كوزدەرى قولدارىنداعى سمارتفوندارىنا «جابىسىپ قالعان», وزگە دۇنيەنى ۇمىتقان. ءبىر جىگىت بەسىك ارباداعى بالاسى جىلاي باستاپ ەدى, وعان قولىنداعى قۇرىلعىسىنىڭ ەكرانىن اشىپ بەرە سالدى, اناۋ ءماز. ءبىر اجە سمارتفونعا ءۇڭىلىپ, ونىڭ ىشىندەگى ويىنعا بەرىلگەن نەمەرەسىنەن «بولدى, جەتەدى, كوزىڭ اۋىرادى», دەپ الگى قۇرىلعىنى الىپ قويىپ ەدى, اناۋ باج ەتە قالدى دا, باقىرىپ-شاقىرىپ جىلاۋدى ۇدەتتى. بولماعان سوڭ الگى اجە نەمەرەسىنە سمارتفوندى قايتارىپ بەرىپ جۇباتىپ الدى. مىنە, ءبىزدىڭ قوعامداعى اتا-انا مەن بالانىڭ اراسىنداعى قارىم-قاتىناستىڭ سۇرىقسىز ءبىر كورىنىسى وسى ىڭعايدا. ولاردىڭ اراسىندا مامىلە, ءوزارا سويلەسۋ, ءتىل قاتىسۋ ۇزىلگەندەي. بۇل ءۇزىلىس جۇرە كەلە, اتا-انا قارتايىپ, بالا وسكەندە دە جالعاسۋى ابدەن مۇمكىن-اۋ. تاس باۋىر ۇرپاق وسى ىسپەتتەس كەلەڭسىزدىكتەردەن پايدا بولادى.
بالا جىلاسا, الدەنەنى سۇراپ قىڭقىلداپ-سىڭقىلداسا اتا-انا وعان مەيىرىممەن ءۇن قاتىپ, اينالىپ-تولعانىپ جۇباتۋى, سۇراعانىنا قاراي جاۋاپ بەرۋى قاجەت. جىلاعان, مازاسىزدانعان بالا اتا-انانىڭ مەيىرىمى ارقىلى جۇبانباسا, قاجەتىن الماسا, قۇدايدىڭ قۇدىرەتىمەن تۇزىلگەن اراداعى سەزىم سەمەدى, جۇرەكتەر قاتايادى. بۇل ولاردىڭ ءبىر-بىرىنە دەگەن كوزقاراسىن سالقىنداتىپ, كوزگە كورىنبەس ءجىپسىز بايلانىستى اياقاستى ەتەدى. بالاسىنا سالقىن اتا-انا, اتا-اناسىنا دەگەن جۇرەگى تاس, مۇزداي بالا ءوسىپ شىعادى. ەڭ وكىنىشتىسى سول, ءبىز بالا تاربيەسىن كوگىلدىر ەكراندار مەن سمارتفون, پلانشەتتەرگە «سەنىپ تاپسىرىپ قويدىق». پەرزەنتتەرىمىز ءبىزدىڭ وزدەرىنە ارناۋىمىزعا ءتيىس ۋاقىتىن الگى قۇرىلعىلاردىڭ الدىندا وتكىزىپ كەلەدى.
بالانىڭ اتا-اناسىندا حاقى بار. سول حاقىن دۇرىستاپ بەرۋدە ۇلكەندەر جاعىنىڭ سالعىرتتىعى, جاۋاپسىزدىعى, بىلىمسىزدىگى بۇگىندە اسقىنعان جارا سەكىلدى كورىنىپ تۇر. بۇل كەلەڭسىزدىكتىڭ سالدارى كۇندەردىڭ كۇنىندە الدىمىزدان اتويلاپ, شەشىمى قيىن تۇيتكىل بولىپ شىعۋى ابدەن مۇمكىن. بالانىڭ اتى – بالا. ول – قاۋقارسىز, اتا-اناعا مۇقتاج. بالانى جاس كەزىندە تەزگە سالىپ, جونگە كەلتىرۋ وڭاي. ال بالاڭ سەنىڭ كەسىرىڭنەن بولمىسى, مىنەزى قيسىق-قىڭىر, جان دۇنيەسى جاداۋ بولىپ وسسە, ونى قايتا رەتتەۋ وتە قيىن. سوندىقتان, ۇرپاق تاربيەسىنە قاتىستى ءاربىر قادامىمىزعا بايىپپەن قاراپ, جىبەرىلىپ جاتقان قاتەلىكتەرىمىزدى تۇزەۋگە وسى باستان كۇش سالماساق وپىق جەيمىز. بار كىنا, كۇنا اتا-انانىڭ موينىندا قالادى. ونىڭ ازابىن باسقادان ەمەس ءدال ءوز پەرزەنتىڭنەن تارتساڭ, ءوز وبالىڭ وزىڭە, ەشكىمگە وكپەلەمە.
ءومىر ەسىگىن جاڭادان اشقان ۇل-قىزىڭنىڭ الدىنداعى نەگىزگى پارىزىن ادال وتەگەن اتا-بابالارىمىز پەرزەنتتەرىنە قاجەت جەرىندە قاتال, قاجەت جەرىندە جۇمساق بولا بىلگەن. مىنە, ءبىزدى سول بابالار جولى اداستىرمايدى. سونى تۇسىنەيىك.
اتاقتى ستيۆ دجوبس ءبىر سۇحباتىندا قويىلعان سۇراققا وراي: «ۇيدە ءبىز بالالاردىڭ ايپادپەن وتىرۋ ۋاقىتىنا شەكتەۋ قويامىز», دەپتى. سول سياقتى, تەحنولوگيالىق ءىرى كومپانيالاردىڭ كوپتەگەن باسشىسى, «كرەمني» جازىعىنىڭ مارقاسقالارى ءوز پەرزەنتتەرىنىڭ ەلەكتروندى قۇرالدارمەن وتكىزەتىن ۋاقىتىنا شەكتەۋ قوياتىن كورىنەدى. ءىت تەحنولوگيامەن شۇعىلداناتىن بۇل تۇلعالار اتالعان بۇيىمداردىڭ ءبىز ۇعا بەرمەيتىن قۇپيا قاۋىپ-قاتەرلەرى بار ەكەنىن بىلگەندىكتەن الگىندەي شەكتەۋ امالدارىنا جۇگىنەتىن بولسا كەرەك. ەندەشە, ءبىز دە اباي بولىپ, سمارتفون جانە سول تارىزدەس قۇرالداردىڭ ىقپالىندا تۇبەگەيلى قالىپ قويماۋدىڭ امالىن جاساعانىمىز ءجون. بۇل بۇيىمداردى ادام ءوز رەتىمەن قولدانباسا, فيزيكالىق تا, رۋحاني دا زالال تيگىزەرى انىق.
